Hyderabad: జిమ్‌లో వ్యాయామం చేస్తూ కుప్పకూలిన కానిస్టేబుల్.. ఆస్పత్రికి తరలించేలోపే...

Hyderabad: ఫిట్‌నెస్ కోసం జిమ్ చేస్తే హార్ట్ ఎటాక్ తప్పదా? వరుసగా జరుగుతున్న ఘటనలు ఇటువంటి భయాన్ని కలిగిస్తోంది. హీరోలు పునీత్ నుంచి తారకరత్న దాకా.. గుండెపోటుతో మృత్యువాత పడ్డారు. తాజాగా సికింద్రాబాద్‌లో జిమ్ చేస్తూ ఓ కానిస్టేబుల్‌ గుండెపోటుతో కుప్పకూలి ప్రాణాలు విడిచాడు. విశాల్ అనే కానిస్టేబుల్ ఆసిఫ్‌నగర్ పోలీస్ స్టేషన్‌లో విధులు నిర్వహిస్తున్నాడు. సికింద్రాబాదులోని ఓ జిమ్‌లో వ్యాయామం చేస్తుండగా ఒక్కసారిగా కుప్పకూలిపోయాడు. విశాల్ పరిస్థితిని గమనించిన తోటి మిత్రులు వెంటనే స్పందించి.. అతడిని దగ్గరలోని ఓ ప్రైవేట్ ఆసుపత్రికి తరలించారు. అయితే అప్పటికే విశాల్ మృతి చెందాడని వైద్యులు తెలిపారు. సికింద్రాబాద్ గౌస్‌మండీకి చెందిన 24 ఏళ్ల విశాల్.. 2020లో కానిస్టేబుల్‌గా విధుల్లో చేరాడు.