గుణశేఖర్ 'హిరణ్యకశ్యప' మూవీలో విష్ణుమూర్తి పాత్రలో టాలీవుడ్ టాప్ హీరో ?

గుణ శేఖర్ దర్శకత్వంలో రానా హీరోగా 'హిరణ్య కశ్యప' అనే పౌరాణిక సినిమా తెరకెక్కుతోన్న విషయం తెలిసిందే. గత 3ఏళ్లుగా ఈ సినిమాకు సంబంధించిన ప్రీ ప్రొడక్షన్ పనులు జరుగుతున్నాయి. తాజాగా ఈ సినిమాకు సంబంధించిన ప్రీ ప్రొడక్షన్ వర్క్ మొత్తం పూర్తయిందని గుణశేఖర్ తెలియజేసాడు. తెలుగుతో పాటు తమిళ్, హిందీ భాషల్లో పాన్ ఇండియా లెవల్లో దాదాపు రూ.180 కోట్ల భారీ బడ్జెట్‌తో ఈ సినిమాను తెరకెక్కించబోతున్నారు.

అయితే పౌరాణిక సినిమాలు తెరకెక్కించిన అనుభవం గుణ శేఖర్ కు ఉంది. జూనియర్ ఎన్టీఆర్ బాలనటుడిగా 'రామాయణం' వంటి పౌరాణిక సినిమాను తెరకెక్కించిన ఎక్స్ పీరియన్స్‌తో ఇపుడు రానా హీరోగా 'హిరణ్య కశ్యప' మూవీ శ్రీకారం చుట్టాడు. ఈ సినిమా గతంలో వచ్చిన భక్త ప్రహ్లాద కథే అయినప్పటికీ ఈ సినిమాను గుణ శేఖర్ హిరణ్యకశ్యపుడి కోణంలో తెరకెక్కించబోతున్నాడు.

తెలుగులో తొలి టాకీ సినిమాగా 'భక్త ప్రహ్లాద'కు ప్రత్యేక గుర్తింపు ఉంది. హెచ్ఎమ్ రెడ్డి దర్శకత్వంలో తెరకెక్కిన ఈ సినిమాలో మునిపల్లె సుబ్బయ్య హిరణ్య కశ్యపుడిగా నటిస్తే, మాస్టర్ కృష్ణారావు ప్రహ్లాదుడి పాత్రలో నటించారు. ఆ తర్వాత ఏవీఎం ప్రొడక్షన్‌లో చిత్రపు నారాయణ రావు దర్శకత్వంలో 'భక్త ప్రహ్లాద' సినిమా విడదలైంది. ఈ సినిమాలో ఎస్వీఆర్ హిరణ్యకశ్యపుడిగా నటించారు.. యువ కథనాయకుడు తరుణ్ తల్లి రోజా రమణి భక్త ప్రహ్లాదుడిగా టైటిల్ రోల్ పోషించడం విశేషం.

హిరణ్య కశ్యపుడిని చంపడానికి శ్రీ మహావిష్ణువు నరసింహావతారం ఎత్తి అతన్ని సంహారిస్తాడు. ఈ పాత్ర కోసం టాలీవుడ్ ఓ స్టార్ హీరోను అనుకుంటున్నారని సమాచారం. ఈ పాత్ర కోసం జూ. ఎన్టీఆర్‌ను గుణశేఖర్ సంప్రదించినట్టు సమాచారం. పాత్ర నిడివి తక్కువే అయినా..ఎన్టీఆర్ లాంటి నటుడు ఈ సినిమాలో విష్ణుమూర్తి పాత్ర పోషిస్తే.. ఈ సినిమాకు మంచి హైప్ వచ్చే అవకాశాలున్నాయి. ఇప్పటికే ఎన్టీఆర్ రాజమౌళి దర్శకత్వంలో ఆర్ఆర్ఆర్ సినిమాతో పాన్ ఇండియా సినిమా చేస్తున్న సంగతి తెలిసిందే కదా. మరి ఎన్టీఆర్ మాత్రం ఈ చిత్రంలో నటించే విషయమై ఇంకా కన్ఫామ్ చేయలేదు.