'బాహుబలి', '2.ఓ' తరువాత సూర్య సినిమానే

ఈ మధ్య కాలంలో సినిమా ఓపెనింగ్స్ లో ప్రమోషన్ లు కీలక పాత్ర పోషిస్తున్నాయి. చిన్న సినిమా అయినా పెద్ద సినిమా అయినా మొదటి రోజు కలెక్షన్లు ప్రోమోషన్ల మీదనే ఆధారపడతాయి. అందుకే సూర్య తన తదుపరి చిత్రానికి భారీ లెవెల్లో ప్రమోషన్ పనులు చేపట్టనున్నాడు. సెల్వరాఘవన్ దర్శకత్వంలో సూర్య నటించిన 'ఎన్జీకే' సినిమా షూటింగ్ చివరి దశలో ఉంది. ఈ సినిమా ఫిబ్రవరి 14న విడుదల కానుంది. ఈ సందర్భంగా ఆ సినిమా ట్రైలర్ ను 5 రాష్ట్రాల లోని ముఖ్యమైన థియేటర్లో అభిమానుల సమక్షంలో ఒకేసారి విడుదల చేయాలని ప్లాన్ చేస్తున్నారు.

అంటే ఆంధ్రప్రదేశ్, తెలంగాణ, తమిళనాడు, కర్ణాటక, కేరళ ఐదు రాష్ట్రాల్లో కొన్ని కీలక థియేటర్లలో 'ఎన్జీకే' ట్రైలర్ ప్రేక్షకుల ముందుకు రానుంది. అయితే ఈ మధ్య కాలంలో ఇంత హడావిడి చేసిన సినిమాలు 'బాహుబలి2', '2.ఓ' మాత్రమే. సూర్య సినిమా ఈ కోవలో 3వ సినిమాగా చెప్పుకోవచ్చు. పొలిటికల్ థ్రిల్లర్ గా ప్రేక్షకుల ముందుకు రానున్న ఈ సినిమా లో సాయి పల్లవి, రకుల్ ప్రీత్ హీరోయిన్లుగా నటించారు. యువన్ శంకర్ రాజా ఈ సినిమాకు సంగీతాన్ని అందించారు. ఈ సినిమాలో జగపతి బాబు ముఖ్య విలన్ పాత్రలో కనిపించనున్నారు.