మళ్లీ వాయిదా పడ్డ 'ఎన్టీఆర్ మహానాయకుడు'

ఎన్టీఆర్ బయోపిక్ లోని మొదటి భాగం గా 'ఎన్టీఆర్ కథానాయకుడు' సినిమా జనవరి 9, 2019 లో విడుదలైన సంగతి తెలిసిందే. ఎన్టీఆర్ పాత్రలో నందమూరి బాలకృష్ణ ప్రేక్షకులకు కనువిందు చేశారు. భారీ అంచనాల మధ్య విడుదలైనప్పటికీ ఈ సినిమా ప్రేక్షకులను మెప్పించలేకపోయింది. సంక్రాంతి కానుకగా విడుదలైన ఈ సినిమా బాక్సాఫీస్ వద్ద డిజాస్టర్గా నిలిచింది. ఈ సినిమా ఫ్లాప్ అవడంతో ఆ ఎఫెక్ట్ ఎన్టీఆర్ బయోపిక్ లో రెండవ భాగమైన 'ఎన్టీఆర్ మహానాయకుడు' పైన బాగానే పడింది. మొదట ఫిబ్రవరి 7వ తారీఖు న విడుదల కావాల్సిన ఈ సినిమా ఇప్పుడు వాయిదా పడింది.

దర్శకుడు క్రిష్ మరియు బాలయ్య ఈ సినిమా కోసం మరిన్ని జాగ్రత్తలు తీసుకుంటున్నారని అందుకని ఈ సినిమా ఫిబ్రవరి 14వ తారీఖున విడుదల కావచ్చని వార్తలు వచ్చాయి. అయితే చిత్ర బృందం ఇంకా అధికారిక ప్రకటన ఇవ్వలేదు. తాజా సమాచారం ప్రకారం ఈ సినిమాని శివరాత్రి కానుకగా ఫిబ్రవరి 28వ తారీఖున కానీ లేక మార్చి మొదటి వారంలో కానీ విడుదల చేయాలని దర్శక నిర్మాతలు ప్లాన్ చేస్తున్నట్లు తెలుస్తోంది. బాలకృష్ణ ఈ సినిమాను స్వయంగా నిర్మిస్తున్నారు.