జై తో రిలేషన్‌షిప్.. క్లారిటీ ఇచ్చిన అంజలి

తెలుగమ్మాయి అయినప్పటికీ కోలీవుడ్ లో వరుసగా సినిమాలు చేస్తూ హిట్లు అందుకుంటున్న హీరోయిన్ అంజలి. 'సీతమ్మ వాకిట్లో సిరిమల్లె చెట్టు' సినిమాలో వెంకటేష్ సరసన నటించిన అంజలి, ఆఖరిగా 'చిత్రాంగద' సినిమాలో కనిపించింది. ఇక గ్లామరస్ రోల్స్ పై కాకుండా పర్ఫార్మెన్స్ ఓరియంటెడ్ పాత్రల పై దృష్టి పెట్టిన అంజలి మమ్మూట్టి తో 'పేరంబు' అనే సినిమాలో కనిపించింది. ఆ సినిమాలో తన నటనతో ప్రేక్షకులను మెప్పించిన అంజలి ఈ మధ్యనే ఒక ఇంటర్వ్యూలో మాట్లాడుతూ తన ప్రేమ మరియు పెళ్లి గురించి క్లారిటీ ఇచ్చింది.

గత కొంతకాలంగా అంజలి తన జర్నీ కో స్టార్ జై తో పీకల్లోతు ప్రేమలో మునిగి తేలుతుందని వీరిద్దరూ లైవ్-ఇన్ రిలేషన్ షిప్ లో ఉన్నారని పుకార్లు మనం వింటూనే ఉన్నాం. తాజా సమాచారం ప్రకారం వీటి పై నోరు విప్పింది అంజలి. జై తో తన అనుబంధం గురించి ఎప్పుడూ మీడియా ముందు తను చెప్పలేదని మీడియా వాళ్లే కథలు అల్లుకొని మరి రాశారని వాటికి తను ఎందుకు జవాబివ్వాలని ఎదురు ప్రశ్నించింది అంజలి. అలాంటి గాసిప్స్ విన్నప్పుడు తను చాలా బాధపడేదాన్ని చెప్పుకొచ్చింది. ప్రస్తుతం పెళ్లి చేసుకోవాలని ఆలోచన లేదని కొన్నాళ్ళు సినిమాలపైనే దృష్టి పెడతానని తేల్చిచెప్పింది.