Living Alone: ఒంటరిగా జీవించే వారికి వచ్చే ప్రధాన వ్యాధి ఇదే – ఎప్పుడైనా రావచ్చు

ఒంటరిగా జీవించడం కొంతమందికి సౌఖ్యంగా అనిపించినా, అది మానసికంగా మాత్రమే కాకుండా శారీరక ఆరోగ్యంపైన కూడా తీవ్ర ప్రభావం చూపుతుందని తాజా అధ్యయనం చెబుతోంది. ఒంటరిగా జీవించే వారికి మధుమేహం (డయాబెటిస్) త్వరగా వచ్చే అవకాశం ఎక్కువగా ఉందని కాలిఫోర్నియాలోని శాన్ ఫ్రాన్సిస్కోలో నిర్వహించిన పరిశోధనలో తేలింది.

కోవిడ్-19 తర్వాత సామాజికంగా ఒంటరిగా జీవించే వారి సంఖ్య పెరిగింది, ముఖ్యంగా వృద్ధులు మరియు పెళ్లి చేసుకోని వ్యక్తులు ఈ జాబితాలో ఎక్కువగా ఉన్నారు.

మధుమేహం – నిశ్శబ్ద హంతకుడు

మధుమేహం శరీరంలో ఇన్సులిన్ ఉత్పత్తి సరిగా లేకపోవడం లేదా ఉత్పత్తి అయిన ఇన్సులిన్‌ను శరీరం సరిగా ఉపయోగించుకోలేకపోవడం వల్ల వస్తుంది. రక్తంలో అధిక చక్కెర స్థాయిలు పెరగడం వల్ల గుండె జబ్బులు, మూత్రపిండాల సమస్యలు, కంటి సమస్యలు వచ్చే ప్రమాదం ఉంటుంది. డయాబెటిస్‌కు అధిక రక్తపోటుతో కూడా సంబంధం ఉందని నిపుణులు చెబుతున్నారు.

ఒంటరితనం మరియు డయాబెటిస్ సంబంధం

సామాజికంగా ఇతరులతో కలవకుండా, స్నేహితులు లేకుండా ఇంట్లోనే తన పనులు చేసుకుంటూ జీవించడం, పెళ్లి చేసుకోకుండా ఒంటరిగా జీవించడం – ఇవన్నీ డయాబెటిస్ వచ్చే ప్రమాదాన్ని పెంచుతాయి. తాజా అధ్యయనం ప్రకారం, ముఖ్యంగా 60 నుంచి 84 ఏళ్ల మధ్య వయస్సు గల వృద్ధులు ఒంటరిగా జీవిస్తే వారికి డయాబెటిస్ వచ్చే అవకాశం 34% ఎక్కువ.

కుటుంబం, స్నేహితులతో కలిసిమెలిసి జీవించే వారికి ఈ వ్యాధి వచ్చే అవకాశం తక్కువగా ఉందని పరిశోధకులు నిర్ధారించారు. నాలుగు వేల మంది వృద్ధులపై నిర్వహించిన ఈ అధ్యయనం ఒంటరితనం మరియు మధుమేహం మధ్య ఉన్న బలమైన అనుబంధాన్ని స్పష్టం చేసింది.