Lifestyle: ఎంత విశ్రాంతి తీసుకున్నా.. అలసటగా ఉంటుందా.? ఇవే కారణాలు..

Constant Fatigue: రోజువారీ పనులు, అధిక శ్రమ, పరుగులు పెట్టడం వల్ల అలసిపోవడం సహజమే. అయితే సరైన విశ్రాంతి తీసుకున్నా కూడా శరీరం బలహీనంగా అనిపిస్తే.. దీని వెనుక కొన్ని ఆరోగ్య సమస్యలు ఉండొచ్చు. నిపుణుల అభిప్రాయం ప్రకారం, అలసటకు ఒకే ఒక్క కారణం కాదు, వివిధ ఆరోగ్య, జీవనశైలి కారణాలు దీనికి దారితీస్తాయి. అలసటకు కారణమయ్యే ఆ కారణాలు ఏంటో ఇప్పుడు తెలుసుకుందాం..

పోషకాహార లోపం..

పోషకాలు సమతులంగా తీసుకోకపోతే, శరీరానికి అవసరమైన శక్తి అందదు. ముఖ్యంగా ఐరన్‌ లోపం వల్ల హిమోగ్లోబిన్ తగ్గిపోతుంది. దాంతో శరీరంలోని అవయవాలకు తగినంత ఆక్సిజన్ అందదు. ప్రపంచవ్యాప్తంగా దాదాపు 30% మంది ఇనుము లోపంతో బాధపడుతున్నారని నేషనల్ ఇన్స్టిట్యూట్ ఆఫ్ హెల్త్ నివేదిక చెబుతోంది. అలాగే విటమిన్ డి, బి12 లోపం కూడా శరీర శక్తిని తగ్గించి, అలసటను పెంచుతుంది.

మానసిక ఒత్తిడి, డిప్రెషన్..

దీర్ఘకాలిక ఒత్తిడి, ఆందోళన శరీర శక్తిని తగ్గిస్తాయి. అమెరికన్ సైకలాజికల్ అసోసియేషన్ ప్రకారం, ఎక్కువ ఒత్తిడి కార్టిసాల్ హార్మోన్ స్థాయిని పెంచి, నిద్రను ప్రభావితం చేస్తుంది. సరైన నిద్ర లేకపోతే మరింత అలసట పెరుగుతుంది.

రక్తహీనత, థైరాయిడ్ సమస్యలు..

శరీరంలో తగినంత ఎర్ర రక్తకణాలు ఉత్పత్తి కాకపోతే, ఆక్సిజన్ సరఫరా తగ్గి శక్తి తగ్గుతుంది. ఇది రక్తహీనతకు ప్రధాన కారణం. అదేవిధంగా, థైరాయిడ్ సమస్యలు శరీర చురుకుదనాన్ని తగ్గించి, అలసటకు దారితీస్తాయి.

ఇతర కారణాలు:

స్లీప్ అప్నియా: రాత్రి నిద్రలో పదే పదే శ్వాస ఆగిపోవడం వల్ల సరైన నిద్ర లేక, అలసటగా అనిపించవచ్చు.

ఆటోఇమ్యూన్ వ్యాధులు: లూపస్, మల్టిపుల్ స్క్లెరోసిస్, రుమటాయిడ్ ఆర్థరైటిస్ వంటి వ్యాధులలో రోగనిరోధక వ్యవస్థ ఆరోగ్యకరమైన కణాలపై దాడి చేయడం వల్ల శరీర శక్తి తగ్గిపోతుంది.

అధిక రక్త చక్కెర స్థాయిలు: షుగర్ లెవెల్స్ అసమతుల్యంగా ఉండటం వల్ల శరీరం శక్తిని సరిగ్గా ఉపయోగించుకోలేకపోతుంది. దీని వల్ల బలహీనత, అలసట ఏర్పడతాయి.

పరిష్కారం ఏంటంటే..

పోషకాహారాన్ని సమతులంగా తీసుకోవాలి. మానసిక ఒత్తిడిని తగ్గించుకునేందుకు యోగా, ధ్యానం లాంటి పద్ధతులను పాటించాలి. తగినంత నిద్ర పొందేలా ప్రయత్నించాలి. ఆరోగ్య సమస్యలు అనిపిస్తే, డాక్టర్‌ను సంప్రదించాలి. అలసట అనేది తక్కువగా కనిపించే సమస్యలా అనిపించినా, దీని వెనుక తీవ్రమైన ఆరోగ్య సమస్యలు ఉండొచ్చు. అందుకే దీన్ని నిర్లక్ష్యం చేయకుండా, సమయానికి సరైన చర్యలు తీసుకోవడం మంచిది.