పాస్‌వర్డ్ కారణంగా మూతపడ్డ 158 ఏళ్ల కంపెనీ.. రోడ్డున పడ్డ 700 మంది ఉద్యోగులు!

ఒకే ఒక్క వీక్ పాస్‌వర్డ్ కారణంగా 158 ఏళ్ల సుదీర్ఘ చరిత్ర కలిగిన కంపెనీ మూతపడింది. ఈ ఘటనతో 700 మంది ఉద్యోగులు ఉద్యోగాలు కోల్పోయి రోడ్డున పడ్డారు. ఒక ఉద్యోగి నిర్లక్ష్యంగా పెట్టిన బలహీనమైన పాస్‌వర్డ్ ద్వారా సైబర్ నేరగాళ్లు కంపెనీ సర్వర్లలోకి చొరబడి, సున్నితమైన డేటాను హ్యాక్ చేశారు. డబ్బు డిమాండ్ చేసినా, కంపెనీ చెల్లించలేకపోవడంతో ఆ డేటాను డిలీట్ చేయగా, సంస్థ చివరికి మూతపడాల్సి వచ్చింది.

బలహీనమైన పాస్‌వర్డ్‌ – భారీ నష్టం

సాధారణంగా ఫోన్, కంప్యూటర్ లేదా బ్యాంక్ అకౌంట్లకు పాస్‌వర్డ్‌ను బలంగా సెట్ చేయాలని సూచిస్తారు. కానీ సులభంగా ఊహించగలిగే పాస్‌వర్డ్ పెట్టడం వల్లే ఈ ఘోరం జరిగింది. ఒక చిన్న నిర్లక్ష్యం వందలాది మంది జీవితాలను అస్తవ్యస్తం చేసింది.

బ్రిటన్‌లో సైబర్ దాడి

ఈ సంఘటన బ్రిటన్‌లో చోటుచేసుకుంది. అక్కడి ప్రముఖ రవాణా సంస్థ కేఎన్‌పీ లాజిస్టిక్స్ (KNP Logistics) సైబర్ దాడికి గురై, కార్యకలాపాలను నిలిపివేసింది. ఈ కంపెనీకి 158 ఏళ్ల చరిత్ర ఉండగా, దాని కింద సుమారు 500 లారీలు సర్వీసులు అందిస్తున్నాయి. Knights of Old బ్రాండ్ కింద ప్రధానంగా ఈ సంస్థ కార్యకలాపాలు సాగించేది.

సైబర్ దాడి కారణంగా ఒక్కసారిగా మూతపడిన ఈ కంపెనీతో 700 మంది ఉద్యోగులు నిరుద్యోగులయ్యారు. దీని వల్ల వారి కుటుంబాలు ఆర్థికంగా తీవ్ర ఇబ్బందులు ఎదుర్కొంటున్నాయి.