China Population: జనాభా పెంచేందుకు భారీ ప్రోత్సాహకాలు ప్రకటించినా.. చైనాలో పడిపోతున్న జననాల రేటు

China Population: ఒకప్పుడు ‘ఒక బిడ్డ పాలసీ’తో జనాభా నియంత్రణలో కఠినంగా వ్యవహరించిన చైనా, ఇప్పుడు అదే జనాభా కొరతతో తడబాటుకు గురవుతోంది. గతంలో రెండో బిడ్డకు శిక్షలు, భారీ జరిమానాలు విధించిన చైనా ప్రభుత్వం, ఇప్పుడు యువత ఎక్కువ మంది పిల్లలను కనాలంటూ ప్రోత్సాహకాలు ప్రకటిస్తోంది. అయినప్పటికీ, జననాల రేటు మరింతగా పడిపోతుండటంతో ఆందోళన వ్యక్తమవుతోంది.

గత పాలసీ.. పెద్ద ఖర్చులు

ఒక బిడ్డ పాలసీ అమలులో ఉన్న కాలంలో, రెండో పిల్ల కోసం ఏకంగా రూ. 12 లక్షల వరకు జరిమానాలు విధించిన ఘటనలు ఉన్నాయి. అధికారుల పర్యవేక్షణలో బలవంతపు గర్భస్రావాలు, శస్త్రచికిత్సలు జరిపిన సందర్భాలు అరుదు కావు. అయితే ఇప్పుడు పరిస్థితి పూర్తిగా మారిపోయింది.

కేంద్ర ప్రోత్సాహకంతో కొత్త ఆశ

చైనా ప్రభుత్వం ఇప్పుడు 3 సంవత్సరాల లోపు ప్రతి బిడ్డకు ఏడాదికి 3,600 యువాన్లు (దాదాపు ₹44,000) ఇవ్వాలని నిర్ణయించింది. ఇది దేశవ్యాప్తంగా కేంద్ర ప్రభుత్వం నేరుగా ఇచ్చే మొదటి బాలల భత్య పథకం కావడం విశేషం. దీని కోసం బీజింగ్ 90 బిలియన్ యువాన్లు (₹లక్ష కోట్లకు పైగా) ఖర్చు చేయనుంది.

జననాలు మాత్రం పెరగట్లేదు

అయితే, నిపుణుల అభిప్రాయం ప్రకారం, ఈ చిన్న మొత్తపు సబ్సిడీతో ప్రజలు పిల్లలను కనాలనే నిర్ణయం తీసుకోరని అంటున్నారు. వాస్తవానికి దక్షిణ కొరియా, జపాన్‌లో ఇటువంటి ప్రోత్సాహకాలు విఫలమైన ఉదాహరణలు ఉన్నాయి. అధిక ఖర్చులు, ఉద్యోగ భద్రత లోపం, నివాస ఖర్చుల భారం వంటి అంశాలు యువతను కుటుంబ నిర్మాణం నుంచి వెనక్కి తొలగిస్తున్నాయి.

"ఈ డబ్బుతో బిడ్డల భవిష్యత్తు మారదు"

జేన్ లీ అనే యువతి, తన తల్లిదండ్రులు రెండో బిడ్డ కోసం జరిమానా కట్టిన అనుభవాన్ని గుర్తుచేసింది. ఇప్పుడు తనకు పిల్లలపై ఆసక్తి లేదని, తాను పెట్టుబడిదారు కాదని, పిల్లలకు మంచి జీవితం ఇవ్వలేను అనే భయమే ఎక్కువగా ఉందని చెప్పింది.

పాత రసీదులు షేర్ చేస్తూ ఆవేదన

చైనాలో ప్రస్తుతం సామాజిక మాధ్యమాల్లో ఓ నూతన ట్రెండ్ కొనసాగుతోంది. ఒక బిడ్డ పాలసీ సమయంలో తమ తల్లిదండ్రులు చెల్లించిన జరిమానాల పాత రసీదులను యువత షేర్ చేస్తూ, తమ అసంతృప్తిని వ్యక్తం చేస్తున్నారు.

జనాభా క్షీణత ఆగడంలేదు

2023లో 9 మిలియన్ల జననాలు, 11.1 మిలియన్ల మరణాలు నమోదయ్యాయి. ఇది చైనాలో జనాభా తక్కువైన ఏడవ సంవత్సరం. పీటర్సన్ ఇనిస్టిట్యూట్ ప్రకారం, ఇది "తిరిగి మార్చలేని మార్గంలో"కి వెళ్లిపోతోందని హెచ్చరిస్తోంది.

బిడ్డల పెంపక ఖర్చు భారీగా పెరిగిన పరిస్థితి

చైనాలో ఒక బిడ్డను పెద్దచేయడానికి సగటున రూ. 65 లక్షలు (5,38,000 యువాన్లు) అవసరమవుతుందని చెబుతున్నారు. దేశ సగటు ఆదాయానికి ఇది ఆరు రెట్లు ఎక్కువ. ముఖ్యంగా షాంఘై, బీజింగ్‌లలో ఇది కోటికి పైగా ఉండొచ్చని అంచనా.