US vs China: అమెరికా తిక్క కుదిరింది.. ముదురుతోన్న అగ్రరాజ్యాల యుద్ధం..!

US vs China: యునైటెడ్ స్టేట్స్‌ తో వాణిజ్య పోరులో చైనా మరింత దూకుడుగా అడుగులు వేస్తోంది. ఇప్పటికే 34 శాతం మేరగా ఉన్న అమెరికా ఉత్పత్తులపై టారిఫ్‌ను చైనా ఒక్కసారిగా 84 శాతానికి పెంచింది. ఇది డొనాల్డ్ ట్రంప్ సర్కారు ప్రకటించిన 104 శాతం దిగుమతి సుంకానికి సమాధానంగా తీసుకున్న చర్య. ఈ వాణిజ్య యుద్ధం గమనించిన వారు ఊహించిన దాని కంటే వేగంగా, తీవ్రమైన స్థాయికి చేరుకుందని చెప్పాలి.

టారిఫ్ పెంపుతో పాటు, చైనా మరో కీలక నిర్ణయం తీసుకుంది. అమెరికాకు చెందిన 12 కంపెనీలను ఎగుమతి నియంత్రణ జాబితాలోకి చేర్చగా, మరో 6 సంస్థలను 'నమ్మలేని యూనిట్లు'గా గుర్తించింది. వీటిపై చైనా లోపల ఎగుమతి, దిగుమతి కార్యకలాపాలు నిషేధించబడినట్టు ప్రకటించింది. ఇందులో అమెరికన్ ఫోటోనిక్స్, నోవోటెక్ వంటి సంస్థలు ఉన్నాయి. షీల్డ్ ఎఐ, సియెరా నెవాడా కార్పొరేషన్ వంటి కంపెనీలపై పెట్టుబడులపై నిషేధం కూడా అమల్లోకి వస్తోంది.

ఈ క్రమంలో ప్రపంచ వాణిజ్య సంస్థ (WTO) వద్ద అమెరికా చర్యలపై అధికారికంగా ఫిర్యాదు చేసిన చైనా, ఈ పరిస్థితిని 'అత్యంత ప్రమాదకరమైన స్థాయికి' చేరినదిగా అభివర్ణించింది. పరస్పర టారిఫ్‌లు వాణిజ్య అసమతుల్యాలకు పరిష్కారం కాదని, అవి తిరిగి తమకే ముప్పు తెచ్చే అవకాశం ఉందని హెచ్చరించింది.

ఇదిలా ఉండగా, అమెరికా అధ్యక్షుడు ట్రంప్ ప్రకటించిన 'రిసిప్రొకల్ టారిఫ్'లు బుధవారం నుంచి అమల్లోకి వచ్చాయి. దీంతో ప్రపంచ మార్కెట్లలో గందరగోళం మొదలైంది. చైనా మాత్రం ఈ చర్యలపై ఏ విధంగానూ వెనక్కి తగ్గే ఉద్దేశం లేదని, తుదివరకు పోరాడేందుకు తాము సిద్ధంగా ఉన్నామంటూ హైఅలర్ట్ లోకి వెళ్లిపోయింది. తాజా ఉద్వేగ భరిత వాతావరణంలో చైనా తన పర్యాటకుల కోసం అమెరికా పర్యటనలపై హెచ్చరికలు జారీ చేసింది. అమెరికాలో భద్రతా పరిస్థితులు కూడా మరింత సంక్షోభకరంగా మారుతున్నాయని పేర్కొంటూ అప్రమత్తంగా ఉండాలని పర్యాటక మంత్రిత్వ శాఖ విజ్ఞప్తి చేసింది.

అమెరికా ఎప్పటినుంచో చైనాతో భారీ వాణిజ్య లోటును ఎదుర్కొంటోంది. అమెరికా ప్రభుత్వ గణాంకాల ప్రకారం, 2024లో చైనా నుంచి దిగుమతులు 440 బిలియన్ డాలర్లకు చేరగా, అమెరికా నుంచి చైనాకు వెళ్లిన ఎగుమతులు కేవలం 145 బిలియన్ డాలర్లకే పరిమితమయ్యాయి. ఈ అసమతుల్యత ఆధారంగా ట్రంప్ ప్రభుత్వం ఈ విధంగా భారీ టారిఫ్‌లకు శ్రీకారం చుట్టింది. ఇప్పుడు ఈ పరిస్థితుల్లో ప్రపంచ వాణిజ్య వ్యవస్థ మొత్తానికీ ముప్పు పొంచి ఉన్నదని నిపుణులు హెచ్చరిస్తున్నారు. రెండు ఆర్థిక శక్తుల మధ్య జరుగుతున్న ఈ యుద్ధం, సాధారణ వినియోగదారులకు కూడా ప్రభావం చూపనుంది. ధరల పెరుగుదల, కంపెనీల మూసివేతలు, ఉద్యోగ నష్టాలు వంటి పరిణామాలు ఇకపై మరింత తీవ్రమవవచ్చు.