China: చైనాను వణికిస్తున్న మరో వ్యాధి...హాంకాంగ్ అప్రమత్తం

China: చైనాలో మరోసారి ప్రజలను భయాందోళనకు గురి చేస్తున్న కొత్త ఆరోగ్య ముప్పు కలకలం రేపుతోంది. కొవిడ్ మహమ్మారి చాపకింద నీరులా ప్రపంచాన్ని కుదిపేసిన తర్వాత, ఇప్పుడు అదే దేశంలో మరోసారి ప్రజారోగ్యం సంక్షోభంలోకి వెళ్తోందని ఆరోగ్యవేత్తలు హెచ్చరిస్తున్నారు. ఈసారి బాధ్యత చికున్ గున్యా వైరస్‌దని సమాచారం.

ఫోషాన్‌ హాట్‌స్పాట్‌గా మారిన పరిస్థితి

దక్షిణ చైనాలోని షెన్‌జెన్ ప్రాంతానికి సమీపంలోని ఫోషాన్ నగరం ప్రస్తుతం చికున్ గున్యా ప్రభావానికి కేంద్రబిందువుగా మారింది. స్థానిక ఆసుపత్రులన్నీ రోగులతో నిండిపోయినట్లు చెబుతున్నారు. ప్రత్యేకించి షుండే, నాన్‌హై జిల్లాల్లో కేసులు భారీగా పెరిగినట్లు ఆరోగ్య శాఖ తెలిపింది. శనివారం ఒక్కరోజే ప్రజలకు హెచ్చరికలు జారీ చేసి, పరిసరాలను శుభ్రంగా ఉంచాలని, దోమల వృద్ధిని అరికట్టాలని సూచించారు.

కేసుల గణాంకాలు

షుండే జిల్లా: జూలై 8న మొదటి కేసు నమోదు కాగా, ఇప్పటివరకు 1161 కేసులు నమోదయ్యాయి. ముఖ్యంగా బీజియావో, లెకాంగ్, చెన్‌కున్ పట్టణాల్లో కేసుల సంఖ్య అధికంగా ఉంది.

నాన్‌హై జిల్లా: ఇప్పటివరకు 16 కేసులు నమోదయ్యాయి.

చాంచెంగ్ జిల్లా: మొత్తం 22 కేసులు ఉన్నట్లు సమాచారం.

హాంకాంగ్ అప్రమత్తం

చికున్ గున్యా వైరస్ వ్యాప్తిపై హాంకాంగ్ ఆరోగ్య అధికారులు సైతం అప్రమత్తమయ్యారు. గతంలో హాంకాంగ్‌లో చివరిసారి 2019లో ఈ వ్యాధి వెలుగులోకి వచ్చింది. అప్పుడు 11 కేసులు, 2018లో 2, 2017లో ఒకటి, 2016లో 8 కేసులు నమోదు అయినట్లు అధికారులు గుర్తు చేస్తున్నారు.

వైద్య నిపుణుల హెచ్చరిక

చికున్ గున్యా వైరస్ డెంగ్యూ వైరస్ లానే దోమల ద్వారా వ్యాపిస్తుంది. ఇది మస్కిటో నియంత్రణతోనే నియంత్రించగల వ్యాధి అయినా, వేగంగా వ్యాపించే లక్షణం కలిగి ఉండటంతో జాగ్రత్త అవసరం. చైనాలో ఇప్పటికే వాతావరణ పరిస్థితులు దోమల పెరుగుదలకు అనుకూలంగా మారుతున్నాయని నిపుణులు హెచ్చరిస్తున్నారు.

ప్రభుత్వ సూచనలు

♦ ఇంటి ఆవరణలలో నిలువ ఉన్న నీటిని తొలగించాలి.

♦ శుభ్రత పాటించి దోమల వృద్ధిని అరికట్టాలి.

♦ ఆరోగ్య సమస్యలు కనిపించిన వెంటనే వైద్య సాయం తీసుకోవాలి.