విక్ట‌రీ వెంక‌టేశ్ చేతుల మీదుగా 'ఆటగదరా శివా' పాట..

'ప‌వ‌ర్‌', 'లింగా', 'బ‌జ‌రంగీ భాయీజాన్‌' వంటి భారీ చిత్రాల నిర్మాత రాక్‌లైన్ వెంక‌టేశ్ నిర్మిస్తోన్న లేటెస్ట్ మూవీ 'ఆట‌గ‌ద‌రా శివ‌'. రాక్‌లైన్ ఎంట‌ర్‌టైన్‌మెంట్స్ పతాకంపై రూపొందుతోన్న ఈ మూవీని 'ఆ న‌లుగురు', 'మ‌ధు మాసం', 'అంద‌రి బంధువ‌య‌' వంటి సెన్సిబుల్ మూవీస్ కు దర్శకత్వం వహించిన చంద్ర‌సిద్ధార్థ్ ఈ చిత్రాన్ని తెర‌కెక్కించారు. నూతన నటుడు ఉద‌య్ శంక‌ర్, కన్నడ నటుడు దొడ్డన్న ప్రధాన పాత్రల్లో నటించిన 'ఆటగదరా శివా' జూలై14న విడుదల కాబోతోంది.. ఈ సినిమాలోని రామ రామ రే.. అనే పాటను విక్ట‌రీ వెంక‌టేశ్ చేతుల మీదుగా విడుదల చేశారు. ఈ సందర్బంగా ఏర్పాటు చేసిన విలేకరుల సమావేశంలో వెంకటేష్ మాట్లాడుతూ.. 'ఈ సినిమా టైటిల్ చాలా బాగుంది. నా గుండెను తాకిన ఈ సినిమా మంచి విజయం సాధించాలని కోరుకుంటున్నా' అని అన్నారు. కాగా 'రామ రామ రామ రే...రామ రామ రామ రే' అంటూ సాగె ఈ పాటకు పులగం చిన్నారాయణ సాహిత్యం అందించగా, వాసుకీ వైభవ్‌ స్వరాలు సమకూర్చారు. సంగీత కత్తి, పూజ, ప్రణవ్‌, కార్తీక్‌, బృంద ఆలపించిన ఈ పాట ఇప్పటికే యూట్యూబ్ లో దూసుకెళుతోంది. కన్నడలో ఘన విజయం సాధించిన 'రామా రామారే' చిత్రానికి రీమేక్‌గా ఈ చిత్రాన్ని తెలుగులో రూపొందించారు చంద్రసిద్దార్ధ.