స్టార్ మహిళకు బ్రేక్..

మధ్యాహ్నం అయిందంటే చాలు టీవీలకు అతుక్కుపోతారు మహిళలు, స్టార్ మహిళ స్టార్ట్ అయిందంటే చాలు ఎక్కడున్నా టీవీ దగ్గర వాలిపోతరు కొందరు మహిళలు. అంతగా గుర్తింపు తెచ్చుకుంది ఆ ప్రోగ్రాం. ఈ షోకి వ్యాఖ్యాతగా వ్యవహరించిన యాంకర్ సుమకు లిమ్కా బుక్ ఆఫ్ రికార్డ్స్‌లో చోటు కూడా దక్కింది. అయితే మహిళలను నిరాశ పరుస్తూ సుమ ఫేస్‌బుక్ ద్వారా ఓ వార్త వెల్లడించారు 'ఈ ప్రపంచంలో ఏదీ శాశ్వతం కాదు. అదే విధంగా స్టార్ మహిళ ప్రయాణం కూడా త్వరలో ముగిసి పోతుంది. మరిన్ని సరికొత్త కార్యక్రమాలను ప్రేక్షకుల ముందుకు తీసుకువస్తున్న నేపథ్యంలో స్టార్ మహిళకు బ్రేక్ పలుకుతున్నాం. త్వరలో ఘనంగా ఫినాలే ఎపిసోడ్ ప్రసారం చేస్తున్నాం' అంటూ పోస్ట్ పెట్టింది. కాగా ఈ పోస్టులో స్టార్ మహిళ కార్యక్రమం అంటే ఎంతిష్టమో వివరిస్తూ ఓ సెల్ఫీ వీడియో తీసుకోండి. వాటిలో బెస్ట్ వీడియోలను ఎంపిక చేసి ఫినాలే ఎపిసోడ్‌లో ప్రసారం చేస్తాం అంటూ తన అభిమానులను కోరింది సుమ.