IRCTC: రైలులో ఇప్పుడు శుభ్రమైన, రుచికరమైన భోజనం... IRCTC కొత్త సర్వీస్ షురూ!

IRCTC: రైలు ప్రయాణికులకు ఇండియన్ రైల్వే క్యాటరింగ్ అండ్ టూరిజం కార్పొరేషన్ (IRCTC) ఒక శుభవార్త చెప్పింది. మెయిల్, ఎక్స్‌ప్రెస్ రైళ్లలో ప్రయాణించే వారికి సరికొత్త, అద్భుతమైన సర్వీసును ప్రారంభించింది. ఈ ఈ-ప్యాంట్రీ సేవ ద్వారా ఇప్పుడు ప్రయాణికులకు తమ రైలు సీటులోనే శుభ్రమైన, రుచికరమైన భోజనాన్ని తక్కువ ధరతో సకాలంలో అందుకోవచ్చు. గతంలో కేవలం ప్రీమియం రైళ్లలో మాత్రమే ఆన్‌లైన్ భోజన బుకింగ్ సౌకర్యం ఉండేది. ఇప్పుడు ఇదే సేవను మెయిల్, ఎక్స్‌ప్రెస్ రైళ్లలో కూడా ప్రారంభించారు. ప్రయాణంలో అధిక ఛార్జీలు, అనధికార విక్రేతలు, నాసిరకం ఆహారం గురించి తరచుగా ఫిర్యాదు చేసే వారికి ఇది చాలా ప్రయోజనకరంగా ఉంటుంది.

ఈ-ప్యాంట్రీ అంటే ఏమిటి?

ఈ-ప్యాంట్రీ అనేది IRCTC ప్రారంభించిన ఒక డిజిటల్ మీల్ బుకింగ్ సదుపాయం. ఇది మెయిల్/ఎక్స్‌ప్రెస్ రైళ్లలో ప్రయాణికులకు వారి సీటు వద్దే భోజనం అందిస్తుంది. కన్ఫర్మ్డ్, RAC లేదా పాక్షికంగా కన్ఫర్మ్ అయిన టికెట్ ఉన్న ప్రయాణికులు ఈ సేవను పొందవచ్చు. ప్యాంట్రీ కార్ అందుబాటులో ఉన్న రైళ్లలో ఈ సేవ వర్తిస్తుంది.

ఈ సేవను ఎలా ఉపయోగించాలి?

టికెట్ బుక్ చేసే సమయంలో లేదా ఆ తర్వాత 'బుక్డ్ టికెట్ హిస్టరీ' విభాగంలోకి వెళ్లి 'ఈ-ప్యాంట్రీ' ఆప్షన్‌ను ఎంచుకోవచ్చు. బుకింగ్ పూర్తయిన తర్వాత, మీకు SMS లేదా ఇమెయిల్ ద్వారా ఒక 'మీల్ వెరిఫికేషన్ కోడ్' (MVC) లభిస్తుంది. ప్రయాణం రోజున, ఈ MVC కోడ్‌ను చూపించి మీ సీటు వద్దే ఆహారాన్ని పొందవచ్చు.

ఈ-ప్యాంట్రీ సేవా ముఖ్య లక్షణాలు

* ఆన్‌లైన్ ఫుడ్ బుకింగ్: మీరు వెబ్‌సైట్ ద్వారా స్టాండర్డ్ మీల్ లేదా రైల్ నీర్ (Rail Neer)ను ప్రీ-బుక్ చేసుకోవచ్చు.

* డిజిటల్ పేమెంట్స్ : నగదు అవసరం లేకుండా డిజిటల్ పద్ధతిలో చెల్లింపు చేయవచ్చు.

* నిర్దిష్ట ధర: భోజనం నిర్దిష్ట ధరకు లభిస్తుంది, అధిక ఛార్జీలు ఉండవు.

* IRCTC లైసెన్స్ పొందిన విక్రేతలు: కేవలం IRCTC లైసెన్స్ పొందిన విక్రేతలు మాత్రమే ఆహారాన్ని అందిస్తారు.

* MVC కోడ్‌తో ఖచ్చితత్వం: MVC కోడ్ ద్వారా సరైన ప్రయాణికుడికి ఆహారం డెలివరీ అవుతుంది.

* డిజిటల్ పర్యవేక్షణ: ప్రతి ఆర్డర్‌పై డిజిటల్ పర్యవేక్షణ ఉంటుంది. పన్ను నిబంధనలకు అనుగుణంగా ఉంటుంది.

* రీఫండ్ సౌకర్యం: ఒకవేళ ఆహారం డెలివరీ కాకపోతే రీఫండ్ లభిస్తుంది. ఈ సమాచారం SMS/Email/WhatsApp ద్వారా తెలియజేస్తారు.

భవిష్యత్ ప్రణాళిక

ఈ సేవను భారతదేశంలో అత్యంత ఎక్కువ దూరం ప్రయాణించే రైలు అయిన వివేక్ ఎక్స్‌ప్రెస్ (22503/04) తో ప్రారంభించారు. రాబోయే 60 రోజుల్లో దీనిని మరో 25 రైళ్లలో (100 రెక్స్‌లో) అమలు చేయనున్నారు. ఈ పైలట్ ప్రాజెక్ట్ విజయవంతమైన తర్వాత, దేశవ్యాప్తంగా ఇతర మెయిల్/ఎక్స్‌ప్రెస్ రైళ్లలో కూడా ఈ సేవను ప్రారంభించాలని IRCTC యోచిస్తోంది. ఇది రైలు ప్రయాణికులకు ఆహారం విషయంలో ఎదురయ్యే చాలా సమస్యలకు పరిష్కారం చూపుతుందని ఆశిస్తున్నారు.