Congress: తెలంగాణ కాంగ్రెస్‌కు కొత్త ఇన్‌ఛార్జి.. మీనాక్షి స్థానంలో సందీప్‌ కుమార్‌
తెలంగాణ కాంగ్రెస్‌ వ్యవహారాల కొత్త ఇన్‌ఛార్జిగా బీఎం సందీప్‌ కుమార్‌ను ఏఐసీసీ నియమించింది. ఇప్పటివరకు బాధ్యతలు చూసిన మీనాక్షి నటరాజన్‌ స్థానంలో ఆయనకు అవకాశం కల్పించింది.
BM Sandeep Kumar
Congress: తెలంగాణ కాంగ్రెస్‌లో కీలక సంస్థాగత మార్పు చోటుచేసుకుంది. రాష్ట్ర కాంగ్రెస్‌ వ్యవహారాల ఇన్‌ఛార్జిగా కర్ణాటకకు చెందిన బీఎం సందీప్‌ కుమార్‌ను ఏఐసీసీ నియమించింది. ఇప్పటివరకు ఈ బాధ్యతలు నిర్వహించిన మీనాక్షి నటరాజన్‌ స్థానంలో ఆయనకు అవకాశం కల్పించింది. ఈ నియామకం తక్షణమే అమల్లోకి వస్తుందని కాంగ్రెస్‌ అధిష్ఠానం స్పష్టం చేసింది. ఏఐసీసీ ప్రధాన కార్యదర్శి కేసీ వేణుగోపాల్‌ శనివారం ఈ మేరకు ప్రకటన విడుదల చేశారు. పార్టీ అధ్యక్షుడు మల్లికార్జున ఖర్గే ఈ నియామకాన్ని ఆమోదించారు.
మీనాక్షి స్థానంలో సందీప్‌కు బాధ్యతలు
తెలంగాణ కాంగ్రెస్‌ ఇన్‌ఛార్జిగా మీనాక్షి నటరాజన్‌ 2025 ఫిబ్రవరి 14న బాధ్యతలు చేపట్టారు. అంతకుముందు ఈ పదవిలో దీపాదాస్‌ మున్షీ ఉన్నారు. అయితే ఉన్నత చదువుల కోసం మీనాక్షి లండన్‌ వెళ్లడంతో ఆమె స్థానంలో కొత్త నేతను నియమించనున్నట్లు కొంతకాలంగా ప్రచారం జరిగింది. క్లైమేట్‌ ఛేంజ్‌, సస్టెయినబుల్‌ పాలసీ అంశాలపై యూనివర్సిటీ కాలేజ్‌ లండన్‌లో కోర్సు చేసేందుకు ఆమె వెళ్లినట్లు వార్తలు వచ్చాయి. తాజాగా సందీప్‌ కుమార్‌ నియామకంతో ఈ ప్రచారానికి తెరపడింది. అయితే మీనాక్షి స్థానంలో మార్పునకు గల కారణాన్ని ఏఐసీసీ అధికారిక ప్రకటనలో ప్రత్యేకంగా వెల్లడించలేదు.
ఎవరీ బీఎం సందీప్‌ కుమార్‌?
బీఎం సందీప్‌ కుమార్‌ కర్ణాటకలోని చిక్కమగళూరుకు చెందిన నేత. కాంగ్రెస్‌ పార్టీలో జాతీయ స్థాయిలో సంస్థాగత బాధ్యతలు నిర్వహించిన అనుభవం ఆయనకు ఉంది. గతంలో ఏఐసీసీ కార్యదర్శిగా పనిచేశారు. మహారాష్ట్ర, గుజరాత్‌ రాష్ట్రాల్లో పార్టీ వ్యవహారాలను పర్యవేక్షించారు. రాజీవ్‌గాంధీ పంచాయతీరాజ్‌ సంఘటన్‌ కర్ణాటక విభాగం ఛైర్మన్‌గా, జాతీయ కన్వీనర్‌గా కూడా బాధ్యతలు నిర్వహించినట్లు పార్టీ వర్గాలు తెలిపాయి. ఈ అనుభవంతో ఇప్పుడు తెలంగాణ కాంగ్రెస్‌ వ్యవహారాలను ఆయన పర్యవేక్షించనున్నారు.
తెలంగాణ కాంగ్రెస్‌లో ఇప్పటివరకు నలుగురు ఇన్‌ఛార్జిలు
తెలంగాణ రాష్ట్రంలో కాంగ్రెస్‌ పార్టీ వ్యవహారాల కోసం గతంలో పలువురు నేతలు ఇన్‌ఛార్జిలుగా పనిచేశారు. 2023 జనవరి నుంచి అదే ఏడాది డిసెంబర్‌ వరకు మహారాష్ట్రకు చెందిన మాణిక్‌రావ్‌ ఠాక్రే ఈ బాధ్యతలు నిర్వహించారు. ఆ తర్వాత పశ్చిమ బెంగాల్‌కు చెందిన దీపాదాస్‌ మున్షీకి అవకాశం దక్కింది. 2025 ఫిబ్రవరిలో మీనాక్షి నటరాజన్‌ బాధ్యతలు చేపట్టారు. తాజాగా బీఎం సందీప్‌ కుమార్‌ నాలుగో ఇన్‌ఛార్జిగా నియమితులయ్యారు. దీంతో రాష్ట్ర కాంగ్రెస్‌ వ్యవహారాలను కొత్త నేత పర్యవేక్షించనున్నారు.
కొత్త ఇన్‌ఛార్జి ముందున్న కీలక బాధ్యతలు
తెలంగాణలో అధికారంలో ఉన్న కాంగ్రెస్‌ పార్టీకి ప్రభుత్వంతో పాటు పార్టీ సంస్థాగత వ్యవహారాలను సమన్వయం చేయడం కీలకం. క్షేత్రస్థాయిలో కార్యకర్తలతో సంబంధాలు కొనసాగించడం, పార్టీ కమిటీల పనితీరును పర్యవేక్షించడం, రాష్ట్ర నాయకుల మధ్య సమన్వయం వంటి అంశాలు కొత్త ఇన్‌ఛార్జి బాధ్యతల్లో భాగంగా ఉండనున్నాయి. మరోవైపు పీసీసీ అధ్యక్షుడు మహేశ్‌కుమార్‌ గౌడ్‌ సందీప్‌ నియామకంపై హర్షం వ్యక్తం చేశారు. ఆయన నేతృత్వంలో రాష్ట్రంలో పార్టీ మరింత బలోపేతం అవుతుందని ఆశాభావం వ్యక్తం చేశారు. గతంలో మీనాక్షి నటరాజన్‌ పార్టీ బలోపేతానికి చేసిన కృషిని కూడా ప్రశంసించారు.