Nokia 100 2026: నొకియా ఫ్యాన్స్‌కు పండగే.. అదిరిపోయే లుక్, భారీ బ్యాటరీతో రీ-ఎంట్రీ ఇస్తున్న 'నొకియా 100'

Nokia 100 2026: స్మార్ట్‌ఫోన్ల జమానాలో ఫీచర్ ఫోన్లకు ఇంకా విపరీతమైన క్రేజ్ ఉందంటే దానికి ప్రధాన కారణం నొకియా బ్రాండ్. మన పాత జ్ఞాపకాలను మళ్లీ గుర్తుచేస్తూ, క్లాసిక్ డిజైన్‌కు ఆధునిక హంగులు అద్ది 'నొకియా 100 (2026)' మోడల్‌ను త్వరలో మార్కెట్లోకి తీసుకురాబోతోంది. ఆన్‌లైన్‌లో లీకైన దీని అదిరిపోయే ఫీచర్లు, కొత్త డిజైన్ ఇప్పుడు టెక్ వర్గాల్లో హాట్ టాపిక్‌గా మారాయి.

మాట్లాడుకోవడానికి, కేవలం మెసేజ్‌లు పంపుకోవడానికి మాత్రమే మొబైల్ వాడే రోజుల్లో నొకియా సృష్టించిన సంచలనం అంతా ఇంతా కాదు. ఆ కీప్యాడ్ ఫోన్లతో అప్పట్లో యువత చేసిన టైపింగ్ స్పీడ్, కింద పడినా పగలని ఆ ఫోన్ల దృఢత్వం ఇప్పటికీ టెక్ ప్రియులకు మధుర జ్ఞాపకమే. సరిగ్గా ఇలాంటి నాస్టాల్జియా ఫీలింగ్‌ను మళ్లీ వినియోగదారులకు అందించేందుకు సంస్థ సన్నద్ధమవుతోంది. మార్కెట్లో ఎన్ని రకాల ఖరీదైన స్మార్ట్‌ఫోన్లు అందుబాటులో ఉన్నా, చేతిలో ఒక బేసిక్ సెకండరీ డివైజ్ ఉండటం చాలామందికి అవసరం. ఆ లోటును భర్తీ చేసేందుకే కస్టమర్ల అభిరుచికి తగ్గట్టుగా తమ బేసిక్ మోడల్స్ లైనప్‌ను అప్‌డేట్ చేసే పనిలో హెచ్ఎండీ (HMD) గ్లోబల్ సంస్థ బిజీగా ఉంది.

ఆకట్టుకునే సరికొత్త డిజైన్..

గతంలో వచ్చిన బేసిక్ మోడల్స్‌తో పోలిస్తే ఈ కొత్త నొకియా 100 డిజైన్‌లో చాలా మార్పులు చేసినట్లు సోషల్ మీడియాలో లీకైన రెండర్ ఇమేజెస్ బట్టి స్పష్టంగా తెలుస్తోంది. ఫోన్ అంచులు గుండ్రంగా ఉండి, చేతిలో పట్టుకోవడానికి చాలా కంఫర్ట్‌గా ఉండేలా బాడీని తీర్చిదిద్దారు. స్క్రీన్ కింద సరిగ్గా మధ్యలో నావిగేషన్ కీ, దాని కింద పాత స్టైల్ న్యూమరిక్ కీప్యాడ్ అందించారు. స్క్రీన్ పైన పాత సాంప్రదాయం ప్రకారం నొకియా బ్రాండింగ్ ఉంచారు. వెనుక వైపు చూస్తే హెచ్ఎండీ బ్రాండింగ్‌తో పాటు ఒక స్పీకర్ గ్రిల్ ఏర్పాటు చేశారు.

కెమెరా చేరిక.. స్టోరేజ్ పెంపు..

ఇదొక బేసిక్ ఎంట్రీ లెవల్ ఫోన్ అయినప్పటికీ ఇందులో వెనుక వైపు ఒక వీజీఏ (VGA) కెమెరాను అందించడం విశేషం. చిన్న చిన్న ఫోటోలు తీసుకోవడానికి బేసిక్ ఫోన్లలో కెమెరా కోరుకునే వారికి ఇదొక ప్లస్ పాయింట్. ఇక స్పెసిఫికేషన్ల విషయానికొస్తే.. ఇందులో 1.8 అంగుళాల ఎల్‌సీడీ (LCD) స్క్రీన్‌ను అమర్చారు. ఇది ఎస్30+ (S30+) ఆపరేటింగ్ సిస్టమ్‌పై పనిచేస్తుంది. ఫోన్ పనితీరును మెరుగుపరచడానికి ఇందులో యూనిసోక్ (Unisoc SC6531E) ప్రాసెసర్‌ను ఉపయోగించారు. పాటలు వినడానికి, ఫోటోలు దాచుకోవడానికి వీలుగా మైక్రో ఎస్‌డీ కార్డ్ ద్వారా ఏకంగా 32 జీబీల వరకు మెమరీ స్టోరేజ్ పెంచుకునే అద్భుతమైన సదుపాయం కల్పించారు.

బ్యాటరీ అప్‌గ్రేడ్.. కనెక్టివిటీ ఫీచర్లు..

పాత నొకియా 100 మోడల్‌లో కేవలం 800 ఎంఏహెచ్ బ్యాటరీ ఉండగా, ఈ కొత్త 2026 వెర్షన్‌లో దాని సామర్థ్యాన్ని 1,020 ఎంఏహెచ్‌కు అమాంతం పెంచారు. దీనివల్ల ఒక్కసారి ఫుల్ ఛార్జింగ్ పెడితే రోజుల తరబడి నాన్‌స్టాప్‌గా బ్యాటరీ బ్యాకప్ వస్తుంది. ఛార్జింగ్ కోసం రెగ్యులర్ మైక్రో యూఎస్‌బీ (Micro USB) పోర్ట్ ఇచ్చారు. ఇక కనెక్టివిటీ పరంగా చూస్తే 2జీ నెట్‌వర్క్, బ్లూటూత్ 4.2 సపోర్ట్, ఎఫ్ఎమ్ రేడియో, 3.5 ఎంఎమ్ హెడ్‌ఫోన్ జాక్ లాంటి రెగ్యులర్ బేసిక్ ఫీచర్లన్నీ ఇందులో పొందుపరిచారు.

దుమ్ము, నీటి తుంపర్ల నుంచి రక్షణ.. స్నేక్ గేమ్..

మనం బేసిక్ ఫోన్లను కాస్త రఫ్‌గా వాడుతుంటాం. జేబులో పెట్టుకుని ఎక్కడిపడితే అక్కడికి తిరుగుతుంటాం. అందుకే ఈ ఫోన్‌కు ఏకంగా ఐపీ54 (IP54) రేటింగ్ ఇచ్చారు. దీనివల్ల వాతావరణంలోని దుమ్ము, అడపాదడపా పడే నీటి తుంపర్ల నుంచి ఫోన్‌కు ఎలాంటి ప్రమాదం ఉండదు. చీకట్లో దారి వెతుక్కోవడానికి పైన ఒక టార్చ్‌లైట్ కూడా అమర్చారు. ఇక నొకియా అనగానే మనందరికీ టక్కున గుర్తొచ్చే పాపులర్ 'స్నేక్ గేమ్' (Snake game) ఇందులో ఇన్‌బిల్ట్‌గా రావడం మరో విశేషం. బ్లాక్, సియాన్, పర్పుల్ లాంటి మూడు ఆకర్షణీయమైన రంగుల్లో ఈ డివైజ్ మార్కెట్లో సందడి చేయనుంది.

సాధారణ కాలింగ్ అవసరాల కోసం, ఒక నమ్మకమైన బ్యాకప్ ఫోన్‌గా వాడుకోవడానికి కొత్త నొకియా 100 (2026) అద్భుతమైన ఎంపికగా మారనుంది. దీని అధికారిక లాంచ్ తేదీ, మార్కెట్ ధర వివరాలు అతి త్వరలోనే వెల్లడయ్యే అవకాశం ఉంది.