Malikipuram: మరణంలోనూ వీడని అనుబంధం.. భర్త చితి ముందే కన్నుమూసిన భార్య!

మలికిపురం: డాక్టర్ బి. ఆర్. అంబేడ్కర్ కోనసీమ జిల్లా మలికిపురం మండలం విశ్వేశ్వరాయపురం గ్రామంలో చోటుచేసుకున్న ఈ విషాద ఘటన ప్రతి ఒక్కరి హృదయాన్ని కలచివేస్తోంది. జీవితాంతం ఒకరికొకరు అండగా, తోడుగా, సుఖదుఃఖాల్లో భాగస్వాములుగా నిలిచిన ఓ వృద్ధ దంపతులు మరణంలోనూ ఒకరిని ఒకరు విడిచి ఉండలేకపోయారు. వారి అనుబంధం చివరికి మృత్యువును సైతం దాటి, ఒకే రోజున చివరి ప్రయాణానికి తీసుకెళ్లింది.

గ్రామానికి చెందిన కానేటి తాతారావు (87), ఝాన్సీలక్ష్మి (75) దంపతులు అందరికీ ఆదర్శప్రాయమైన జీవితాన్ని గడిపారు. ఉద్యోగరీత్యా ఎన్నో సంవత్సరాలు అండమాన్‌లో నివసించిన వీరు పదవీ విరమణ అనంతరం స్వగ్రామానికి చేరుకుని ప్రశాంత జీవనం సాగించారు. వృద్ధాప్యంలోనూ ఒకరిపై మరొకరు అపారమైన ప్రేమ, ఆప్యాయతతో జీవిస్తూ అందరి మన్ననలు పొందారు.

అయితే విధి వక్రించి ఈ నెల 24న తాతారావు అనారోగ్యంతో కన్నుమూశారు. అండమాన్‌లో నివసిస్తున్న కుమారుడు చేరుకునే వరకు ఆయన భౌతికకాయాన్ని ఫ్రీజర్‌లో భద్రపరిచారు. తండ్రి అంతిమ వీడ్కోలు కోసం కుమారుడు స్వగ్రామానికి చేరుకున్న అనంతరం అంత్యక్రియలకు ఏర్పాట్లు చేశారు.

అయితే భర్తకు చివరి వీడ్కోలు పలకాల్సిన ఆ క్షణాల్లోనే ఊహించని విషాదం చోటుచేసుకుంది. జీవిత భాగస్వామిని కోల్పోయిన వేదనను తట్టుకోలేకపోయిందో, లేక జీవితాంతం తోడుగా ఉన్న వ్యక్తి దూరమవుతున్నాడనే బాధను భరించలేకపోయిందో తెలియదు గానీ, తాతారావు అంత్యక్రియలు ప్రారంభం కావడానికి కొద్దిసేపటి ముందే ఝాన్సీలక్ష్మి ఒక్కసారిగా కుప్పకూలి ప్రాణాలు విడిచారు.

ఈ సంఘటనతో అక్కడున్న వారంతా ఒక్కసారిగా దిగ్భ్రాంతికి గురయ్యారు. క్షణాల వ్యవధిలోనే ఒకే కుటుంబంలో రెండు మరణాలు సంభవించడంతో బంధువులు, గ్రామస్తులు కన్నీటి సంద్రంలో మునిగిపోయారు. జీవితమంతా కలిసే గడిపిన ఈ దంపతులు మరణంలోనూ ఒకరిని ఒకరు విడిచిపెట్టలేదని, వారి అనుబంధం ఎంత గొప్పదో ఈ ఘటన నిరూపించిందని స్థానికులు భావోద్వేగంతో పేర్కొన్నారు.

"ఒకరి కోసం మరొకరు జీవించారు... ఒకరి లేని లోకాన్ని మరొకరు ఊహించుకోలేకపోయారు... చివరకు ఒకే దారిలో కలిసి వెళ్లిపోయారు" అంటూ గ్రామస్తులు కన్నీటి పర్యంతమయ్యారు.

వారి కోరిక మేరకు రాజోలు కైలాస భూమిలో హిందూ సంప్రదాయాల ప్రకారం ఇద్దరి అంత్యక్రియలను నిర్వహించారు. ఒకే చితిలో కలిసిపోయిన వారి జీవిత గాథ గ్రామస్తుల హృదయాల్లో శాశ్వత జ్ఞాపకంగా నిలిచిపోనుంది.

జీవితంలో విడదీయరాని బంధంగా నిలిచిన ఈ దంపతులు... మరణంలోనూ ఒకరిని ఒకరు వీడని ప్రేమకు ప్రతీకగా నిలిచారు.