యాంటీబయోటిక్స్ అతిగా వాడితే మందులే పనిచేయకపోవచ్చు.. అధ్యయనంలో హెచ్చరిక

ప్రపంచవ్యాప్తంగా యాంటీబయోటిక్ మందుల అధిక వినియోగం యాంటీమైక్రోబియల్ రెసిస్టెన్స్ (AMR) సంక్షోభాన్ని మరింత తీవ్రతరం చేస్తోందని తాజా అధ్యయనం హెచ్చరించింది. ముఖ్యంగా 'వాచ్ (Watch)' కేటగిరీకి చెందిన శక్తివంతమైన యాంటీబయోటిక్స్‌ను అవసరానికి మించి వాడటం వల్ల ఔషధ నిరోధకత వేగంగా పెరుగుతోందని పరిశోధకులు వెల్లడించారు.

ది లాన్సెట్ పబ్లిక్ హెల్త్ జర్నల్‌లో ప్రచురితమైన ఈ అధ్యయనాన్ని యూకేలోని యూనివర్సిటీ ఆఫ్ లండన్కు చెందిన శాస్త్రవేత్తలు నిర్వహించారు. ఏ దేశంలో ఏ రకమైన యాంటీబయోటిక్స్ ఎంత మేరకు వినియోగించాలి అనే దానిపై ఒక ప్రత్యేక అంచనా విధానాన్ని రూపొందించారు.

పరిశోధనలో దాదాపు అన్ని దేశాలు 'వాచ్' కేటగిరీ యాంటీబయోటిక్స్‌ను అధికంగా వినియోగిస్తున్నట్లు తేలింది. సాధారణ యాంటీబయోటిక్స్ పనిచేయని తీవ్రమైన ఇన్ఫెక్షన్లకు మాత్రమే ఈ మందులను ఉపయోగించాలని నిపుణులు సూచిస్తున్నారు. అవసరం లేకుండా వీటిని వాడితే యాంటీబయోటిక్ రెసిస్టెన్స్ మరింత పెరిగే ప్రమాదం ఉందని హెచ్చరిస్తున్నారు.

ప్రపంచ ఆరోగ్య సంస్థ (WHO) యాంటీబయోటిక్స్‌ను యాక్సెస్ (Access), వాచ్ (Watch), రిజర్వ్ (Reserve) అనే మూడు విభాగాలుగా వర్గీకరించింది. ఇందులో యాక్సెస్ గ్రూప్‌కు చెందిన అమోక్సిసిలిన్ వంటి మందులు సాధారణ ఇన్ఫెక్షన్లకు తొలి చికిత్సగా ఉపయోగిస్తారు. వాచ్ గ్రూప్ మందులు అవసరమైన సందర్భాల్లో మాత్రమే వాడాలి. ఇక రిజర్వ్ గ్రూప్ మందులు ఇతర చికిత్సలు ఫలించని అత్యంత ప్రమాదకరమైన ఔషధ నిరోధక ఇన్ఫెక్షన్లకు చివరి ప్రత్యామ్నాయంగా వినియోగిస్తారు.

2024లో ఐక్యరాజ్యసమితి సాధారణ సభలో ప్రపంచవ్యాప్తంగా యాంటీబయోటిక్ వినియోగాన్ని WHO రూపొందించిన AWaRe విధానం ఆధారంగా పర్యవేక్షించాలని నిర్ణయించారు. అలాగే 2030 నాటికి ప్రపంచవ్యాప్తంగా కనీసం 70 శాతం యాంటీబయోటిక్ వినియోగం 'యాక్సెస్' గ్రూప్ మందుల నుంచే ఉండేలా లక్ష్యాన్ని నిర్దేశించారు.

పరిశోధకుల అభిప్రాయం ప్రకారం, ఈ కొత్త అంచనా విధానం ద్వారా దేశాలు యాంటీబయోటిక్స్‌ను సరైన విధంగా వినియోగిస్తున్నాయా లేదా అనేది సులభంగా అంచనా వేసి, ఔషధ నిరోధకతను తగ్గించే చర్యలు తీసుకునే అవకాశం ఉంటుంది.