Bhadrachalam: శరత్ బాబు హత్య నిందితులను కఠినంగా శిక్షించాలి
Bhadrachalam: భద్రాచలంలో తెల్లం శరత్ బాబును హత్య చేసిన దుండగులను వెంటనే అరెస్టు చేసి, హత్యల సంస్కృతికి అడ్డుకట్ట వేయాలని సీపీఎం నేత గడ్డం స్వామి డిమాండ్ చేశారు.
Bhadrachalam: శరత్ బాబు హత్య నిందితులను కఠినంగా శిక్షించాలి
భద్రాచలం: భద్రాచలంలో తెల్లం శరత్ బాబును హత్య చేసిన దుండగులను తక్షణమే అరెస్టు చేసి, కఠినంగా శిక్షించాలని సీపీఎం పట్టణ కార్యదర్శి గడ్డం స్వామి డిమాండ్ చేశారు. ప్రముఖ పుణ్యక్షేత్రం శ్రీరాముని దేవస్థానం ఉన్న భద్రాచలం వంటి ప్రశాంతమైన ప్రాంతంలో వరుసగా హత్యలు, నేరాలు చోటుచేసుకోవడం ఆందోళనకరమని, ప్రజల ప్రాణాలకు రక్షణ లేకుండా పోతోందని ఆవేదన వ్యక్తం చేశారు.
ఆదివాసీ జేఏసీ ఆధ్వర్యంలో నిర్వహించిన రౌండ్ టేబుల్ సమావేశంలో ఆయన మాట్లాడుతూ, భద్రాచలంలో శాంతిభద్రతలను కాపాడాల్సిన బాధ్యత ప్రభుత్వంపై, పోలీసు యంత్రాంగంపై ఉందని అన్నారు. నేరాలను అరికట్టడంలో ప్రభుత్వం, పోలీసు అధికారుల నిర్లక్ష్యం, వైఫల్యం కారణంగానే ఇటువంటి దారుణ ఘటనలు జరుగుతున్నాయని విమర్శించారు.
హత్యలకు పాల్పడుతున్న నేరస్థుల పట్ల ఎలాంటి ఉపేక్ష చూపకుండా కఠిన చర్యలు తీసుకోవాలని, హత్య వెనుక ఉన్న అన్ని కోణాల్లో సమగ్ర విచారణ జరిపి బాధ్యులందరినీ చట్టం ముందు నిలబెట్టాలని కోరారు. భవిష్యత్తులో ఇలాంటి ఘటనలు పునరావృతం కాకుండా పోలీసు నిఘా వ్యవస్థను బలోపేతం చేయాలని, ప్రజలకు భద్రత కల్పించేలా ప్రత్యేక చర్యలు చేపట్టాలని డిమాండ్ చేశారు.
భద్రాచలంలో హత్యలు, దాడులు, అసాంఘిక కార్యకలాపాలకు అడ్డుకట్ట వేసి, ప్రజలు ప్రశాంతంగా జీవించే పరిస్థితులు కల్పించాలి. ప్రజాసంఘాలు, ఆదివాసీ సంఘాలు, రాజకీయ పార్టీలు ఐక్యంగా నిలబడి హత్యల సంస్కృతికి వ్యతిరేకంగా ఉద్యమించాలని గడ్డం స్వామి పిలుపునిచ్చారు.