SpaceX: అంతరిక్షం నుంచి వచ్చిన రాకెట్‌ను గాల్లోనే పట్టేశారు.. స్పేస్‌ఎక్స్ చరిత్రాత్మక విజయం

SpaceX: అంతరిక్ష ప్రయోగాల్లో ఎలాన్ మస్క్‌కు చెందిన స్పేస్‌ఎక్స్ మరో కీలక విజయాన్ని అందుకుంది. భూమి చుట్టూ 14 సార్లు తిరిగి, 22 గంటలకు పైగా అంతరిక్షంలో గడిపిన స్టార్‌షిప్‌ను తిరిగి భూమికి తీసుకొచ్చి.. నేలపై దిగకముందే గాల్లో పట్టుకున్నారు. అమెరికాలోని టెక్సాస్‌లో ఉన్న ప్రయోగ కేంద్రం వద్ద భారీ యాంత్రిక చేతులతో ఈ రాకెట్ పైభాగాన్ని విజయవంతంగా అందుకున్నారు. అంతరిక్షం నుంచి తిరిగొచ్చిన స్టార్‌షిప్‌ను ఇలా పట్టుకోవడం ఇదే తొలిసారి. పూర్తిగా తిరిగి ఉపయోగించగల రాకెట్‌ను తయారు చేయాలన్న స్పేస్‌ఎక్స్ లక్ష్యంలో ఇది కీలక ముందడుగు.

భూమి చుట్టూ 14 సార్లు చక్కర్లు

నవంబర్ 13న టెక్సాస్‌లోని స్పేస్‌ఎక్స్ స్టార్‌బేస్ కేంద్రం నుంచి స్టార్‌షిప్ 15వ పరీక్షా ప్రయోగాన్ని చేపట్టారు. సుమారు 407 అడుగుల ఎత్తున్న ఈ భారీ రాకెట్‌లో రెండు ప్రధాన భాగాలు ఉంటాయి. కింది భాగాన్ని సూపర్ హెవీ బూస్టర్ అని, పైభాగాన్ని స్టార్‌షిప్ అని పిలుస్తారు. ప్రయోగం విజయవంతంగా ప్రారంభమైన తర్వాత రెండు భాగాలు విడిపోయాయి. పైభాగమైన స్టార్‌షిప్ అంతరిక్షంలోకి చేరుకుని 26 స్టార్‌లింక్ ఉపగ్రహాలను కక్ష్యలోకి ప్రవేశపెట్టింది. అనంతరం భూమికి సుమారు 260 నుంచి 265 కిలోమీటర్ల ఎత్తులో ప్రయాణిస్తూ 14 సార్లు భూమి చుట్టూ తిరిగింది. దాదాపు 22.5 గంటల ప్రయాణం తర్వాత తిరుగు ప్రయాణాన్ని ప్రారంభించింది.

భారీ యాంత్రిక చేతులతో రాకెట్‌ను పట్టుకున్న తీరు ఇదే

అంతరిక్షం నుంచి తిరిగొస్తున్న సమయంలో స్టార్‌షిప్ గంటకు సుమారు 27 వేల కిలోమీటర్ల వేగంతో భూ వాతావరణంలోకి ప్రవేశించింది. ఈ సమయంలో రాకెట్‌పై తీవ్రమైన వేడి ఏర్పడుతుంది. దాన్ని తట్టుకుని ప్రయాణించిన తర్వాత స్టార్‌షిప్ తన ఇంజిన్లను మళ్లీ ప్రారంభించింది. క్రమంగా వేగాన్ని తగ్గించుకుంటూ నిలువుగా మారి టెక్సాస్‌లోని ప్రయోగ కేంద్రం వైపు వచ్చింది. అక్కడ ప్రయోగ టవర్‌కు అమర్చిన రెండు భారీ యాంత్రిక చేతులు దాన్ని గాల్లోనే పట్టుకున్నాయి. ఈ వ్యవస్థను స్పేస్‌ఎక్స్ మెకజిల్లా అని పిలుస్తుంది. ఈ ప్రయోగంలో స్టార్‌షిప్ నేలను తాకకుండానే ఆ చేతుల మధ్య సురక్షితంగా నిలిచిపోయింది. ఇలాంటి పద్ధతిలో స్టార్‌షిప్ పైభాగాన్ని తిరిగి పట్టుకోవడం ఇదే మొదటిసారి.

సూపర్ హెవీ బూస్టర్ మాత్రం విఫలం

ఈ ప్రయోగంలో స్పేస్‌ఎక్స్ రెండు భాగాలను తిరిగి పట్టుకోవాలని లక్ష్యంగా పెట్టుకుంది. అయితే స్టార్‌షిప్ పైభాగాన్ని విజయవంతంగా అందుకున్నా.. కింది భాగమైన సూపర్ హెవీ బూస్టర్‌ను పట్టుకోవడంలో విఫలమైంది. తిరుగు ప్రయాణంలో బూస్టర్‌లో సమస్య తలెత్తడంతో టవర్ వద్దకు తీసుకొచ్చే ప్రయత్నాన్ని నిలిపివేశారు. భద్రతా వ్యవస్థ దాని మార్గాన్ని సముద్రం వైపు మళ్లించింది. అనంతరం మెక్సికో గల్ఫ్ ప్రాంతంలో దాని స్వీయ విధ్వంస వ్యవస్థ పనిచేసింది. ప్రాథమిక సమాచారం ప్రకారం, తక్కువ ఇంధనం ఉందనే హెచ్చరికతో బూస్టర్ తిరుగు ప్రయాణాన్ని ముందుగానే నిలిపివేసి ఉండవచ్చని స్పేస్‌ఎక్స్ తెలిపింది. దీనిపై ఇంజినీర్లు ఇంకా పరిశీలన చేస్తున్నారు. దీంతో రెండు భాగాలను ఒకే ప్రయోగంలో తిరిగి పట్టుకోవాలన్న లక్ష్యం నెరవేరలేదు.

చంద్రుడు, అంగారకుడిపైకి మనుషులు

స్టార్‌షిప్‌ను పూర్తిగా తిరిగి ఉపయోగించగల రాకెట్‌గా మార్చడమే స్పేస్‌ఎక్స్ ప్రధాన లక్ష్యం. ఇలా చేస్తే ప్రతి ప్రయోగం తర్వాత కొత్త రాకెట్ తయారు చేయాల్సిన అవసరం తగ్గుతుంది. ప్రయోగ ఖర్చులు తగ్గడంతో పాటు అంతరిక్ష ప్రయాణాలను మరింత తరచుగా చేపట్టే అవకాశం ఉంటుంది. అయితే స్టార్‌షిప్‌ను మళ్లీ ప్రయోగించడానికి ముందు థర్మల్ ప్రొటెక్షన్ టైల్స్ పనితీరు, ఇతర వ్యవస్థలపై మరిన్ని పరీక్షలు చేయాల్సి ఉంది. చంద్రుడిపైకి వ్యోమగాములను తీసుకెళ్లే నాసా ఆర్టెమిస్ కార్యక్రమంలోనూ స్టార్‌షిప్ కీలక పాత్ర పోషించనుంది. 2028లో చంద్రుడిపై మనుషులను దింపాలన్న లక్ష్యంతో నాసా పనిచేస్తోంది. మరోవైపు ఎలాన్ మస్క్ స్టార్‌షిప్ సాయంతో భవిష్యత్తులో అంగారకుడిపై మనుషుల నివాసాలను ఏర్పాటు చేయాలని భావిస్తున్నారు. తాజా విజయం ఆ దిశగా మరో ముఖ్యమైన అడుగుగా నిలిచింది.