Saidabad: ఎల్లమ్మ కల్యాణోత్సవాలు వేలాది మందికి అన్నదానం!

Saidabad: బల్కంపేట ఎల్లమ్మ కల్యాణోత్సవాన్ని పురస్కరించుకుని సైదాబాద్ చేపల మార్కెట్‌లో భక్తిశ్రద్ధల మధ్య ఆధ్యాత్మిక వేడుకలు ఘనంగా నిర్వహించారు. ఫ్రెండ్స్ అసోసియేషన్ ఆధ్వర్యంలో ఎల్లమ్మ తల్లికి ప్రత్యేక పూజలు, అభిషేకాలు నిర్వహించి భక్తులు మొక్కులు చెల్లించుకున్నారు. అనంతరం అమ్మవారి ఆశీస్సులు అందరికీ లభించాలని కోరుతూ భారీ స్థాయిలో అన్నదాన కార్యక్రమాన్ని ఏర్పాటు చేశారు. ఈ అన్నదానంలో పెద్ద సంఖ్యలో భక్తులు పాల్గొని ప్రసాదాన్ని స్వీకరించారు.

కార్యక్రమానికి వివిధ రాజకీయ, సామాజిక రంగాల ప్రముఖులు హాజరై ప్రత్యేక పూజల్లో పాల్గొన్నారు. బీజేపీ రాష్ట్ర అధికార ప్రతినిధి చికోటి ప్రవీణ్, మాజీ డిప్యూటీ మేయర్ సుభాష్ చందర్జీ, బీజేపీ రాష్ట్ర నాయకుడు కొత్తకాపు రవీందర్ రెడ్డి, బీజేపీ రాష్ట్ర ఓబీసీ నాయకుడు రమణ్ సింగ్, జానపల మధు, కాంగ్రెస్ నాయకుడు మదన్ బాబు, స్థానిక బస్తీవాసులు పెద్ద సంఖ్యలో పాల్గొని అమ్మవారిని దర్శించుకుని ప్రత్యేక ప్రార్థనలు నిర్వహించారు.

సాయంత్రం నిర్వహించిన అమ్మవారి ఊరేగింపు సైదాబాద్ పురవీధుల్లో అత్యంత వైభవంగా సాగింది. చిరుజల్లులతో వర్షం కురుస్తున్నప్పటికీ భక్తుల ఉత్సాహం ఏమాత్రం తగ్గలేదు. డప్పుల మోతలు, మంగళవాయిద్యాలు, జై ఎల్లమ్మ నినాదాలతో ప్రాంతమంతా ఆధ్యాత్మిక వాతావరణం నెలకొంది. పోతరాజుల విన్యాసాలు, భక్తుల ఆటపాటలు, మహిళల కోలాటాలు ఊరేగింపుకు ప్రత్యేక ఆకర్షణగా నిలిచాయి. చిన్నారుల నుంచి వృద్ధుల వరకు వేలాది మంది భక్తులు ఊరేగింపులో పాల్గొని అమ్మవారిపై తమ భక్తిని చాటుకున్నారు.

భక్తులకు ఎలాంటి అసౌకర్యం కలగకుండా ఫ్రెండ్స్ అసోసియేషన్ సభ్యులు విస్తృత ఏర్పాట్లు చేశారు. తాగునీరు, ప్రసాదం, అన్నదానం, ట్రాఫిక్ నియంత్రణ, భక్తుల రాకపోకలు సజావుగా సాగేందుకు ప్రత్యేక చర్యలు చేపట్టారు. అసోసియేషన్ సభ్యులు సుభాష్ కాటేకర్, దినేష్ గౌళికర్, అవినాష్ నాయుడు, ధర్మేందర్ సింగ్ ఆధ్వర్యంలో అన్ని ఏర్పాట్లు పకడ్బందీగా నిర్వహించడంతో కార్యక్రమం విజయవంతంగా ముగిసింది.

సైదాబాద్ ప్రాంత ప్రజలు, వ్యాపారులు, యువకులు, మహిళలు పెద్ద సంఖ్యలో పాల్గొనడంతో బల్కంపేట ఎల్లమ్మ కల్యాణోత్సవ వేడుకలు భక్తి, సంప్రదాయం, సామాజిక ఐక్యతకు ప్రతీకగా నిలిచాయి. అమ్మవారి కటాక్షంతో ప్రజలందరూ సుఖసంతోషాలతో ఉండాలని భక్తులు ప్రార్థిస్తూ అత్యంత భక్తిశ్రద్ధలతో వేడుకలను ముగించారు.