RBI Rules: గోల్డ్ లోన్ రూల్స్ మారాయా? ఎంత లోన్ వస్తుందో తెలుసుకోండి!

అత్యవసర ఆర్థిక అవసరాలు వచ్చినప్పుడు బంగారు నగలను విక్రయించకుండా తాకట్టు పెట్టి గోల్డ్ లోన్ తీసుకునే వారు చాలామంది ఉంటారు. వ్యక్తిగత అవసరాలు, చిన్న వ్యాపారాల నిర్వహణ వంటి వాటికి గోల్డ్ లోన్ త్వరగా డబ్బు సమకూర్చే మార్గంగా ఉంటుంది. అయితే మీ దగ్గర ఉన్న బంగారానికి ఎంత రుణం వస్తుంది? బ్యాంకులు, ఆర్థిక సంస్థలు బంగారం విలువను ఎలా లెక్కిస్తాయి? రిజర్వ్ బ్యాంక్ ఆఫ్ ఇండియా నిబంధనలు ఏం చెబుతున్నాయి? వంటి విషయాలు తెలుసుకోవడం చాలా ముఖ్యం.

బంగారం విలువను ఎలా లెక్కిస్తారు?

గోల్డ్ లోన్ ఇచ్చేటప్పుడు నగ మొత్తం బరువును పరిగణనలోకి తీసుకోరు. నగలోని రాళ్లు, వజ్రాలు, ఎనామెల్, మైనం, సోల్డర్ వంటి బంగారం కాని పదార్థాల బరువును ముందుగా తొలగిస్తారు. ఆ తర్వాత మిగిలిన స్వచ్ఛమైన బంగారం బరువు ఆధారంగా విలువను నిర్ణయిస్తారు.

బంగారం స్వచ్ఛత కూడా కీలకమే

సాధారణంగా 18 క్యారెట్ల నుంచి 22 క్యారెట్ల మధ్య స్వచ్ఛత ఉన్న బంగారు నగలను గోల్డ్ లోన్ కోసం పరిగణనలోకి తీసుకుంటారు. 22 క్యారెట్ల బంగారంలో 91.6 శాతం స్వచ్ఛత ఉండగా, 18 క్యారెట్ల బంగారంలో 75 శాతం స్వచ్ఛత ఉంటుంది. 18 క్యారెట్ల కంటే తక్కువ స్వచ్ఛత ఉన్న బంగారాన్ని కొన్ని సంస్థలు తాకట్టు స్వీకరించకపోవచ్చు.

ఎంత బంగారానికి ఎంత లోన్?

గోల్డ్ లోన్‌లో రుణ మొత్తం నిర్ణయించేటప్పుడు లోన్-టు-వాల్యూ నిష్పత్తి కీలకంగా ఉంటుంది. సాధారణంగా గరిష్ఠంగా 75 శాతం వరకు రుణం లభించే అవకాశం ఉంటుంది. రూ.2.5 లక్షల వరకు ఉండే అర్హత గల గోల్డ్ లోన్లకు గరిష్ఠంగా 85 శాతం వరకు ఎల్‌టీవీ వర్తించవచ్చు.

బంగారం విలువను నిర్ణయించేటప్పుడు సాధారణంగా ఇండియన్ బులియన్ అండ్ జువెలర్స్ అసోసియేషన్ ప్రకటించే 22 క్యారెట్ల బంగారం రోజువారీ ధర లేదా గత 30 రోజుల సగటు ధరను పరిగణనలోకి తీసుకుంటారు.

50 గ్రాముల బంగారానికి ఎంత రుణం?

ఉదాహరణకు 50 గ్రాముల 22 క్యారెట్ల స్వచ్ఛమైన బంగారం ఉందనుకుందాం. గ్రాము బంగారం ధర రూ.7,200గా ఉంటే మొత్తం విలువ రూ.3.60 లక్షలు అవుతుంది.

ఈ మొత్తంపై 75 శాతం ఎల్‌టీవీ వర్తిస్తే గరిష్ఠంగా రూ.2.70 లక్షల వరకు రుణం పొందే అవకాశం ఉంటుంది. అయితే వాస్తవంగా లభించే రుణ మొత్తం బంగారం స్వచ్ఛత, మార్కెట్ ధర, సంస్థ నిబంధనలు, వర్తించే ఎల్‌టీవీ ఆధారంగా మారవచ్చు.

గోల్డ్ లోన్‌కు ఎవరు అర్హులు?

భారత పౌరుడై 18 ఏళ్లు లేదా అంతకంటే ఎక్కువ వయస్సు ఉన్నవారు సాధారణంగా గోల్డ్ లోన్‌కు దరఖాస్తు చేసుకోవచ్చు. ఆధార్, పాన్, డ్రైవింగ్ లైసెన్స్ లేదా పాస్‌పోర్ట్ వంటి కేవైసీ పత్రాలు అవసరం కావచ్చు.

బంగారం కొనుగోలు బిల్లు ఉంటే ఉపయోగకరంగా ఉంటుంది. అయితే కొన్ని సంస్థల్లో అది తప్పనిసరి కాకపోవచ్చు. చాలా గోల్డ్ లోన్లలో ఆదాయ ధ్రువీకరణ లేదా అధిక సిబిల్ స్కోర్ ప్రధాన అర్హత కాకపోయినా, రుణదాత సంస్థల అంతర్గత నిబంధనలు వేర్వేరుగా ఉండొచ్చు.

రుణాన్ని ఎలా చెల్లించాలి?

గోల్డ్ లోన్లకు సాధారణంగా పలు రీపేమెంట్ ఎంపికలు ఉంటాయి.

ఈఎంఐ విధానం: ప్రతి నెల అసలు, వడ్డీ కలిపి చెల్లించాలి.

వడ్డీ మాత్రమే: ప్రతి నెల వడ్డీ చెల్లించి, గడువు ముగిసినప్పుడు అసలు మొత్తాన్ని చెల్లించాలి.

బుల్లెట్ రీపేమెంట్: స్వల్పకాలిక రుణాల్లో గడువు ముగిసినప్పుడు అసలు, వడ్డీ మొత్తాన్ని ఒకేసారి చెల్లించే విధానం. వ్యక్తిగత అవసరాల కోసం ఇచ్చే ఇలాంటి రుణాలకు గరిష్ఠంగా 12 నెలల కాలపరిమితి ఉండవచ్చు.

ముందుగానే రుణం చెల్లించవచ్చా?

చాలా బ్యాంకులు, నియంత్రిత ఆర్థిక సంస్థలు రుణాన్ని ముందుగానే చెల్లించే అవకాశం కల్పిస్తాయి. అయితే ఫోర్‌క్లోజర్, ముందస్తు చెల్లింపు నిబంధనలు సంస్థలవారీగా మారవచ్చు. కొన్ని సందర్భాల్లో కొంత రుణం చెల్లించిన తర్వాత తాకట్టు పెట్టిన నగల్లో కొంత భాగాన్ని తిరిగి పొందే అవకాశం కూడా ఉండొచ్చు.

రుణం చెల్లించకపోతే బంగారం వేలం వేస్తారా?

గోల్డ్ లోన్ బకాయి పడితే వెంటనే బంగారు నగలను వేలం వేయలేరు. ముందుగా రుణగ్రహీతకు లిఖితపూర్వక నోటీసు ఇవ్వాలి. తగిన గడువు ఇచ్చిన తర్వాతే బహిరంగ వేలం నిర్వహించాలి.

వేలంలో వచ్చిన మొత్తం రుణ బకాయి కంటే ఎక్కువగా ఉంటే, మిగిలిన మొత్తాన్ని రుణగ్రహీతకు తిరిగి చెల్లించాల్సి ఉంటుంది.

రుణం తీర్చిన తర్వాత నగలు ఎప్పుడు తిరిగి ఇస్తారు?

రుణాన్ని పూర్తిగా చెల్లించిన తర్వాత తాకట్టు పెట్టిన బంగారు నగలను నిర్ణీత వ్యవధిలో తిరిగి ఇవ్వాలి. ఏదైనా కారణంతో ఆలస్యం జరిగితే వర్తించే నిబంధనల ప్రకారం రుణదాత పరిహారం చెల్లించాల్సి ఉంటుంది.

గోల్డ్ లోన్ తీసుకునే ముందు ఈ జాగ్రత్తలు

నగలో ఉన్న రాళ్లు, వజ్రాలు లేదా ఇతర పదార్థాల బరువును బంగారం బరువుగా పరిగణించకూడదు. బంగారం ధరలు మారితే రుణానికి వర్తించే ఎల్‌టీవీపై ప్రభావం పడవచ్చు. నెలవారీ వడ్డీ చెల్లింపుల్లో ఆలస్యం జరిగితే రుణ భారం పెరిగే అవకాశం ఉంటుంది.

అందువల్ల గోల్డ్ లోన్ తీసుకునే ముందు బంగారం ప్రస్తుత ధర, స్వచ్ఛత, ఎల్‌టీవీ, వడ్డీ రేటు, ప్రాసెసింగ్ ఛార్జీలు, ముందస్తు చెల్లింపు నిబంధనలు, వేలం నిబంధనలు వంటి అంశాలను పూర్తిగా తెలుసుకోవడం మంచిది.