Investment: చేతిలో రూ. 10 ల‌క్ష‌లున్నాయా.? ఇలా చేస్తే 15 ఏళ్ల‌లో రూ. 70 ల‌క్ష‌లు అవుతాయి!

Investment: ఒక్కసారిగా రూ. 10 లక్షలు చేతికి వస్తే ఏం చేయాలి? చాలామంది ఆ మొత్తాన్ని వెంటనే షేర్లు లేదా మ్యూచువల్ ఫండ్లలో పెట్టుబడి పెడుతుంటారు. అయితే మార్కెట్ పడిపోయినప్పుడు భయపడి పెట్టుబడులను వెనక్కి తీసుకుంటే నష్టం వచ్చే అవకాశం ఉంటుంది. సరైన ప్లానింగ్‌తో ఈ రూ. 10 లక్షలను దీర్ఘకాలంలో పెద్ద మొత్తంగా మార్చుకోవచ్చు.

మొత్తం డబ్బును ఒకేసారి పెట్టుబడి పెట్టొద్దు

PF, గ్రాట్యుటీ, బోనస్ లేదా ఆస్తి విక్రయం ద్వారా రూ. 10 లక్షలు వచ్చినప్పుడు మొత్తం మొత్తాన్ని ఒకేసారి ఈక్విటీలో పెట్టడం కంటే దశలవారీగా పెట్టుబడి పెట్టడం మంచిది. దీనికి సిస్టమాటిక్ ట్రాన్స్‌ఫర్ ప్లాన్ (STP) ఉపయోగించవచ్చు. ముందుగా రూ. 10 లక్షలను లిక్విడ్ లేదా స్వల్పకాలిక డెట్ ఫండ్‌లో ఉంచి, అక్కడి నుంచి ప్రతి నెలా నిర్ణీత మొత్తాన్ని ఈక్విటీ మ్యూచువల్ ఫండ్లకు బదిలీ చేయవచ్చు. ఉదాహరణకు నెలకు రూ. 25,000–రూ. 30,000 చొప్పున ఈక్విటీ ఫండ్లలోకి బదిలీ చేస్తే మార్కెట్ హెచ్చుతగ్గుల ప్రభావాన్ని కొంతవరకు తగ్గించుకోవచ్చు. అయితే STP కూడా మార్కెట్ రిస్క్‌ను పూర్తిగా తొలగించదు.

రూ. 10 లక్షలను సరైన విధంగా విభజించాలి

మీ ఆర్థిక పరిస్థితి, వయసు, రిస్క్ తీసుకునే సామర్థ్యం, పెట్టుబడి లక్ష్యాలను బట్టి మొత్తాన్ని వివిధ అసెట్ క్లాసుల్లో విభజించడం మంచిది. ఉదాహరణకు ఈక్విటీ మ్యూచువల్ ఫండ్లు, డెట్ సాధనాలు, FDలు, ఇతర సురక్షిత పెట్టుబడుల మధ్య డబ్బును డివైడ్ చేయొచ్చు.

ఇలా చేయడం వల్ల మొత్తం పెట్టుబడి ఒకే మార్కెట్‌పై ఆధారపడకుండా ఉంటుంది. అదే సమయంలో అత్యవసర ఖర్చుల కోసం కొంత మొత్తాన్ని ప్రత్యేకంగా ఉంచుకోవాలి. కుటుంబానికి తగిన హెల్త్ ఇన్సూరెన్స్, టర్మ్ ఇన్సూరెన్స్ ఉంటే పెట్టుబడులను మధ్యలో తీసుకోవాల్సిన అవసరం తగ్గుతుంది.

12% నుంచి 14% రాబడి వస్తే ఎంత అవుతుంది?

రూ. 10 లక్షలను ఎలాంటి అదనపు పెట్టుబడి లేకుండా దీర్ఘకాలం కొనసాగించి, సగటున 12% వార్షిక రాబడి వస్తే కంపౌండింగ్ కారణంగా డబ్బు గణనీయంగా పెరుగుతుంది. 5 సంవత్సరాల తర్వాత సుమారు రూ. 17.62 లక్షలు, 10 ఏళ్ల త‌ర్వాత సుమారు రూ. 31.06 లక్షలు, 15 ఏళ్ల నాటికి రూ. 54.74 లక్షలు అవుతుంది.

అదే 14% వార్షిక రాబడి లభిస్తే 15 సంవత్సరాల తర్వాత రూ. 10 లక్షలు ఏకంగా రూ. 71.38 లక్షలు అయ్యే అవ‌కాశం ఉంటుంది. అయితే ఇవి అంచనా లెక్కలు మాత్రమే. మ్యూచువల్ ఫండ్లు, ఈక్విటీ మార్కెట్లలో రాబడి స్థిరంగా ఉండదు. 12% లేదా 14% రాబడి ప్రతి సంవత్సరం వస్తుందని హామీ లేదు.

డబ్బు ఎప్పుడు అవసరమో దానిబట్టి పెట్టుబడి ఎంచుకోండి

మీకు ఈ డబ్బు 3 సంవత్సరాల్లోపు అవసరం అయితే ఈక్విటీ పెట్టుబడులకు దూరంగా ఉండటం మంచిది. FDలు లేదా తక్కువ రిస్క్ ఉన్న డెట్ సాధనాలను పరిగణించవచ్చు. 5 సంవత్సరాలు లేదా అంతకంటే ఎక్కువ కాలం పెట్టుబడిని కొనసాగించే అవకాశం ఉంటే, మీ రిస్క్ సామర్థ్యాన్ని బట్టి ఈక్విటీ మ్యూచువల్ ఫండ్లను పరిగణించవచ్చు.

మార్కెట్ ప్రతిరోజూ పెరగడం, తగ్గడం సహజం. మార్కెట్ పడిపోయినప్పుడు భయపడి పెట్టుబడులను అమ్మేయకుండా, మీ లక్ష్యం, పెట్టుబడి కాలవ్యవధిని దృష్టిలో పెట్టుకోవాలి. దీర్ఘకాలంలో కంపౌండింగ్ ప్రభావం పెట్టుబడిని పెద్ద మొత్తంగా మార్చడంలో కీలక పాత్ర పోషిస్తుంది.

గ‌మ‌నిక‌: పైన తెలిపిన విష‌యాల‌ను కేవ‌లం ప్రాథ‌మిక స‌మాచారంగానే భావించాలి. పెట్టుబడిపై వచ్చే రాబడి మార్కెట్ పరిస్థితులపై ఆధారపడి ఉంటుంది. పెట్టుబడి పెట్టే ముందు మీ ఆర్థిక లక్ష్యాలు, రిస్క్ సామర్థ్యాన్ని పరిశీలించి నిపుణుల సలహా తీసుకోవడం మంచిది.