Scheme : గుడ్ న్యూస్ చెప్పిన ప్ర‌భుత్వం .. వారి అకౌంట్లలోకి రూ.13 వేలు

Thalliki Vandanam : ఆంధ్రప్రదేశ్, తెలంగాణ రాష్ట్రాల్లో వేసవి సెలవులు ముగింపు దశకు వచ్చేశాయి. సరిగ్గా స్కూళ్లు రీ-ఓపెన్ అవుతున్న తరుణంలో ఏపీలోని విద్యార్థుల తల్లులకు కూటమి ప్రభుత్వం ఒక అదిరిపోయే తీపి కబురు అందించేందుకు రంగం సిద్ధం చేసింది. ఎప్పుడెప్పుడా అని ఎదురుచూస్తున్న తల్లికి వందనం పథకం అమలుపై ప్రభుత్వం కీలక అడుగు వేసింది.

గత ఏడాది జూన్ 12వ తేదీనే విద్యార్థుల తల్లుల ఖాతాల్లో డబ్బులు జమ అయినప్పటికీ.. ఈ ఏడాది కొన్ని సాంకేతిక కారణాలు , విద్యా సంవత్సరం ప్రారంభంలో మార్పుల వల్ల కాస్త ఆలస్యమైంది. అయితే, తాజా సమాచారం ప్రకారం జూలై నెలలోనే ఈ పథకాన్ని పక్కాగా అమలు చేసేందుకు విద్యాశాఖ కసరత్తు పూర్తి చేస్తోంది. గత వైఎస్సార్‌సీపీ ప్రభుత్వ హయాంలో అమలైన అమ్మ ఒడి పథకానికి, ప్రస్తుత కూటమి ప్రభుత్వ తల్లికి వందనం పథకానికి మధ్య ఒక పెద్ద తేడా ఉంది. ఇదే ఇప్పుడు రాష్ట్రవ్యాప్తంగా తల్లుల్లో హర్షాన్ని నింపుతోంది.

ఒక కుటుంబంలో ఎంతమంది పిల్లలు ఉన్నప్పటికీ.. కేవలం ఒక్కరికి మాత్రమే వర్తింపజేస్తూ ఏటా రూ. 13,000 అందించేవారు. ఇద్దరు, ముగ్గురు పిల్లలు బడికి వెళ్తున్నా రూపాయి అదనంగా వచ్చేది కాదు. ఆ నిబంధనను పూర్తిగా మార్చేశారు. ఒకటో తరగతి నుంచి ఇంటర్మీడియట్ వరకు చదువుకునే కుటుంబంలో అర్హులైన పిల్లలు ఎంతమంది ఉంటే.. అంతమందికీ తలా రూ. 13,000 చొప్పున ఈ సారి ఆర్థిక సాయం అందనుంది. ఈ ఒక్క మార్పుతో ఈ ఏడాది దాదాపు 68 లక్షల మంది విద్యార్థులకు లబ్ధి చేకూరనుండటం విశేషం. ఒకటి కంటే ఎక్కువ మంది పిల్లలున్న మధ్యతరగతి, పేద కుటుంబాలకు ఇది చాలా పెద్ద ఊరటనిచ్చే అంశం.

ఒకవైపు స్కీమ్ అప్‌డేట్ ఇలా ఉంటే.. మరోవైపు రెండు తెలుగు రాష్ట్రాల్లో స్కూళ్ల రీ-ఓపెనింగ్ సందడి మొదలైంది. ఏపీలో శుక్రవారం నుంచే పాఠశాలలు పునఃప్రారంభం కానున్నాయి. తొలిరోజే విద్యార్థులకు పుస్తకాలు, కావలసిన వస్తువులను అందించేందుకు అధికారులు ఏర్పాట్లు చేస్తున్నారు. తెలంగాణలో మాత్రం వీకెండ్ తర్వాత.. అంటే వచ్చే సోమవారం నుండి స్కూళ్లు రీ-ఓపెన్ కానున్నాయి. సెలవులు ముగిసి పిల్లలు మళ్లీ బడిబాట పడుతున్న వేళ.. పుస్తకాల కొనుగోళ్లు, స్కూల్ ఫీజుల భారంతో సతమతమవుతున్న తల్లులకు 'తల్లికి వందనం' రూపంలో జూలైలో అందబోయే ఆర్థిక సాయం పెద్ద అండగా నిలవనుంది అనడంలో సందేహం లేదు.