VinFast : సింగిల్ ఛార్జ్‌తో 500 కిమీ.. రోడ్లపైకి రాబోతున్న విన్‌ఫాస్ట్ నయా ఎలక్ట్రిక్ ఎస్‌యూవీ

VinFast : గ్లోబల్ ఎలక్ట్రిక్ వాహన రంగంలో సరికొత్త సంచలనాలు సృష్టిస్తున్న వియత్నాం కార్ల తయారీ దిగ్గజం విన్‌ఫాస్ట్ తన తదుపరి తరం VF 8 ఎలక్ట్రిక్ ఎస్‌యూవీని ప్రపంచానికి పరిచయం చేసింది. అదిరిపోయే లుక్స్, అధునాతన కేబిన్ టెక్నాలజీతో ఈ కారును సరికొత్తగా ముస్తాబు చేశారు. ఈ సరికొత్త మోడల్‌ను కంపెనీకి చెందిన ఇన్-హౌస్ ఇంజనీరింగ్ బృందమే స్వయంగా డిజైన్ చేయడం విశేషం. భారత ఆటోమొబైల్ మార్కెట్లోకి కూడా ఈ కారు త్వరలోనే అడుగుపెట్టే అవకాశాలు ఉన్నాయనే వార్తలు జోరందుకున్నాయి.

ఈ విన్‌ఫాస్ట్ VF 8 ఎలక్ట్రిక్ ఎస్‌యూవీని సరికొత్త టెక్ ఫ్లూయిడ్ డిజైన్ ఫిలాసఫీ ఆధారంగా తయారు చేశారు. దీనివల్ల కారుకు చాలా మోడ్రన్, ఫ్యూచరిస్టిక్ లుక్ వచ్చింది. ఈ కారు పొడవు 4,701 మిమీ, వెడల్పు 1,872 మిమీ, ఎత్తు 1,670 మిమీగా ఉంది. అలాగే దీని వీల్‌బేస్ 2,840 మిమీ ఉండటం వల్ల కారు లోపల ప్రయాణికులకు చాలా విశాలమైన లెగ్‌రూమ్ దొరుకుతుంది. కారు ముందు భాగంలో ఉండే గ్లోస్ బ్లాక్ గ్రిల్, వింగ్ ఆకారంలో ఉండే ఎల్ఈడీ డే-టైమ్ రన్నింగ్ లైట్లు (DRLs) చూసేవారిని ఇట్టే ఆకట్టుకుంటాయి.

కారు కేబిన్ విషయానికి వస్తే, ఇందులో లగ్జరీ కార్లకు ఏమాత్రం తీసిపోని ఫీచర్లు ఉన్నాయి. డాష్ బోర్డ్‌పై 12.9 ఇంచుల భారీ టచ్‌స్క్రీన్ ఇన్ఫోటైన్‌మెంట్ సిస్టమ్‌ను అమర్చారు. డ్రైవింగ్ చేసేటప్పుడు గేర్లు మార్చుకోవడానికి వీలుగా గియర్ సెలెక్టర్‌ను స్టీరింగ్ కాలమ్‌పైనే ఇచ్చారు. దీనివల్ల మధ్యలో స్థలం బాగా కలిసి వచ్చింది. ఇందులో డ్యూయల్-జోన్ క్లైమేట్ కంట్రోల్, ఎయిర్ అయోనైజేషన్ సిస్టమ్, కాంబి 1.0 ఎయిర్ ఫిల్టర్ వంటి అద్భుతమైన ఫీచర్లు ఉన్నాయి. ఇవి కారు లోపల ఎల్లప్పుడూ స్వచ్ఛమైన గాలి ఉండేలా చూస్తాయి.

ఇక పవర్‌ట్రెయిన్ విషయానికి వస్తే, ఈ కారులో 170kW ఎలక్ట్రిక్ మోటార్‌ను ఉపయోగించారు. ఇది 330Nm గరిష్ట టార్క్‌ను ఉత్పత్తి చేస్తుంది. ఈ ఎస్‌యూవీలో ఎకో, నార్మల్, స్పోర్ట్ అనే మూడు డ్రైవింగ్ మోడ్స్ అందుబాటులో ఉన్నాయి. ఇందులో అమర్చిన 60.13kWh బ్యాటరీ ప్యాక్ ద్వారా, ఒకసారి ఫుల్ ఛార్జ్ చేస్తే ఏకంగా 500 కిలోమీటర్ల దూరం ప్రయాణించవచ్చని NEDC టెస్టుల్లో తేలింది. అన్నిటికంటే ముఖ్యంగా, ఫాస్ట్ ఛార్జింగ్ సపోర్ట్‌తో కేవలం 30 నిమిషాల లోపే బ్యాటరీని 10% నుండి 70% వరకు ఛార్జ్ చేసుకోవచ్చు.

ప్రయాణికుల భద్రతకు ఈ కారులో పెద్ద పీట వేశారు. ఇందులో అధునాతన అడాస్ ఫీచర్లను జోడించారు. దీనివల్ల హైవే అసిస్ట్, అడాప్టివ్ క్రూయిజ్ కంట్రోల్, లేన్ కీపింగ్ అసిస్ట్, బ్లైండ్ స్పాట్ వార్నింగ్, 360-డిగ్రీల కెమెరా వంటి సదుపాయాలు డ్రైవర్‌కు రక్షణగా ఉంటాయి. ఈ కారుకు ఏషియన్ ఎన్‌క్యాప్ క్రాష్ టెస్టులో 5-స్టార్ సేఫ్టీ రేటింగ్ సాధించడమే లక్ష్యంగా కంపెనీ రంగంలోకి దించుతోంది.

వ్యాపార పరంగా చూస్తే.. వియత్నాంలో ఈ కారు ధర 999 మిలియన్ వీఎన్‌డీగా ఉంది. అంటే భారత కరెన్సీలో దీని విలువ దాదాపు రూ.36.5 లక్షలు. ముందస్తుగా బుక్ చేసుకునే కస్టమర్ల కోసం కంపెనీ దాదాపు రూ.1.86 లక్షల స్పెషల్ డిస్కౌంట్‌ను కూడా ఆఫర్ చేస్తోంది. ఈ కారు బుకింగ్స్ మే 27, 2026 నుంచి ప్రారంభం కానుండగా, డెలివరీలు జూలై 2026 చివరి వారం నుంచి మొదలవుతాయి. ఇండియాలో ఈ బ్రాండ్ ప్లాంట్ పనులు కూడా వేగంగా జరుగుతుండటంతో, మన దేశంలోకి కూడా ఇది త్వరలోనే ఎంట్రీ ఇచ్చే ఛాన్స్ ఉంది.