AP Rice Prices: ఏపీ ప్రజలకు గుడ్న్యూస్.. కిలో బియ్యం రూ.47కే, ఇంటి వద్దకే బియ్యం బండి
ఆంధ్రప్రదేశ్లో బియ్యం ధరలను నియంత్రించేందుకు ప్రభుత్వం కీలక చర్యలు చేపట్టింది. సాధారణ ఎంటీయూ బియ్యం కిలో రూ.47కు విక్రయించాలని నిర్ణయించింది. దీంతో 26 కేజీల బస్తా ధర రూ.1,222 అవుతుంది.
AP Rice Prices
AP Rice Prices: ఆంధ్రప్రదేశ్ రాష్ట్రంలో బియ్యం ధరలు పెరుగుతుండటంతో వాటిని అదుపులోకి తీసుకొచ్చేందుకు ప్రభుత్వం చర్యలు చేపట్టింది. ఇందులో భాగంగా బియ్యం రకాలను బట్టి గరిష్ఠ ధరలను నిర్ణయించింది. సాధారణ ఎంటీయూ రకం బియ్యం కిలో రూ.47కు విక్రయించాలి. ఈ లెక్కన 26 కేజీల బస్తా ధర రూ.1,222 అవుతుంది. బీపీటీ సోనా, బీపీటీ సాంబ, కేఎన్ఎం రకాల బియ్యం కిలో రూ.66గా నిర్ణయించారు. హెచ్ఎంటీ, ఆర్ఎన్ఆర్ రకాలు కిలో రూ.76కు, జైశ్రీరామ్ రకం కిలో రూ.82కు విక్రయించాలి. నిర్ణయించిన ధరల కంటే ఎక్కువకు అమ్మితే చర్యలు తీసుకుంటామని ప్రభుత్వం హెచ్చరించింది.
ధరణి బియ్యం ఇంటి దగ్గరకే
తక్కువ ధరకు నాణ్యమైన బియ్యం అందించేందుకు ప్రభుత్వం ధరణి బ్రాండ్ విక్రయాలను విస్తరించాలని నిర్ణయించింది. రైతు బజార్లలో ఇప్పటికే ఈ బియ్యం విక్రయిస్తున్నారు. కిలో రూ.50 ధర ఉన్న బియ్యం 26 కేజీలు కొనుగోలు చేస్తే రూ.1,300 అవుతుంది. కిలో రూ.49 ధర ఉన్న రకం అయితే 26 కేజీలకు రూ.1,274 చెల్లించాలి. ఈ బియ్యానికి ప్రజల నుంచి మంచి స్పందన వస్తుండటంతో మరిన్ని ప్రాంతాలకు విక్రయాలను విస్తరించాలని అధికారులు భావిస్తున్నారు. మొబైల్ వాహనాల ద్వారా మున్సిపాలిటీలు, మండల కేంద్రాల్లోనే కాకుండా ప్రజల ఇళ్ల దగ్గరకు వెళ్లి బియ్యం అమ్మేలా ఏర్పాట్లు చేస్తున్నారు. అయితే ఈ వాహనాల సేవలు ఎప్పటి నుంచి ప్రారంభమవుతాయనే తేదీని అధికారులు ఇంకా వెల్లడించలేదు.
డిసెంబర్ 1 నుంచి తక్కువ ధరకే పప్పు, గోధుమ పిండి, పామాయిల్
బియ్యంతో పాటు ఇతర నిత్యావసర సరుకుల ధరలు కూడా సామాన్యులకు అందుబాటులో ఉండేలా ప్రభుత్వం చర్యలు తీసుకుంటోంది. డిసెంబర్ 1 నుంచి రేషన్ దుకాణాల ద్వారా కందిపప్పు కిలో రూ.100కు, గోధుమ పిండి కిలో రూ.25కు, పామాయిల్ లీటర్ రూ.125కు అందించేందుకు ఏర్పాట్లు చేస్తున్నట్లు మంత్రి నాదెండ్ల మనోహర్ తెలిపారు. మరోవైపు రైతు బజార్లలో ఉల్లిపాయలను కిలో రూ.35కు విక్రయిస్తున్నారు. మార్కెట్లో ధరలు పెరిగినప్పుడు ప్రభుత్వం జోక్యం చేసుకుని సరుకులను తక్కువ ధరకు అందించాలని ముఖ్యమంత్రి చంద్రబాబు అధికారులకు సూచించారు. ఇందుకోసం నెలకు రూ.100 కోట్ల వరకు ఖర్చు చేస్తున్నట్లు సమీక్షలో వివరించారు.
మిల్లర్లు, వ్యాపారుల బియ్యం నిల్వలపై నిఘా
బియ్యం ధరలు పెరగడానికి అక్రమ నిల్వలు, సరుకును దాచిపెట్టడం కారణం కాకుండా ప్రభుత్వం పర్యవేక్షణ పెంచుతోంది. కేంద్ర ప్రభుత్వం నవంబర్ 6న జారీ చేసిన ఆదేశాల ప్రకారం బియ్యం, వడ్లు నిల్వ చేసే వ్యాపారులు, టోకు విక్రయదారులు, చిల్లర దుకాణదారులు, మిల్లర్లు తమ నిల్వల వివరాలను కేంద్ర ఆహార నిల్వల వెబ్సైట్లో నమోదు చేయాలి. ప్రతి శుక్రవారం వాటిని అప్డేట్ చేయాలి. బాస్మతి, ఇతర రకాల బియ్యం, ఉప్పుడు బియ్యం, నూకలు, వడ్లు వంటి ఆరు విభాగాలుగా వివరాలు ఇవ్వాలి. నిల్వల వివరాలు తప్పుగా నమోదు చేసినా, నమోదు చేయకపోయినా నిబంధనల ప్రకారం చర్యలు తీసుకునే అవకాశం ఉంది.
బియ్యం నిల్వలకు పరిమితులు
కేంద్రం అనుమతితో ఆంధ్రప్రదేశ్ సహా ఐదు దక్షిణాది రాష్ట్రాలు బియ్యం, వడ్ల నిల్వలపై పరిమితులు విధించవచ్చు. ఆంధ్రప్రదేశ్లో జారీ చేసిన ఆదేశాల ప్రకారం మిల్లర్లు, టోకు వ్యాపారులు, చిల్లర విక్రయదారులు తమ వ్యాపార స్థాయికి అనుగుణంగా మాత్రమే నిల్వలు ఉంచుకోవాలి. వ్యాపార సంస్థలు తమ దగ్గర ఉన్న బియ్యం రకాలు, వాటి ధరలను అందరికీ కనిపించేలా ప్రదర్శించాలి. రెవెన్యూ, పౌరసరఫరాల శాఖ అధికారులు, విజిలెన్స్ సిబ్బంది నిల్వలను తనిఖీ చేయవచ్చు. సరుకు ఎక్కడి నుంచి వచ్చింది? ఎవరికి విక్రయించారు? వంటి వివరాలకు సంబంధించిన పత్రాలను కూడా పరిశీలించవచ్చు. ఈ చర్యలతో బియ్యం అక్రమ నిల్వలు, బ్లాక్ మార్కెటింగ్ను అడ్డుకోవడంతో పాటు మార్కెట్లో సరఫరా పెరిగి ధరలు అదుపులోకి వస్తాయని ప్రభుత్వం భావిస్తోంది.