పెళ్లయిన నెలకే మోసం.. ప్రేమికుడితో కలిసి భర్తను హత్య చేసిన భార్య

నెల క్రితమే పెళ్లి జరిగింది. పెళ్లికి ముందే భార్యకు ఓ బ్యాంకు ఉద్యోగితో వివాహేతర సంబంధం ఉండటమే కాకుండా, ఆ సంబంధం పెళ్లి తర్వాత కూడా కొనసాగింది. ఈ నేపథ్యంలో భర్త హత్యకు గురవడం ఒక షాకింగ్ నేర ఘటనగా మారింది. జోగుళాంబ గద్వాల జిల్లాకు చెందిన ప్రైవేట్ సర్వేయర్ తేజేశ్వర్ (32) ఈ హత్యలో ప్రాణాలు కోల్పోయాడు. పోలీసులు ప్రాథమిక విచారణలో తేజేశ్వర్ భార్య ఐశ్వర్య, ఆమె ప్రియుడు మరియు ఆమె తల్లి హత్యకు కుట్ర పన్నినట్టు అనుమానిస్తున్నారు.

వివరాల్లోకి వెళితే, తేజేశ్వర్‌కు కర్నూలుకు చెందిన ఐశ్వర్యతో ఈ ఏడాది ఫిబ్రవరి 13న వివాహ నిశ్చయమైంది. అయితే పెళ్లికి ఐదు రోజుల ముందు ఐశ్వర్య ఆకస్మికంగా అదృశ్యమైంది. అందరూ ఆమె తన ప్రియుడి దగ్గరకు వెళ్లిపోయిందని అనుకున్నారు. కానీ ఫిబ్రవరి 16న ఆమె తిరిగి వచ్చి తేజేశ్వర్‌తో ఫోన్‌లో మాట్లాడింది. ఎవరితోనూ సంబంధం లేదని, కట్న బాధలు తట్టుకోలేక స్నేహితురాలి ఇంటికి వెళ్లానని చెప్పింది. తేజేశ్వర్‌ను ప్రేమిస్తానని చెప్పి ఏడ్చడంతో అతడు ఆమెను పెళ్లి చేసుకోవడానికి ఒప్పుకున్నాడు.

తల్లిదండ్రుల అభ్యంతరాలను లెక్కచేయకుండా మే 18న తేజేశ్వర్-ఐశ్వర్య వివాహం జరిగింది. కానీ పెళ్లైన రెండో రోజు నుంచే మధ్యలో గొడవలు మొదలయ్యాయి. ఐశ్వర్య భర్తను పట్టించుకోకుండా ఎప్పుడూ ఫోన్‌లో మాట్లాడుతుండడంతో తేజేశ్వర్ అనుమానంతో బాధపడేవాడు. జూన్ 17న తేజేశ్వర్ కనిపించకుండా పోవడంతో అతని సోదరుడు పోలీసులకు ఫిర్యాదు చేశాడు.

గాలింపు చర్యల్లో భాగంగా ఏపీలోని పాణ్యం ప్రాంతంలో తేజేశ్వర్ మృతదేహం లభించింది. విచారణలో, ఐశ్వర్య తల్లి సుజాత అదే బ్యాంకులో స్వీపర్‌గా పనిచేస్తున్నదని, ఆమెకు కూడా అదే ఉద్యోగితో వివాహేతర సంబంధం ఉందని తేలింది. ఆ ఉద్యోగి క్రమంగా ఐశ్వర్యతోనూ సన్నిహితమయ్యాడు. పెళ్లి తరువాత కూడా ఐశ్వర్య అతనితో 2,000 సార్లు ఫోన్‌లో మాట్లాడినట్టు పోలీసులు గుర్తించారు.

తేజేశ్వర్‌ను హత్య చేస్తే అతని ఆస్తిని పొందగలమని భావించి కుట్ర పన్నారు. ఆ బ్యాంకు ఉద్యోగి హత్యకు కొందరికి సుపారీ ఇచ్చినట్టు తెలుస్తోంది. జూన్ 17న సర్వే కోసం అని నమ్మించి తేజేశ్వర్‌ను కారులో తీసుకెళ్లి, అక్కడే గొంతు కోసి హత్య చేశారు. అనంతరం శవాన్ని సుగాలిమెట్టు వద్ద పడేశారు.

ప్రస్తుతం ఆ బ్యాంకు ఉద్యోగి పరారీలో ఉండగా, ఐశ్వర్య మరియు ఆమె తల్లి సుజాతను పోలీసులు అరెస్టు చేశారు. కేసు దర్యాప్తులో ఉంది.