Virat Kohli: కోహ్లీ దెబ్బకు హేమాహేమీల రికార్డుల గల్లంతు.. దటీజ్ కింగ్‌ తమ్ముడు!

ఐపీఎల్ 2025లో చెన్నై సూపర్ కింగ్స్‌పై ఆడిన మ్యాచ్‌లో విరాట్ కోహ్లీ చరిత్రను తిరగరాశాడు. బెంగళూరులోని ఛిన్నస్వామి స్టేడియంలో జరిగిన ఈ మ్యాచ్‌లో కోహ్లీ 33 బంతుల్లో 62 పరుగులు బాదుతూ ఐదు సిక్సర్లు, ఐదు ఫోర్లు కొట్టాడు. జాకబ్ బెథెల్‌తో కలిసి మొదటి వికెట్‌కు 97 పరుగుల భాగస్వామ్యం నెలకొల్పాడు.

ఈ ఇన్నింగ్స్‌తో ఐపీఎల్‌లో ఒకే ఫ్రాంచైజీకి 300 సిక్సర్లు కొట్టిన మొట్టమొదటి ఆటగాడిగా కోహ్లీ అరుదైన ఘనత సాధించాడు. ఇప్పటివరకు ఈ ఘనత ఎవరూ సాధించలేదు. ఈ జాబితాలో రెండో స్థానంలో క్రిస్ గేల్ ఉన్నాడు. అతను ఆర్సీబీ తరఫున 263 సిక్సర్లు కొట్టాడు.

కోహ్లీ మరోసారి మరో రికార్డు బద్దలుకొట్టాడు. ఐపీఎల్‌లో ఒకే ప్రత్యర్థి జట్టుపై అత్యధిక పరుగులు చేసిన ఆటగాడిగా ఎదిగాడు. చెన్నైపై అతని మొత్తం పరుగుల సంఖ్య ఇప్పుడు 1146. ఇదివరకు డేవిడ్ వార్నర్ పంజాబ్ కింగ్స్‌పై 1134 పరుగులతో టాప్‌లో ఉన్నాడు.

ఐపీఎల్‌లో ఒకే జట్టుపై అత్యధిక పరుగులు:

1146 – విరాట్ కోహ్లీ vs చెన్నై

1134 – డేవిడ్ వార్నర్ vs పంజాబ్

1130 – విరాట్ కోహ్లీ vs ఢిల్లీ

1104 – విరాట్ కోహ్లీ vs పంజాబ్

1093 – డేవిడ్ వార్నర్ vs కోలకతా

1083 – రోహిత్ శర్మ vs కోలకతా

కోహ్లీ మరో కీలక రికార్డును తిరగరాశాడు. బెంగళూరులోని ఛిన్నస్వామి మైదానంలో టీ20ల్లో అత్యధిక సిక్సర్లు కొట్టిన ఆటగాడిగా మారాడు. అతను అక్కడ 154 సిక్సర్లు కొట్టగా, క్రిస్ గేల్ 151 సిక్సర్లతో రెండో స్థానంలో ఉన్నాడు.

ఒకే మైదానంలో అత్యధిక టీ20 సిక్సర్లు:

154 – కోహ్లీ @ బెంగళూరు

151 – గేల్ @ బెంగళూరు

138 – గేల్ @ మిర్‌పూర్

135 – అలెక్స్ హేల్స్ @ నాటింగ్హమ్

122 – రోహిత్ శర్మ @ వాంఖడే

చెన్నైపై ఐపీఎల్‌లో 10 హాఫ్ సెంచరీలు చేసిన ఆటగాడిగా కూడా కోహ్లీ గుర్తింపు పొందాడు. ఈ అరుదైన రికార్డును అతడు షిఖర్ ధావన్, వార్నర్, రోహిత్ శర్మలతో పోటీగా అధిగమించాడు.

ఇక ఈ మ్యాచ్‌తో ఈ సీజన్‌లో కోహ్లీ మొత్తం పరుగుల సంఖ్య 505కి చేరింది. ఐపీఎల్ చరిత్రలో 500+ పరుగులు చేసిన అత్యధిక సీజన్ల సంఖ్య (8 సార్లు) కోహ్లీ ఖాతాలోనే ఉంది. వీటన్నింటినీ కలిపితే, విరాట్ కోహ్లీ ఒక్క ఇన్నింగ్స్‌లో ఐదు కీలక రికార్డులను తిరగరాస్తూ, మరోసారి తన సామర్థ్యాన్ని నిరూపించుకున్నాడు.