IND vs SA : 39 ఏళ్ల చరిత్ర.. పాకిస్తాన్ రికార్డును సౌతాఫ్రికా బ్రేక్ చేస్తుందా? ఓటమి ప్రమాదంలో టీమిండియా

IND vs SA : సుమారు 25 ఏళ్ల తర్వాత దక్షిణాఫ్రికా చేతిలో సొంత గడ్డపై టెస్ట్ సిరీస్‌ను కోల్పోయిన భారత జట్టు ముందు ఇప్పుడు మరో పెద్ద సవాలు నిలబడి ఉంది. శనివారం, డిసెంబర్ 6న విశాఖపట్నంలో వన్డే సిరీస్‌లో మూడో, చివరి మ్యాచ్ జరగనుంది. తొలి మ్యాచ్‌లో భారత్, రెండో మ్యాచ్‌లో దక్షిణాఫ్రికా గెలవడంతో సిరీస్ ప్రస్తుతం 1-1తో సమంగా ఉంది. వైజాగ్‌లో జరిగే ఈ మ్యాచ్ గెలిచిన జట్టు ట్రోఫీని కైవసం చేసుకుంటుంది. ఈ కీలక పోరులో గెలుపు ఇరు జట్లకు సమానమే అయినా, టీమిండియాకు మాత్రం ఇది పరువును నిలబెట్టుకోవాల్సిన సవాలు. ఎందుకంటే, 39 ఏళ్ల నాటి పాత చరిత్ర ఇప్పుడు పునరావృతమయ్యే ప్రమాదం వెంటాడుతోంది.

39 ఏళ్ల నాటి ఆ పాకిస్తాన్ రికార్డు ఏంటి?

టెస్ట్ సిరీస్‌ను 0-2 తేడాతో ఓడిపోయిన టీమిండియా, కనీసం వన్డే సిరీస్‌నైనా గెలిచి కొంతమేర భర్తీ చేయాలని చూస్తోంది. అయితే ఇక్కడ అసలు సవాలు ఏంటంటే, గత 39 ఏళ్లుగా టీమ్ ఇండియా సొంతగడ్డపై ఒకే జట్టుకు వ్యతిరేకంగా టెస్ట్, వన్డే సిరీస్‌లను రెండింటినీ ఓడిపోలేదు. చివరిసారిగా 1986-87లో పాకిస్తాన్ జట్టు భారత్‌లో పర్యటించినప్పుడు, 1-0 తేడాతో టెస్ట్ సిరీస్, 5-1 తేడాతో వన్డే సిరీస్ రెండింటినీ గెలిచి చరిత్ర సృష్టించింది. దక్షిణాఫ్రికా ఇప్పటికే టెస్ట్ సిరీస్‌ను ఓడించింది, ఇప్పుడు ఈ వన్డే సిరీస్‌ను కూడా గెలిస్తే 39 ఏళ్ల తర్వాత పాకిస్తాన్ సృష్టించిన ఆ చారిత్రక ఘనతను దక్షిణాఫ్రికా పునరావృతం చేసే అవకాశం ఉంటుంది.

టీమిండియా ముందు సవాళ్లు

ఈ చివరి వన్డే టీమ్ ఇండియాకు చాలా కష్టంగా మారనుంది. గత రెండు మ్యాచ్‌లలో మంచు ప్రభావం చాలా ఎక్కువగా ఉండటం వల్ల, రెండో ఇన్నింగ్స్‌లో లక్ష్యాన్ని కాపాడుకోవడం చాలా కష్టంగా మారింది. రెండో వన్డేలో భారత్ 358 పరుగులు చేసినా గెలవలేకపోయింది. దీనికి తోడు టీమిండియా గత వరుసగా 20 వన్డే మ్యాచ్‌లలో టాస్ ఓడిపోయింది. ఈ మ్యాచ్‌లో కూడా టాస్ గెలిచే అవకాశం తక్కువే. టాస్ ఓడి, రెండోసారి బౌలింగ్ చేయాల్సి వస్తే డ్యూ ప్రభావం వల్ల బౌలర్లకు మరింత కష్టంగా మారుతుంది. అందుకే కేఎల్ రాహుల్ నాయకత్వంలోని భారత జట్టు ఈ 39 ఏళ్ల రికార్డును కాపాడుకోవడానికి తమ శక్తి మేరకు పోరాడాల్సి ఉంటుంది.