T20 Champions League: 12 ఏళ్ల తర్వాత మళ్లీ షురూ కాబోతున్న ఆ టీ20 లీగ్

T20 Champions League : సింగపూర్‌లో జరుగుతున్న ఐసీసీ సమావేశం నుండి ఒక కీలక సమాచారం వెలుగులోకి వచ్చింది. ఇప్పుడు చాలా దేశాల్లో టీ20 లీగ్‌లు జరుగుతున్నాయి. ఇప్పుడు మరో టీ20 లీగ్ తిరిగి రాబోతోంది. ఈ లీగ్‌ను 2014 తర్వాత ఆపేశారు. కానీ ఇప్పుడు ఇది మళ్ళీ ప్రారంభం కానుంది. ఈ లీగ్‌లో అనేక దేశాల ఫ్రాంచైజీ జట్లు పాల్గొనడం విశేషం. ఈ లీగ్ ఒకప్పుడు క్రికెట్ ప్రపంచం దృష్టిని ఆకర్షించి, టీ20 ఫార్మాట్ ప్రజాదరణను పెంచింది. గత రెండు దశాబ్దాలుగా టీ20 క్రికెట్ క్రికెట్ ప్రపంచాన్ని పూర్తిగా మార్చేసింది. థ్రిల్లింగ్ మ్యాచ్‌లు, ఎంటర్టైన్మెంట్ దీనిని అభిమానులకి దగ్గరగా చేశాయి. ఇప్పుడు టీ20 ఛాంపియన్స్ లీగ్ కూడా తిరిగి రాబోతోంది. ఇందులో ప్రపంచంలోని టాప్ టీ20 ఫ్రాంచైజీ జట్లు ఒకదానితో ఒకటి తలపడతాయి. వచ్చే ఏడాది సెప్టెంబర్‌లో టీ20 ఛాంపియన్స్ లీగ్‌ను మళ్లీ ప్రారంభించనున్నారు.

టీ20 ఛాంపియన్స్ లీగ్ మొదటి సీజన్ 2008లో ప్రారంభమైంది. చివరి సీజన్ 2014లో జరిగింది. చివరి సీజన్‌ను ఎంఎస్ ధోనీ కెప్టెన్సీలోని చెన్నై సూపర్ కింగ్స్ జట్టు గెలుచుకుంది. ఐసీసీ సమావేశంలో ఛాంపియన్స్ లీగ్ టీ20 తిరిగి తీసుకురావడంపై సభ్యుల మధ్య చర్చ జరిగిందని ది సిడ్నీ మార్నింగ్ హెరాల్డ్ నివేదించింది. ఐసీసీ సభ్యులు ఈ టీ20 టోర్నమెంట్‌ను మళ్లీ ప్రారంభించడానికి ఏకగ్రీవంగా అంగీకరించారు. వచ్చే ఏడాది సెప్టెంబర్‌లో దీన్ని తిరిగి తీసుకురావాలని ప్లాన్ చేస్తున్నట్లు నివేదికలో పేర్కొన్నారు.

ఛాంపియన్స్ లీగ్ తిరిగి రావడం ఆటగాళ్ల ముందు ఒక పెద్ద సవాలును కూడా ఉంచుతుంది. ప్రపంచంలోని కొన్ని టాప్ టీ20 ఆటగాళ్లు ప్రతి సంవత్సరం కనీసం రెండు, చాలాసార్లు నాలుగు లేదా ఐదు వేర్వేరు ఫ్రాంచైజీ లీగ్‌లలో పాల్గొంటారు. ఇలాంటి పరిస్థితుల్లో టీ20 ఛాంపియన్స్ లీగ్‌లో వారు ఏ క్లబ్ కోసం ఆడాలి అనేది వారు నిర్ణయించుకోవాల్సి ఉంటుంది.