IPL 2025: ఐపీఎల్ చరిత్రలో మరో రిటైర్డ్ అవుట్.. తిలక్‌ను వెనక్కి పిలిచినదెవరు?

IPL 2025: లక్నో సూపర్ జెయింట్స్‌తో జరిగిన మ్యాచ్‌లో తిలక్ వర్మ తన పేలవమైన బ్యాటింగ్‌ కారణంగా 19వ ఓవర్‌లోనే రిటైర్డ్ అవుట్‌గా వెనుదిరగాల్సి వచ్చింది. ఒక్కో పరుగు చేయడానికి కూడా అతను చాలా ఇబ్బంది పడ్డాడు. బౌండరీలు బాది మ్యాచ్ గెలిపించే అతని ప్రయత్నాలన్నీ విఫలమయ్యాయి. దీంతో ముంబై ఇండియన్స్ యాజమాన్యం ఈ నిర్ణయం తీసుకుంది. అతని స్థానంలో మిచెల్ సాంట్నర్ బ్యాటింగ్‌కు దిగాడు. కానీ దాని వల్ల కూడా ఫలితం లేకపోయింది. చివరికి ముంబై ఓటమిని చవిచూడాల్సి వచ్చింది. మ్యాచ్ అనంతరం పలువురు క్రికెట్ నిపుణులు ఇది సరైన నిర్ణయం కాదని అభిప్రాయపడ్డారు. అయితే, కెప్టెన్ హార్దిక్ పాండ్యా చెప్పాడా లేక హెడ్ కోచ్ మహేల జయవర్ధనే ఆదేశించాడా, తిలక్‌ను రిటైర్డ్ అవుట్ చేసింది ఎవరు అనే ప్రశ్న ఇప్పుడు అందరి మదిలో మెదులుతోంది.

హెడ్ కోచ్ వెనక్కి పిలవడానికి కారణం ఇదే

లక్నో సూపర్ జెయింట్స్‌తో ఓటమి తర్వాత ముంబై ఇండియన్స్ హెడ్ కోచ్ స్వయంగా తిలక్ వర్మను రిటైర్డ్ అవుట్ చేసి వెనక్కి పిలవాలనే నిర్ణయం తనదేనని వెల్లడించాడు. ఇది ఒక వ్యూహంలో భాగంగానే చేశానని ఆయన తెలిపాడు. మ్యాచ్ పరిస్థితిని బట్టి ఫుట్‌బాల్‌లో మాదిరిగా తిలక్ వర్మను వెనక్కి పిలిచానని ఆయన చెప్పాడు. ఫుట్‌బాల్ మ్యాచ్‌లో మేనేజర్ చివరి నిమిషంలో తన సబ్‌స్టిట్యూట్ ఆటగాడిని మైదానంలోకి దించుతాడు. అదేవిధంగా క్రికెట్‌లో కూడా ఒక కొత్త ప్రయోగం చేయాలని ప్రయత్నించానని, అది చాలా ఆసక్తికరంగా ఉంటుందని ఆయన అభిప్రాయపడ్డాడు.

వాస్తవానికి, ముంబై చివరి 2 ఓవర్లలో 29 పరుగులు చేయాల్సి ఉంది. అయితే నిలకడగా పరుగులు చేయడానికి ఇబ్బంది పడుతున్న తిలక్ వర్మ ఈ ఓవర్‌లో కూడా బౌండరీ కొట్టలేకపోవడంతో ఐదో బంతి తర్వాత అతన్ని రిటైర్డ్ అవుట్ చేయాలని నిర్ణయించారు. అతను 23 బంతుల్లో కేవలం 25 పరుగులు మాత్రమే చేసి మైదానం వీడాల్సి వచ్చింది. ఈ విధంగా అతను ఐపీఎల్ చరిత్రలో రిటైర్డ్ అవుట్ అయిన రెండవ బ్యాట్స్‌మెన్‌గా నిలిచాడు. అతని కంటే ముందు 2022లో రవిచంద్రన్ అశ్విన్ రాజస్థాన్ తరపున ఆడుతూ లక్నోతో జరిగిన మ్యాచ్‌లోనే రిటైర్డ్ అవుట్ అయ్యాడు.

హార్దిక్‌పై ప్రశ్నలు

తిలక్‌ను రిటైర్డ్ అవుట్ చేసినప్పుడు మొదట హార్దిక్ పాండ్యాపైనే ప్రశ్నలు తలెత్తాయి. సాధారణంగా క్రికెట్‌లో ఇలాంటి పెద్ద నిర్ణయాలు కెప్టెనే తీసుకుంటాడు. తిలక్‌ను బయటకు పంపిన సమయం, అతని స్థానంలో సాంట్నర్‌ను పంపడంపై నిపుణులు సందేహాలు వ్యక్తం చేశారు. అంతకుముందు గుజరాత్ టైటాన్స్‌తో జరిగిన మ్యాచ్‌లో హార్దిక్ పాండ్యా కూడా నెమ్మదిగా ఆడాడని వారు గుర్తు చేశారు. అతను 17 బంతుల్లో కేవలం 11 పరుగులు మాత్రమే చేయగలిగాడు. అప్పుడు అలాంటి నిర్ణయం తీసుకోలేదని వారు ప్రశ్నించారు. ఒకవేళ తిలక్‌ను బయటకు పంపాలనుకుంటే 2-3 ఓవర్ల ముందే ఈ చర్య తీసుకోవాల్సిందని వారు అభిప్రాయపడ్డారు.