ICC: క్రికెట్ ప్రపంచంలోకి రెండు కొత్త జట్లు.. ఐసీసీ సంచలన ప్రకటన!

ICC: క్రికెట్ అభిమానులకు శుభవార్త. జూలై 20, 2025న సింగపూర్‌లో జరిగిన అంతర్జాతీయ క్రికెట్ కౌన్సిల్ వార్షిక సమావేశం తర్వాత క్రికెట్ ప్రపంచంలో ఒక చారిత్రాత్మక నిర్ణయం వెలువడింది. ఐసీసీ తన కుటుంబంలోకి రెండు కొత్త దేశాలను అసోసియేట్ సభ్యులుగా చేర్చుకుంది. ఈ నిర్ణయంతో ఐసీసీ మొత్తం సభ్యుల సంఖ్య ఇప్పుడు 110కి చేరింది. క్రికెట్‌ను ప్రపంచ స్థాయిలో మరింత ప్రాచుర్యం కల్పించడానికి, కొత్త ప్రాంతాల్లో దాని అభివృద్ధిని ప్రోత్సహించడానికి ఇది ఒక ముఖ్యమైన అడుగు.

తైమూర్, జాంబియా దేశాలు ఐసీసీకి కొత్త సభ్యులుగా మారాయి. ఐసీసీ ఒక పత్రికా ప్రకటనలో ఈ విషయాన్ని అధికారికంగా ప్రకటించింది. తైమూర్-లెస్టే క్రికెట్ ఫెడరేషన్, జాంబియా క్రికెట్ యూనియన్లను ఐసీసీ అసోసియేట్ సభ్యులుగా చేర్చారు. ఐసీసీ మాట్లాడుతూ.. "రెండు కొత్త సభ్యులు ఐసీసీ ఫ్యామిలీలో చేరారు. దీంతో మొత్తం సభ్యుల సంఖ్య 110కి చేరింది. ఇందులో తైమూర్-లెస్టే క్రికెట్ ఫెడరేషన్, జాంబియా క్రికెట్ యూనియన్ అధికారికంగా ఐసీసీ అసోసియేట్ సభ్యులుగా మారారు" అని తెలిపింది.

జాంబియా: ఐసీసీలో చేరిన 22వ ఆఫ్రికన్ దేశంగా జాంబియా నిలిచింది. ఇది జాంబియా క్రికెట్‌కు ఒక కొత్త ఆరంభం.

తైమూర్-లెస్టే: మరోవైపు, తైమూర్-లెస్టే ఇప్పుడు తూర్పు ఆసియా పసిఫిక్ ప్రాంతంలో 10వ అసోసియేట్ సభ్య దేశం. 2003లో ఫిలిప్పీన్స్ చేరిన 22 సంవత్సరాల తర్వాత, ఈ ప్రాంతం నుండి ఐసీసీలో చేరిన మొదటి దేశం తైమూర్-లెస్టే. తైమూర్-లెస్టేలో క్రికెట్ ఇటీవలి సంవత్సరాల్లోనే ప్రారంభమైంది. అక్కడ యువతలో ఈ ఆట వేగంగా ప్రాచుర్యం పొందుతోంది. ఇప్పుడు తైమూర్-లెస్టేకు పెద్ద అంతర్జాతీయ టోర్నమెంట్‌లలో ఆడే అవకాశం లభిస్తుంది.

జాంబియా క్రికెట్ యూనియన్ ఐసీసీలో తిరిగి చేరడం ఒక స్ఫూర్తిదాయకమైన కథ. జాంబియాకు 2003లోనే ఐసీసీ అసోసియేట్ సభ్యత్వం లభించింది. అయితే, 2019లో పాలన, నిబంధనల ఉల్లంఘన సమస్యల కారణంగా దాని సభ్యత్వం రద్దు చేయబడింది. 2021లో జాంబియాను ఐసీసీ నుండి బహిష్కరించారు. కానీ ఇప్పుడు నాలుగు సంవత్సరాల తర్వాత జాంబియా తమ పరిపాలన, సంస్థాగత లోపాలను సరిదిద్దుకొని మళ్ళీ అసోసియేట్ సభ్యత్వాన్ని సాధించింది. ఇది జాంబియా క్రికెట్ చరిత్రలో ఒక కొత్త అధ్యాయం.