Beetal Goat: రోజుకు 2.5 లీటర్ల పాలిచ్చే బీటల్ మేక... రైతులకు డబుల్ ఆదాయం! ధర తెలుసుకుంటే ఆశ్చర్యపోతారు

Beetal Goat: సాధారణంగా మేకలు రోజుకు 500 మిల్లీలీటర్ల నుంచి ఒక లీటర్ వరకు పాలు ఇస్తాయని చాలా మందికి తెలిసిందే. కానీ హైదరాబాద్‌ చార్మినార్ సమీపంలోని గుల్జార్ హౌస్ ప్రాంతంలో ఓ స్థానికుడు పెంచుతున్న అరుదైన మేక మాత్రం రోజుకు 2.5 లీటర్ల వరకు పాలు ఇస్తోంది. ఇది రైతులకు అధిక ఆదాయాన్ని కలిగించగలటంతో, బీటల్ జాతికి చెందిన ఈ మేక ప్రస్తుతం చర్చనీయాంశమైంది.

ఖదీర్ అనే వ్యక్తి పెంచుతున్న ఈ మేక ఆకర్షణీయమైన బారెడు పొడవైన చెవులతో ఉన్నది. అధిక పాల ఉత్పత్తి లక్ష్యంగా ప్రత్యేక శ్రద్ధతో దీనిని పెంచుతున్నట్టు ఆయన తెలిపారు. బీటల్ మేకలు ప్రాథమికంగా పాకిస్థాన్‌లోని సింధ్ ప్రాంతానికి చెందినవైనా, భారతదేశంలో పంజాబ్, హర్యానా రాష్ట్రాల్లో విస్తృతంగా లభిస్తున్నాయి. పాలు, మాంసం కోసం వీటిని పెంచడం జరుగుతోంది.

చెవుల పొడవుతో ఆకట్టుకునే జాతి

బీటల్ మేకలు వంకరగా ఉండే పొడవైన చెవులతో ఉండే జాతి. సాధారణ మేకల చెవులు 3–4 సెంటీమీటర్ల పరిమాణంలో ఉంటే, బీటల్ మేకల చెవులు 15 సెంటీమీటర్లకు పైగా ఉంటాయి. శరీరం పెద్ద పరిమాణంలో ఉండి, మెరిసే చర్మం, కాఫీ రంగుతో ఆకట్టుకుంటుంది. కొన్నిసార్లు తెల్లటి మచ్చలు కూడా కనిపిస్తాయి.

వీటి చెవులు శరీర ఉష్ణోగ్రత నియంత్రణలో సహాయపడతాయి. వీటి రోగనిరోధక శక్తి బలంగా ఉండటంతో పెంపకందారులకు నిర్వహణ ఖర్చులు తక్కువగా ఉంటాయి. వేడి, పొడి వాతావరణానికి బాగా అనుకూలంగా ఉండే ఈ మేకలు భారతీయ వాతావరణానికి అనుకూలంగా ఉంటాయి.

పాల ఉత్పత్తితో పాటు ఆదాయ మార్గం

రోజుకు 2.5 లీటర్ల వరకు పాలు ఇచ్చే ఈ మేక రైతులకు అదనపు ఆదాయాన్ని అందించగలదు. దీంతో పాలు అమ్మడం ద్వారా నెలకు వేల రూపాయల ఆదాయం పొందవచ్చు. పాలతో పాటు, బ్రీడింగ్ కోసం కూడా వీటి డిమాండ్ ఎక్కువగానే ఉంది.

ధర ఎంతంటే..?

బీటల్ మేకల ధరలు వాటి వయస్సు, ఆరోగ్యం, బరువు, జాతి స్వచ్ఛత ఆధారంగా మారుతాయి. సాధారణంగా ఒక మేక ధర రూ.15,000 నుంచి రూ.60,000 వరకు ఉండగా, అధిక పాల ఉత్పత్తి చేసే మేకలు, పోటేలు అయితే రూ.లక్షలకు పైగానే ధర పలుకుతున్నాయి.

ప్రభుత్వ ప్రోత్సాహంతో మరింత విస్తరణ

భారత ప్రభుత్వం 'జాతీయ లైవ్‌స్టాక్ మిషన్' వంటి పథకాల ద్వారా మేకల పెంపకాన్ని ప్రోత్సహిస్తోంది. ఈ పథకాల ద్వారా 50 శాతం వరకు సబ్సిడీ లభిస్తుంది. ఇది చిన్న రైతులకు మంచి అవకాశం.

వ్యాపారంగా మారిన మేకల పెంపకం

తక్కువ పెట్టుబడి, తక్కువ నిర్వహణతో అధిక లాభాల ఆశతో చాలా మంది యువ రైతులు, వ్యవసాయ సంబంధిత వ్యాపారవేత్తలు మేకల పెంపకాన్ని వాణిజ్య స్థాయిలో చేపడుతున్నారు. దేశవ్యాప్తంగా అనేక మేకల సంతలు, ఆన్‌లైన్ మార్కెట్లు కూడా వీటి కొనుగోలు, అమ్మకాల కోసం అందుబాటులో ఉన్నాయి.