SBI QIP: దేశంలోనే అతిపెద్ద వాటా విక్రయం – రూ.25 వేల కోట్ల నిధుల సమీకరణ ప్రారంభం

స్టేట్ బ్యాంక్ ఆఫ్ ఇండియా (ఎస్‌బీఐ) రూ.25 వేల కోట్ల క్వాలిఫైడ్ ఇన్‌స్టిట్యూషనల్ ప్లేస్‌మెంట్‌ (QIP) ద్వారా నిధుల సమీకరణను అధికారికంగా ప్రారంభించింది. ఈ ప్రక్రియతో దేశంలోనే అతిపెద్ద క్యూఐపీ ఆధారిత వాటా విక్రయంగా రికార్డు సృష్టించనున్నట్లు భావిస్తున్నారు.

తక్కువ ధరకు షేర్ల విక్రయం

ఎస్‌బీఐ డైరెక్టర్ల బోర్డు జూలై 16, 2025న సమావేశమై క్యూఐపీని ప్రారంభించేందుకు ఆమోదం తెలిపింది. ఈ క్రమంలో ఒక్కో షేరుకు ఫ్లోర్ ప్రైస్‌ను రూ.811.05గా నిర్ణయించారు. అంటే ప్రస్తుత మార్కెట్‌ ధరతో పోలిస్తే 2.3% తక్కువ ధరకు షేర్లు విక్రయించనున్నారు. అయితే, తుది ఇష్యూ ధరను బుక్ రన్నింగ్ లీడ్ మేనేజర్లతో సంప్రదించిన తర్వాత నిర్ణయించనున్నారు. 5% కంటే ఎక్కువ డిస్కౌంట్ ఇవ్వబోమని బ్యాంక్ స్పష్టం చేసింది.

స్టాక్ మార్కెట్‌లో సానుకూల ప్రభావం

క్యూఐపీ ప్రకటనతో ఎస్‌బీఐ షేర్లు లాభాల్లో ట్రేడయ్యాయి. ఎన్ఎస్ఈలో 1.72% పెరిగి రూ.830.50 వద్ద, బీఎస్ఈలో 1.81% లాభంతో రూ.831.55 వద్ద ముగిశాయి. ఈ ఏడాదిలో ఇప్పటివరకు షేర్ ధర 5% పెరిగినప్పటికీ, గత ఏడాది కాలంలో 6% తగ్గింది. కానీ గత ఐదు సంవత్సరాల్లో ఎస్‌బీఐ షేర్లు 347% రాబడిని అందించాయి.

భవిష్యత్ ప్రణాళికలు

ఈ ఏడాది మేలోనే ఎస్‌బీఐ బోర్డు రూ.25 వేల కోట్ల నిధుల సమీకరణకు ఆమోదం తెలిపింది. ఈ నిధులను క్యూఐపీ, ఫాలో-ఆన్ పబ్లిక్ ఆఫర్ (FPO) లేదా ఇతర మార్గాల ద్వారా 2025-26 ఆర్థిక సంవత్సరం చివరి నాటికి సమీకరించాలని నిర్ణయించారు. అదనంగా, రూ.20 వేల కోట్లను టైర్-1, టైర్-2 బాండ్ల ద్వారా సమీకరించేందుకు కూడా బోర్డు ఆమోదం తెలిపింది. దీనికి కేంద్ర ప్రభుత్వ అనుమతి అవసరం.