ఉల్లిపాయల కొరత సృష్టిస్తే చర్యలు: మంత్రి మోపిదేవి

మార్కెట్‌లో కృత్రిమ కొరతను సృష్టించి ఉల్లిపాయలను అధిక ధరలకు అమ్మే వారిపై ప్రభుత్వం కఠినమైన చర్యలు తీసుకుంటుందని మార్కెటింగ్, మత్స్యశాఖ మంత్రి మోపిదేవి వెంకట రమణరావు అన్నారు. గురువారం ఆర్‌అండ్‌బి గెస్ట్‌హౌస్‌లో మీడియాతో మాట్లాడిన మోపిదేవి, రైతు బజార్లలో వినియోగదారులకు ఉల్లిపాయలను కిలోకు రూ .25 చొప్పున ప్రభుత్వం అందిస్తున్నట్లు చెప్పారు. డిసెంబర్‌కు 200 మెట్రిక్ టన్నుల ఉల్లిపాయలు అవసరమని భావించి.. షోలాపూర్, కర్నూలు మార్కెట్ల నుంచి ప్రభుత్వం 150 మెట్రిక్ టన్నుల ఉల్లిపాయలను కొనుగోలు చేసిందని ఆయన చెప్పారు.

ప్రభుత్వం 24,416 క్వింటాల్ ఉల్లిపాయలను రూ .14 కోట్లకు కొనుగోలు చేసిందని, అందులో రూ .8 కోట్లు మార్కెట్ ఇంటర్వెన్షన్ వాడినట్టు ఆయన వెల్లడించారు. ప్రస్తుతం దేశం ఎదుర్కొంటున్న అతి పెద్ద సమస్య ఉల్లిపాయల ధర అని. పంటకోత సమయంలో భారీ వర్షాలు కురవడం వలనే భారీగా పంట నష్టం వాటిల్లిందని మోపిదేవి అన్నారు. వినియోగదారులకు ఇబ్బందులు లేకుండా మార్కెటింగ్ విభాగం నాఫెడ్ ద్వారా ఉల్లిపాయలను అధిక ధరకు కొనుగోలు చేసి, వినియోగదారులకు కిలోకు రూ .25 చొప్పున సరఫరా చేస్తున్నామని.. అలాగే కేంద్ర ప్రభుత్వం టర్కీ, ఈజిప్ట్ నుండి ఉల్లిపాయలను దిగుమతి చేసుకుంటుందని ఆయన తెలిపారు.