Telangana Politics: కాంగ్రెస్ లోకి పొంగులేటి, జూపల్లి..!

Telangana Politics: మాజీ ఎంపీ పొంగులేటి, మాజీ మంత్రి జూపల్లి కాంగ్రెస్ పార్టీలో చేరనున్నారు. ఈ నెల 25 లేదా 26న ఖమ్మంలో జరగనున్న భారీ బహిరంగ సభకు రాహుల్ గాంధీ లేదా ప్రియాంక వచ్చే అవకాశం ఉంది. ఈ సభలో ఇరువురు నేతలు కాంగ్రెస్ పార్టీలో చేరనున్నారని తెలుస్తోంది. అనుచరులతో సహా పొంగులేటి, జూపల్లి.. అగ్రనేతల సమక్షంలోనే హస్తం గూటికి చేరనున్నారు.

బీజేపీ, కాంగ్రెస్ పార్టీలకు చెందిన సీనియర్ నేతలు ఈ ఇరువురి నేతలతో గత కొంత కాలంగా చర్చలు జరుపుతున్నా.. ఏ పార్టీలో చేరుతున్నారనే దానిపై పొంగులేటి, జూపల్లి క్లారిటీ ఇవ్వలేదు. అయితే, కాంగ్రెస్ తరపున రాహుల్ గాంధీ టీం ఇటీవల పొంగులేటితో చర్చలు జరిపారు. దీంతో ఆయన కాంగ్రెస్ పార్టీ వైపు మెుగ్గు చూపుతున్నారనే ప్రచారం జరిగింది.

గత కొంతకాలంగా ఏ పార్టీలో చేరాలనే దానిపై ఎలాంటి నిర్ణయం తీసుకోని జూపల్లి, పొంగులేటి.. ఇప్పుడు హస్తం గూటికి చేరేందుకు సిద్ధమవుతున్నారని తెలుస్తోంది. ఇప్పటికే పొంగులేటి పలు ఆత్మీయ సమావేశాలు నిర్వహించారు. ఈ సమావేశాలతో బీఆర్ఎస్ అసంతృప్త నేతలతో ఏకతాటిపైకి తీసుకురావాలనేది పొంగులేటి, జూపల్లి వ్యూహంగా తెలుస్తోంది. అయితే ఖమ్మంలో కాంగ్రెస్‌ బలంగా ఉండటం, కర్ణాటక గెలుపుతో రాష్ట్రంలో పుంజుకునే అవకాశం ఉండటంతో హస్తం పార్టీలో చేరాలని పొంగులేటి, జూపల్లి నిర్ణయించుకున్నట్లు ఆయన సన్నిహితులు చెబుతున్నారు.