KTR: నేడు కామారెడ్డి జిల్లాలో మంత్రి కేటీఆర్ పర్యటన

KTR: నేడు కామారెడ్డి జిల్లాలో మంత్రి కేటీఆర్ పర్యటించనున్నారు. నిజాంసాగర్, పిట్లం మండలాల్లో పలు అభివృద్ధి పనులకు మంత్రి కేటీఆర్ ప్రారంభోత్సవాలు, శంకుస్థాపన చేయనున్నారు. ఈ మేరకు జుక్కల్ ఎమ్మెల్యే హన్మంత్ షిండేతో పాటు అధికారులు ఏర్పాట్లు పూర్తి చేశారు. ముందుగా నిజాంసాగర్ వద్ద 25 కోట్లతో నిర్మించిన వెంతెనను, కోటి రూపాయల వ్యయంతో నిర్మించిన అతిథి గృహాన్ని ప్రారంభిస్తారు. ఆ తర్వాత 40వేల ఎకరాలకు సాగు నీరందించే నాగ మడుగు ఎత్తిపోతల పథకానికి శంకుస్థాపన చేసి పైలాన్‌ను ఆవిష్కరిస్తారు. అనంతరం పిట్లంలోని ప్రభుత్వ జూనియర్ కళాశాల వద్ద ఏర్పాటు చేసిన భారీ బహిరంగ సభలో మంత్రి కేటీఆర్ పాల్గొని ప్రసంగించనున్నారు.