Congress Manifesto: నేడు కాంగ్రెస్ మేనిఫెస్టో రిలీజ్ చేయనున్న మల్లికార్జున్ ఖర్గే

Congress: తెలంగాణలో గెలుపే లక్ష్యంగా కాంగ్రెస్ దూకుడు పెంచింది. కాంగ్రెస్‌ అగ్రనేత రాహుల్ గాంధీ, ఏఐసీసీ చీఫ్ మల్లికార్జున ఖర్గే నేడు ఎన్నికల ప్రచారం నిర్వహించనున్నారు. ఇప్పటికే ఆరు గ్యారెంటీలు ప్రకటించిన హస్తం పార్టీ ప్రజలకు మరిన్ని వరాలు ప్రకటించేందుకు రెడీ అయింది. కాంగ్రెస్ మేనిఫెస్టో‌ను కాసేపట్లో ఏఐసీసీ అధ్యక్షుడు మల్లికార్జున ఖర్గే రిలీజ్ చేయనున్నారు. ఈ కార్యక్రమంలో మాణిక్ రావు థాక్రే, రేవంత్‌రెడ్డి, శ్రీధర్ బాబు, పలువురు సీనియర్ నేతలు పాల్గొననున్నారు. పేదలు, మధ్యతరగతి , రైతులను ఆకట్టుకునేలా మేనిఫెస్టోను రూపొందించినట్లు తెలుస్తోంది. ప్రతి ఒక్కరికి సంక్షేమ ఫలాలు అందేలా మేనిఫెస్టోను రూపకల్పన చేసింది కాంగ్రెస్ పార్టీ.

ఇందిరమ్మ బహుమతి పథకం కింద వివాహ సమయంలో అర్హులైన మహిళలందరికీ 1 లక్ష రూపాయల సహాయం 10 గ్రాముల బంగారం అందించననున్నారు. విద్యార్థులందరికీ ఉచిత ఇంటర్నెట్ కల్పించనున్నారు. 18 ఏళ్లు నిండిన మహిళా కళాశాలకు వెళ్లే విద్యార్థులందరికీ ఉచిత ఎలక్ట్రిక్ స్కూటర్లు అందిస్తారు. విద్యా భరోసా కార్డు కింద ప్రతి కళాశాలకు వెళ్లే విద్యార్థికి 5 లక్షలు విద్యా ఖర్చుల కోసం అందిస్తారు. ఆరోగ్య శ్రీ కింద 10 లక్షలు, అన్ని ప్రధాన వ్యాధులను కవర్ చేస్తుంది. జర్నలిస్టు సంక్షేమ నిధికి రూ.100 కోట్లు కేటాయిస్తారు. మరణించిన జర్నలిస్టుల కుటుంబానికి రూ.2 లక్షలు, హెల్త్ కార్డులు, జర్నలిస్టులకు ఇళ్ల స్థలాలు ఇవ్వనున్నారు.

శారీరక వికలాంగులందరికీ ఉచిత రవాణా సౌకర్యం కల్పిస్తారు. పేదలకు 200 యూనిట్ల వరకు ఉచిత విద్యుత్ అందిస్తారు. ప్రభుత్వ ఆసుపత్రుల ఆధునికీకరణ , హెరిటేజ్ ట్యాగ్‌తో ఉస్మానియా జనరల్ ఆసుపత్రిని పునరుద్ధరించడాన్ని మేనిఫెస్టోలో పొందుపర్చారు. ఇళ్లు లేని పేదలకు ఒక్కొక్కరికి 5 లక్షలు.. ఇళ్లు లేని ఎస్సీ, ఎస్టీ కుటుంబాలకు ఇంటి నిర్మాణానికి ఇళ్ల స్థలాలు ఉంటే 6 లక్షలు ఇవ్వనున్నారు. ఇల్లు లేని ప్రతి పేదవాడికి ఇందిరమ్మ ఇళ్లు అందించనున్నారు. ఖాళీగా ఉన్న దాదాపు 2 లక్షల ప్రభుత్వ ఉద్యోగాల భర్తీ...ఖాళీగా ఉన్న ఉపాధ్యాయ పోస్టులన్నింటినీ డీఎస్సీ ద్వారా భర్తీ చేయనున్నారు. తెలంగాణ రాష్ట్ర పబ్లిక్ సర్వీస్ కమిషన్ ద్వారా వార్షిక ఉద్యోగ క్యాలెండర్ ప్రకటన, బాసర తరహాలో 4 ఐఐఐటీల ఏర్పాటు వంటి హామీలను మేనిఫెస్టోలో పొందుపర్చారు.

2 లక్షల పంట రుణాలు ఒకేసారి మాఫీ చేస్తామన్న హామీని మేనిఫెస్టోలో పొందుపర్చారు. 3 లక్షల వరకు వడ్డీ లేని పంట రుణం అందించడంతో పాటు వ్యవసాయ రంగానికి 24 గంటల పాటు నిరంతరాయ ఉచిత విద్యుత్ అందిస్తామన్న హామీ ఉండనుంది. అన్ని ప్రధాన పంటలకు సమగ్ర పంట బీమా అందిస్తారు. యాదవ, కుర్మ సంఘాల సభ్యులకు మేకలు, గొర్రెల పెంపకం కోసం నేరుగా 2 లక్షలు అందించనున్నారు. నిర్మాణ కార్మికులు, ఆటో, క్యాబ్ డ్రైవర్లు, స్విగ్గీ, జొమాటో కార్మికులు, గుర్తింపు లేని రంగ కార్మికులందరికీ సామాజిక భద్రతా వ్యవస్థ ఏర్పాటు చేస్తారు.

ప్రభుత్వం నుంచి ప్రోత్సాహకాలు పొందే అన్ని ప్రైవేట్ రంగాల్లో ఎస్సీ, ఎస్టీలకు రిజర్వేషన్లు కల్పిస్తారు. సమ్మక్క సారక్క పండుగను జాతీయ పండుగగా గుర్తించాలని మేనిఫెస్టోలో పొందుపర్చారు. ధరణి వల్ల నష్టపోయిన రైతులందరినీ కవర్ చేయడానికి భూమాత పోర్టల్ అని పిలువబడే ధరణి పోర్టల్ యొక్క పారదర్శక కొత్త వెర్షన్ తీసుకురానున్నారు. రైతులకు, కౌలు రైతులకు ఎకరాకు ఏడాదికి 15వేలు, వ్యవసాయ కార్మికులకు ఏడాదికి 12వేలు అందించనున్నారు. తెలంగాణ అమరవీరుల తల్లి, తండ్రి, జీవిత భాగస్వామికి నెలకు 25వేలు గౌరవ పెన్షన్‌తోపాటు వారి కుటుంబ సభ్యులకు ప్రభుత్వ ఉద్యోగం కల్పించే హామీని మేణిపెస్టోలో పొందుపర్చారు.

తెలంగాణ రాష్ట్ర సాధన ఉద్యమం సందర్భంగా నమోదైన వారిపై పెండింగ్‌లో ఉన్న కేసులన్నింటినీ ఉపసంహరించుకోవాలని మేనిఫెస్టోలో డిమాండ్ చేయనున్నారు. గ్రామ పంచాయతీల అభివృద్ధి నిధులను సర్పంచ్‌ల ఖాతాలకు నేరుగా బదిలీ చేస్తారు. భూమిలేని పేదల పథకం కింద 25 లక్షల ఎకరాల భూమిని ఇచ్చిన రైతులకు యాజమాన్య హక్కుల పునరుద్ధరించనున్నారు.

50 శాతం తగ్గింపుతో పెండింగ్‌లో ఉన్న పోలీసు చలాన్‌లను వన్‌టైమ్ సెటిల్‌మెంట్‌ సౌకర్యం కల్పిస్తారు. అన్ని బెల్ట్ షాపుల మూసి వేస్తారు. రాష్ట్రవ్యాప్తంగా బీసీ కులాల గణన చేపట్టనున్నారు. సరిపడా నిధులతో కొత్త మైనారిటీ సంక్షేమ బోర్డు.,ప్రజా ఫిర్యాదులను స్వీకరించడానికి ప్రజా ఫిర్యాదులను సమయానుకూలంగా పరిష్కరించడానికి పోర్టల్ ఏర్పాటు చేస్తారు. ఎక్సైజ్ పాలసీ సమీక్ష , దేవాలయాలు, చర్చిలు, మసీదులు, పాఠశాలలు, కళాశాలలు మొదలైన వాటి చుట్టూ మద్యం దుకాణాలపై నిషేధం విధిస్తామని మేనిఫెస్టోలో పొందుపర్చారు.