రిగ్గింగ్ చేసి గెలిచిన కాంగ్రెస్: మాగంటి సునీత

జూబ్లీహిల్స్ అసెంబ్లీ నియోజకవర్గం ఉప ఎన్నికల్లో కాంగ్రెస్ పార్టీ ఘన విజయం సాధించినప్పటికీ, ఓడిపోయిన బీఆర్‌ఎస్ (BRS) అభ్యర్థి మాగంటి సునీత ఎన్నికల ప్రక్రియపై సంచలన ఆరోపణలు చేశారు. ఈ ఎన్నిక రౌడీయిజంతో జరిగిందని, ఇది ప్రజాస్వామ్యానికి విరుద్ధమని ఆమె అభివర్ణించారు.

శుక్రవారం హైదరాబాద్‌లోని యూసుఫ్‌గూడలో ఉప ఎన్నికల ఫలితాలు వెలువడిన తర్వాత ఆమె మీడియా ముందు స్పందించారు. ఈ సందర్భంగా మాగంటి సునీత మాట్లాడుతూ, కాంగ్రెస్ పార్టీపై తీవ్ర స్థాయిలో మండిపడ్డారు.

"ప్రజలను భయపెట్టి ఓట్లు వేయించుకున్నారు. ప్రజాస్వామ్యాన్ని ఖూనీ చేశారు" అని కాంగ్రెస్ నేతలపై ఆమె విరుచుకుపడ్డారు. కాంగ్రెస్ పార్టీ రిగ్గింగ్ చేసి గెలిచిందని ఆమె తీవ్ర విమర్శలు చేశారు.

ఈ ఉప ఎన్నిక నిర్వహణలో ఎన్నికల సంఘం (ఈసీ) పూర్తిగా విఫలమైందని ఆమె ఆరోపించారు. కాంగ్రెస్ గెలుపు అసలు గెలుపే కాదని, నైతికంగా తానే గెలిచానని మాగంటి సునీత ఈ సందర్భంగా స్పష్టం చేశారు.