Electric Car : వానాకాలంలో మీ ఎలక్ట్రిక్ కారు సురక్షితంగా నడవాలంటే.. ఈ టిప్స్ పాటించండి

Electric Car : భారతదేశంలో ఎలక్ట్రిక్ వాహనాలకు డిమాండ్ ప్రతి నెలా కొత్త రికార్డులను సృష్టిస్తోంది. ఈవీల ప్రజాదరణ పెరుగుతున్న కొద్దీ, వాటిని జాగ్రత్తగా చూసుకోవడం కూడా చాలా ముఖ్యం. వానాకాలంలో ఎలక్ట్రిక్ వెహికల్ సేఫ్టీ, పర్ఫామెన్స్ కాపాడుకోవడానికి కొన్ని ముఖ్యమైన విషయాలను గుర్తుంచుకోవడం అవసరం.

ఛార్జింగ్ సమయంలో జాగ్రత్త

వర్షంలో అందరి మొదటి ఆందోళన ఛార్జర్ భద్రత గురించే. వాహనాన్ని ఇంటి బయట లేదా ఏదైనా పబ్లిక్ ఛార్జింగ్ స్టేషన్‌లో ఛార్జ్ చేస్తున్నట్లయితే, ఛార్జింగ్ టూల్ పూర్తిగా పొడిగా, సురక్షితంగా ఉండేలా చూసుకోండి. బహిరంగ ప్రదేశాల్లో పోర్టబుల్ ఛార్జర్‌లను ఉపయోగించకుండా ఉండడం మంచిది. ఎందుకంటే నీరు తగలడం వల్ల షార్ట్ సర్క్యూట్ లేదా ఇతర టెక్నికల్ ప్రాబ్లమ్స్ తలెత్తవచ్చు.

బ్యాటరీ ప్యాక్

ఎలక్ట్రిక్ వాహనానికి ప్రాణం దాని బ్యాటరీ. వానాకాలంలో బ్యాటరీ ప్యాక్, దాని కనెక్షన్లు పూర్తిగా సీల్ చేసి ఉంచాలి. తద్వారా నీరు లోపలికి వెళ్ళదు. ఒకవేళ మీకు ఏదైనా లీకేజ్ జరిగిందని అనుమానం వస్తే, వెంటనే దానిని చెక్ చేయించండి. అవసరమైతే సర్వీస్ సెంటర్‌కు తీసుకువెళ్లండి.

వాహనం శుభ్రత

వర్షం పడినప్పుడు బురద, ధూళి వాహనంపై పేరుకుపోతాయి. ఇది బయటి భాగాలకు, కొన్ని ముఖ్యమైన భాగాలకు నష్టం కలిగించవచ్చు. కాబట్టి, ప్రతిసారి బయట నుండి వచ్చిన తర్వాత వాహనాన్ని కడిగి, శుభ్రం చేసి, ఆరబెట్టడం మంచిది.

లోతైన నీటిలో ప్రయాణాలు వద్దు

ఎలక్ట్రిక్ సిస్టమ్ చాలా సున్నితమైనది, కాబట్టి లోతైన నీరు లేదా నీరు నిలిచిన ప్రదేశాలకు దూరంగా ఉండాలి. అలాంటి రోడ్లపై వాహనం నడపడం బ్యాటరీకి, ఇతర ఎలక్ట్రిక్ భాగాలకు ప్రమాదకరం కావచ్చు. కాబట్టి, అలాంటి సమయాల్లో వేరే మార్గాన్ని ఎంచుకోవడం మంచిది.

IP రేటింగ్ చాలా ముఖ్యం

మీరు ఎలక్ట్రిక్ వాహనం కొనుగోలు చేయాలని ఆలోచించినప్పుడు, దాని IP (Ingress Protection) రేటింగ్‌ను తప్పకుండా చెక్ చేయండి. ముఖ్యంగా బ్యాటరీ ప్యాక్‌కు IP67 రేటింగ్ ఉండటం అవసరం. ఇది వాహనం ఎంతవరకు నీటిని తట్టుకోగలదో సూచిస్తుంది.