Internet Speed: 1.02 పెటాబిట్స్ స్పీడ్. ఇంటర్నెట్ వేగంలో చరిత్ర సృష్టించిన జపాన్

Internet Speed: జపాన్ మరోసారి సాంకేతికంగా తన ఆధిపత్యాన్ని చాటుకుంది. ప్రపంచంలోనే అత్యంత వేగవంతమైన ఇంటర్నెట్ వేగాన్ని సృష్టించి చరిత్ర సృష్టించింది. కేవలం ఒక్క సెకనుకు 1.02 పెటాబిట్స్(ఒక పెటాబిట్ అంటే 1,000 టెరాబిట్‌లు అంటే దాదాపు 125,000 GB) వేగంతో ఇంటర్నెట్ డేటాను బదిలీ చేసి సరికొత్త రికార్డును నెలకొల్పింది. ఈ అద్భుతమైన వేగంతో నెట్‌ఫ్లిక్స్‌లోని మొత్తం డేటాను లేదా దాదాపు 150 GB వీడియో గేమ్‌లను కేవలం ఒక్క సెకనులో డౌన్‌లోడ్ చేసుకోవచ్చు. ఇది భారత సగటు ఇంటర్నెట్ వేగం అయిన 63.55 Mbps (మెగాబిట్స్ పర్ సెకన్) తో పోలిస్తే దాదాపు 16 మిలియన్ రెట్లు వేగవంతమైనది. అంటే, భారతదేశంలో ఒక వీడియో డౌన్‌లోడ్ అవ్వడానికి పట్టే సమయం కంటే కోట్లలో తక్కువ సమయంలో జపాన్‌లో భారీ ఫైల్స్ డౌన్‌లోడ్ అవుతాయన్నమాట.

ఈ అద్భుతమైన ఆవిష్కరణను జపాన్‌లోని నేషనల్ ఇన్‌స్టిట్యూట్ ఆఫ్ ఇన్ఫర్మేషన్ అండ్ కమ్యూనికేషన్స్ టెక్నాలజీ (NICT) కి చెందిన పరిశోధకులు సాధించారు. వారు ఆప్టికల్ ఫైబర్ టెక్నాలజీలో సరికొత్త పురోగతిని సాధించారు. సాంప్రదాయ ఫైబర్‌లలో ఒకే కోర్ ఉండగా, NICT శాస్త్రవేత్తలు నాలుగు కోర్‌లు కలిగిన ఫైబర్‌ను ఉపయోగించారు. ఇది డేటా బదిలీ సామర్థ్యాన్ని గణనీయంగా పెంచుతుంది. అంతేకాకుండా, వారు వేవ్ డివిజన్ మల్టిప్లెక్సింగ్ అనే సాంకేతికతను ఉపయోగించి, ఒకే ఫైబర్ ద్వారా అనేక డేటా సిగ్నల్‌లను ఏకకాలంలో పంపగలిగారు.

భవిష్యత్తులో దీని ప్రభావం ఎలా ఉంటుంది?

ఇంతటి వేగవంతమైన ఇంటర్నెట్ భవిష్యత్తులో అనేక రంగాలలో విప్లవాత్మక మార్పులు తీసుకురాగలదు.

డేటా సెంటర్లు : భారీ డేటాను తక్కువ సమయంలో బదిలీ చేయడానికి ఇది ఎంతో ఉపయోగపడుతుంది.

క్లౌడ్ కంప్యూటింగ్ : క్లౌడ్ ఆధారిత సేవలు మరింత వేగంగా, సమర్థవంతంగా మారతాయి.

ఆర్టిఫిషియల్ ఇంటెలిజెన్స్, మెషిన్ లెర్నింగ్ : భారీ డేటాసెట్‌లను వేగంగా ప్రాసెస్ చేయడానికి ఇది కీలకం.

వర్చువల్ రియాలిటీ , ఆగ్మెంటెడ్ రియాలిటీ : అత్యధిక బ్యాండ్‌విడ్త్ అవసరమయ్యే ఈ టెక్నాలజీలు అంతరాయం లేకుండా పనిచేస్తాయి.

రీసెర్చ్ అండ్ సైన్స్ : శాస్త్రవేత్తలు క్లిష్టమైన సిమ్యులేషన్‌లు, డేటా విశ్లేషణలను చాలా వేగంగా చేయగలరు.

ప్రస్తుతానికి ఇది ప్రయోగశాల స్థాయిలో ఉన్న ఆవిష్కరణ అయినప్పటికీ, భవిష్యత్తులో ఇంటర్నెట్ వేగం ఏ స్థాయికి చేరుకోనుందో ఈ జపాన్ రికార్డు స్పష్టం చేస్తోంది.