AI replacing coding jobs: టెక్కిల కొంపముంచుతున్న AI.. ఏంగా 30శాతం మందికి..!

ప్రపంచ వ్యాప్తంగా టెక్ కంపెనీలు ఆర్టిఫిషియల్ ఇంటెలిజెన్స్ ఆధారిత కోడింగ్ దిశగా వేగంగా అడుగులు వేస్తున్నాయి. గూగుల్, మైక్రోసాఫ్ట్, మెటా వంటి దిగ్గజ సంస్థలు ఇప్పటికే తమ కోడ్ అభివృద్ధిలో AI పాత్రను గణనీయంగా పెంచాయి. గూగుల్ CEO ఇటీవల ప్రకటించిన వివరాల ప్రకారం, కంపెనీలో కొత్తగా రాసే కోడ్‌లో 30 శాతం కన్నా ఎక్కువ భాగం ఇప్పటికే AI చేత రూపొందించబడుతోంది. ఈ గణాంకం గత ఏడాదితో పోలిస్తే పెరిగింది, 2024 అక్టోబర్‌లో ఇది 25 శాతంగా ఉన్నది.

మరోవైపు, మైక్రోసాఫ్ట్ CEO మాట్లాడుతూ, తమ కంపెనీలో సుమారు 30 శాతం కోడ్ AI ద్వారా తయారవుతోందని తెలిపారు. సంస్థలోని కొన్ని ప్రాజెక్టులు పూర్తిగా సాఫ్ట్‌వేర్ ఆధారంగానే అభివృద్ధి చెందుతున్నాయని వెల్లడించారు.

ఇక మెటా CEO ప్రకారం, వచ్చే 12 నుండి 18 నెలల్లో మెటా యొక్క ల్లామా ప్రాజెక్టులకు అవసరమయ్యే కోడ్‌ను పూర్తిగా AI రాస్తుందనే అంచనాలో ఉన్నారు. ప్రస్తుతం AI ఒక మిడిల్ లెవల్ డెవలపర్ స్థాయికి సమానంగా పనిచేస్తోందని, త్వరలో అది టాప్ ఇంజినీర్ల కంటే మెరుగ్గా కోడ్ రాస్తుందని తెలిపారు. AI లక్ష్యాన్ని నిర్ధారిస్తే, అది టెస్టింగ్ చేసి, లోపాలను కనిపెట్టి, నాణ్యత కలిగిన కోడ్‌ను పూర్తిగా తయారు చేసే స్థాయికి చేరుతోందని అభిప్రాయపడ్డారు.

ఈ అభివృద్ధిని మరో కోణంలో చూస్తే, ఆర్టిఫిషియల్ ఇంటెలిజెన్స్‌ వల్ల తక్కువ సమయంలో ఎక్కువ పని చేయగల సామర్థ్యం కంపెనీలకు లభిస్తోంది. అయితే ఇదే పరిణామం చాలా ఉద్యోగాలను ప్రమాదంలోకి నెట్టే ప్రమాదం కూడా ఉంది. డ్యూలింగో, షాపిఫై వంటి సంస్థలు ఇప్పటికే AI వల్ల కొంతమంది కాంట్రాక్ట్ ఉద్యోగులను తొలగిస్తున్నాయని ప్రకటించాయి.

డ్యూలింగో CEO ప్రకారం, AI చేత చేయగల పనులకు మానవ కాంట్రాక్టర్ల అవసరం ఇకపై ఉండబోదని స్పష్టంగా చెప్పారు. షాపిఫై CEO మాట్లాడుతూ, ఉద్యోగుల అవసరాన్ని స్పష్టం చేయాలంటే, ఆ పనిని AI చేయలేకపోతేనే కొత్త ఉద్యోగి తీసుకోవచ్చని తన సంస్థకు చెప్పినట్టు తెలిపారు. సంస్థలో ప్రతి ఒక్కరూ AI వాడకం పట్ల గుణాత్మకమైన అవగాహనతో ముందుకెళ్లాలని స్పష్టంగా చెప్పారు. ఈ వేగవంతమైన మార్పులు ఒకవైపు ఉద్యోగాలను కలుగజేస్తే, మరోవైపు ఇప్పటికే ఉన్న ఉద్యోగాల భద్రతపై అనిశ్చితిని కలిగిస్తున్నాయి. ఇప్పుడిప్పుడే కెరీర్‌లోకి అడుగుపెడుతున్న యువత, ప్రస్తుతం టెక్ రంగంలో ఉన్నవారికి ఇది ఒక సవాల్‌తో కూడిన కొత్త దశగా నిలవనుంది.