Rishabh Pant : గాయంలో మ్యాచ్‎కు పంత్ దూరం.. ఇంకొకరు బ్యాటింగ్ చేస్తారా ? రూల్స్ ఏంటి ?

Rishabh Pant : మాంచెస్టర్ టెస్ట్ మొదటి రోజే భారత క్రికెట్ జట్టుకు పెద్ద షాక్ తగిలింది. స్టార్ వికెట్ కీపర్ రిషబ్ పంత్ గాయంతో మైదానం వీడాల్సి వచ్చింది. ఇంగ్లాండ్ బౌలర్ క్రిస్ వోక్స్ వేసిన ఒక యార్కర్ బంతి పంత్ కాలికి తగిలింది. బంతి తగలగానే పంత్ నొప్పితో విలవిలలాడుతూ రిటైర్డ్ హర్ట్ అయ్యి, వైద్యుల సహాయం కోసం మెడికల్ సెంటర్‌కు వెళ్లాడు. ఈ సంఘటన భారత అభిమానులనే కాదు, క్రికెట్ వర్గాల్లోనూ పెద్ద చర్చకు దారితీసింది. పంత్ గాయం తీవ్రమైతే, భారత జట్టుకు కన్‌కషన్ సబ్‌స్టిట్యూట్ దొరుకుతుందా? అసలు ICC నియమాలు ఈ విషయంలో ఏం చెబుతాయో తెలుసుకుందాం.

రిషబ్ పంత్ గాయం ఇప్పుడు క్రికెట్ నియమాలపై, ముఖ్యంగా కన్‌కషన్ సబ్‌స్టిట్యూట్ రూల్ పై చర్చకు దారితీసింది. క్రికెట్ నియమాల ప్రకారం, కన్‌కషన్ సబ్‌స్టిట్యూట్ అనేది ఆటగాడికి తలకి గాయం తగిలి, అతను మ్యాచ్ ఆడటానికి వీలు లేనప్పుడు మాత్రమే వర్తిస్తుంది. అంటే, బ్యాటింగ్ చేస్తున్నప్పుడు హెల్మెట్‌కు బంతి బలంగా తగలడం లేదా ఫీల్డింగ్ చేస్తున్నప్పుడు తలకి దెబ్బ తగలడం వంటి సందర్భాల్లో మాత్రమే ఈ రూల్ వర్తిస్తుంది.

ఈ పరిస్థితిలో గాయపడిన ఆటగాడి స్థానంలో అతనిలాంటి పాత్రను పోషించగల మరొక ఆటగాడిని జట్టులోకి తీసుకోవడానికి ఐసీసీ అనుమతిస్తుంది. ఉదాహరణకు, ఒకవేళ పంత్‌కు తలకి గాయం తగిలి ఉంటే, భారత జట్టు ధ్రువ్ జురెల్ వంటి ఆటగాడిని కన్‌కషన్ సబ్‌స్టిట్యూట్‌గా తీసుకోవడానికి అవకాశం ఉండేది. జురెల్ బ్యాటింగ్ చేయగలడు. వికెట్ కీపింగ్ కూడా చేయగలడు కాబట్టి పంత్ స్థానాన్ని భర్తీ చేసేవాడు.

అయితే, ఇక్కడ పంత్‌కు తగిలిన గాయం కాలికి, తలకి కాదు. కాబట్టి, ICC నిబంధనల ప్రకారం భారత జట్టుకు కన్‌కషన్ సబ్‌స్టిట్యూట్ అనుమతి లభించదు. బదులుగా, భారత జట్టుకు ఒక సబ్‌స్టిట్యూట్ ఫీల్డర్ మాత్రమే దొరుకుతాడు. ఈ సబ్‌స్టిట్యూట్ ఫీల్డర్ కేవలం ఫీల్డింగ్ లేదా వికెట్ కీపింగ్ మాత్రమే చేయగలడు. అతను బ్యాటింగ్ కానీ, బౌలింగ్ కానీ చేయలేడు. కాబట్టి, ఒకవేళ పంత్ మ్యాచ్ నుండి పూర్తిగా తప్పుకుంటే, భారత జట్టులో కేవలం 10 మంది ఆటగాళ్లు మాత్రమే బ్యాటింగ్ చేయగలుగుతారు. ఇది జట్టుకు పెద్ద నష్టం.

భారత ఇన్నింగ్స్ 68వ ఓవర్‌లో క్రిస్ వోక్స్ వేసిన ఒక వేగవంతమైన యార్కర్ బంతి రిషబ్ పంత్‌ను ఇబ్బందుల్లోకి నెట్టింది. పంత్ ఆ బంతిని రివర్స్-స్వీప్ ఆడటానికి ప్రయత్నించాడు, కానీ బంతి నేరుగా అతని కాలి షూకి బలంగా తగిలింది. బంతి తగలగానే అతని కాలు నుంచి రక్తం కారడం మొదలైంది. నొప్పి తీవ్రత ఎక్కువగా ఉండటంతో, అతన్ని వెంటనే మైదానం నుండి బయటకు తీసుకెళ్లారు. పంత్‌ను నేరుగా మెడికల్ సెంటర్‌కు తరలించారు. అక్కడ అతని గాయానికి చికిత్స జరుగుతోంది. అతని గాయం ఎంత తీవ్రమైందో, అతను తిరిగి ఆడగలుగుతాడో లేదో తెలియాల్సి ఉంది.