Kho Kho World Cup 2025: అభిమానులకు షాక్.. ఈ కారణంగా భారతదేశం-పాకిస్తాన్ మ్యాచ్ రద్దు..!

Kho Kho World Cup 2025: తొలి ఖో-ఖో ప్రపంచ కప్ జనవరి 13 నుండి ఢిల్లీలోని ఇందిరా గాంధీ స్టేడియంలో ప్రారంభం కానుంది. ఈ టోర్నమెంట్‌లో పురుషులు, మహిళల విభాగాలలో ఉత్కంఠకరమైన మ్యాచ్‌లు ఉంటాయి. ఇందులో మొత్తం 39 జట్లు పాల్గొంటాయి. ముందుగా ఈ టోర్నమెంట్ 40 జట్ల మధ్య ఆడాల్సి ఉంది. పురుషుల విభాగంలో 20 జట్లు ఉన్నాయి. కానీ పాకిస్తాన్ జట్టు అందులో లేదు. టోర్నమెంట్ మొదటి మ్యాచ్ భారతదేశం, పాకిస్తాన్ జట్ల మధ్య జరుగుతుందని ప్రకటించారు. కానీ ఇది ఇప్పుడు జరగదు.

వీసా పొందడంలో జాప్యం కారణంగా, పాకిస్తాన్ జట్టు న్యూఢిల్లీలో జరిగే మొదటి ఖో-ఖో ప్రపంచ కప్‌లో పాల్గొనకపోవచ్చు. పాకిస్తాన్ జట్టుకు ఇంకా వీసా రాలేదు. భారత పురుషుల జట్టు తొలి మ్యాచ్ జనవరి 13న నేపాల్‌తో జరుగుతుంది. ఖో-ఖో ప్రపంచ కప్ నిర్వాహణ అధికారి గీతా సుడాన్ ఇండియన్ ఎక్స్‌ప్రెస్‌తో మాట్లాడుతూ.. 'మేము షెడ్యూల్ చేసినప్పుడు, అది ప్రణాళిక ప్రకారం జరుగుతుందని మేము ఆశించాము. కానీ అది ప్రస్తుతం మా నియంత్రణలో లేదు, విదేశాంగ మంత్రిత్వ శాఖ వారి దరఖాస్తును ఆమోదించలేదు. కాబట్టి పాకిస్తాన్ ఆడే అవకాశం తక్కువగా కనిపిస్తోంది. ఛాంపియన్స్ ట్రోఫీకి సంబంధించి ఇటీవల రెండు దేశాల మధ్య చాలా వివాదం చెలరేగింది. దాని ప్రభావం ఇప్పుడు ఇతర క్రీడలపై కూడా కనిపిస్తోంది.’’ అన్నారు.

ఇప్పుడు ఖో-ఖో ప్రపంచ కప్‌లో పురుషుల మ్యాచ్‌లు భారతదేశం, నేపాల్ మధ్య మొదటి మ్యాచ్‌తో ప్రారంభమవుతాయి. ఇది భారత కాలమానం ప్రకారం రాత్రి 8:30 గంటలకు జరుగుతుంది. లీగ్ దశ మ్యాచ్‌లు జనవరి 16 వరకు జరుగుతాయి. దీని తర్వాత, ప్లేఆఫ్ మ్యాచ్‌లు జనవరి 17 నుండి ప్రారంభమవుతాయి. ఫైనల్ జనవరి 19న భారత కాలమానం ప్రకారం రాత్రి 8:15 గంటలకు జరుగుతుంది. మరోవైపు, మహిళల పోటీలో మొత్తం 19 జట్లు ఆడనున్నాయి. పురుషుల పోటీలో, 20 జట్లను నాలుగు గ్రూపులుగా విభజించారు. భారత జట్టు గ్రూప్‌లో నేపాల్, పెరూ, బ్రెజిల్ , భూటాన్ జట్లు ఉన్నాయి. వీటితో పాటు, దక్షిణాఫ్రికా, ఘనా, అర్జెంటీనా, నెదర్లాండ్స్, ఇరాన్, బంగ్లాదేశ్, శ్రీలంక, దక్షిణ కొరియా, అమెరికా, పోలాండ్, ఇంగ్లాండ్, జర్మనీ, మలేషియా, ఆస్ట్రేలియా , కెన్యా కూడా ఈ టోర్నమెంట్‌లో భాగమయ్యాయి.