IND vs AUS Match: HRCకి చేరిన ఇండియా వర్సెస్ ఆస్ట్రేలియా హైదరాబాద్ మ్యాచ్ టికెట్ల లొల్లి..

IND vs AUS Match: హైదరాబాద్ క్రికెట్ ఆసోసియేషన్ (హెచ్‌సీఏ)పై హెచ్‌ఆర్సీకి ఫిర్యాదు అందింది. ఈ నెల 25న ఉప్పల్‌ స్టేడియంలో ఇండియా-ఆస్ట్రేలియా మధ్య టీ20 మ్యాచ్‌ జరగనుంది. అయితే ఈ మ్యాచ్‌ సంబంధించిన టికెట్ల విక్రయాల్లో అవకతవకలు జరిగాయని హెచ్‌ఆర్సీని ఆశ్రయించారు హైకోర్టు లాయర్‌ సలీం. అక్రమంగా టికెట్లను బ్లాక్‌లో విక్రయిస్తున్నారని ఆయన ఆరోపించారు. ఈ ఘటనపై సమగ్ర విచారణ జరిపి చర్యలు తీసుకోవాలని హెచ్‌ఆర్సీని కోరారు లాయర్ సలీం.

ఇక ఈ మ్యాచ్ కు సంబంధించిన టికెట్లను ఈ నెల 15న హైదరాబాద్ క్రికెట్ ఆసోసియేషన్ (హెచ్‌సీఏ) ప్రముఖ వెబ్ సైట్, యాప్ పేటియం ద్వారా విడుదల చేసింది. అయితే ఈ టికెట్లను కొనుగోలు చేసే సమయంలో అభిమానులు తీవ్ర ఇబ్బందులను ఎదుర్కొన్నారు. రాత్రి 8 గంటల నుంచి టికెట్లను అమ్మకానికి ఉంచినా.. సర్వర్స్ మొరాయించడం వల్ల 10 గంటలకు బుక్ చేసుకునే వీలు దొరికింది. అప్పటికీ టికెట్స్ ను బుక్ చేసుకుందామని అభిమానులు ప్రయత్నించగా.. టికెట్లు పూర్తిగా అమ్ముడైపోయాయని చూసి షాక్ తిన్నారు.