Yash Dayal : ఆర్సీబీ స్టార్ బౌలర్ పై లైంగిక దాడి ఆరోపణలు.. ఎఫ్ఐఆర్ నమోదు

Yash Dayal : ఐపీఎల్ 2025లో రాయల్ ఛాలెంజర్స్ బెంగళూరు జట్టును ఛాంపియన్‌గా నిలబెట్టడంలో కీలక పాత్ర పోషించిన జట్టు ఫాస్ట్ బౌలర్ యశ్ దయాల్ ప్రస్తుతం పెద్ద సమస్యలో చిక్కుకున్నాడు. ఘజియాబాద్‌లోని ఇందిరాపురం నివాసి అయిన ఒక యువతి, యశ్ దయాల్‌పై లైంగిక దాడి ఆరోపణలు చేసింది. దీంతో పోలీసులు కేసు కూడా నమోదు చేశారు. యువతి ఆరోపణలు నిజమని రుజువైతే, యశ్ దయాల్ జైలు పాలయ్యే అవకాశం ఉంది, ఇది అతని క్రికెట్ కెరీర్‌కు ముగింపు పలికే అవకాశం ఉంది.

కొద్ది రోజుల క్రితం ఒక యువతి తన సోషల్ మీడియా ఖాతాలో ఒక సుదీర్ఘ పోస్ట్ చేసింది. అందులో యశ్ దయాల్ పెళ్లి చేసుకుంటానని ఆశ చూపించి తనను ఆర్థికంగా, మానసికంగా, శారీరకంగా వేధించాడని ఆరోపించింది. ఈ పోస్ట్‌లో ఆమె యశ్ దయాల్‌తో ఉన్న ఫోటోను కూడా పంచుకుంది. అంతేకాకుండా ఈ విషయంపై పోలీసులకు ఫిర్యాదు చేసింది. తన ఫిర్యాదులో యశ్ దయాల్ చాలా సంవత్సరాలుగా తనను పెళ్లి చేసుకుంటానని నమ్మించి, తనతో శారీరక సంబంధం పెట్టుకున్నాడని పేర్కొంది.

యువతి పోలీసులకు ఇచ్చిన ఫిర్యాదులో యశ్ దయాల్‌పై చాలా తీవ్రమైన ఆరోపణలు చేసింది. గత 5 సంవత్సరాలుగా యశ్ దయాల్‌తో సంబంధం ఉందని ఆమె తన ఫిర్యాదులో పేర్కొంది. తనను పెళ్లి చేసుకోమని అడిగినప్పుడు, దయాల్ తనను శారీరకంగా, మానసికంగా వేధించాడని కూడా ఆరోపించింది. ఇది మాత్రమే కాదు, యశ్ దయాల్ తనతో పాటు ఇంకా చాలా మంది అమ్మాయిలతో సంబంధం కలిగి ఉన్నాడని ఆ యువతి ఆరోపించింది. దీనికి రుజువుగా వారిద్దరి వాట్సాప్ చాట్‌ల స్క్రీన్‌షాట్‌లు, వీడియో కాల్స్, ఫోటోలను పోలీసులకు సమర్పించింది. ప్రస్తుతం పోలీసులు ఈ విషయంలో కేసు నమోదు చేసి దర్యాప్తు చేస్తున్నారు. ఈ విషయంపై యశ్ దయాల్ బహిరంగంగా ఎలాంటి వివరణ ఇవ్వనప్పటికీ, దయాల్ తండ్రి మాత్రం ఈ ఆరోపణలను కొట్టి పారేశారు.

యశ్ దయాల్ ఐపీఎల్ 2025లో RCB తరఫున ఆడాడు. RCB మొదటిసారిగా ఐపీఎల్ టైటిల్ గెలవడంలో యశ్ దయాల్ కీలక పాత్ర పోషించాడు. ఈ సీజన్‌లో అతను 15 మ్యాచ్‌లు ఆడి 13 వికెట్లు పడగొట్టాడు. ఈ వివాదం అతని భవిష్యత్ కెరీర్‌పై ఎలాంటి ప్రభావం చూపుతుందో చూడాలి.