IND vs BAN: జూనియర్ల పాలిట విలన్లుగా మారిన నలుగురు సీనియర్లు.. బంగ్లాదేశ్‌తో టెస్ట్ సిరీస్ నుంచి ఔట్

India vs Bangladesh Test Series: శ్రీలంకతో సిరీస్ తర్వాత, టీమ్ ఇండియా ఇప్పుడు బంగ్లాదేశ్‌తో మ్యాచ్‌లపై కన్నేసింది. ఇరు జట్ల మధ్య ఈ సిరీస్ ప్రారంభం కావడానికి ఇంకా నెల రోజుల సమయం ఉంది. శ్రీలంకలో జరిగిన టీ20 సిరీస్‌ను భారత జట్టు కైవసం చేసుకుంది. ఆ తర్వాత వన్డే సిరీస్‌లో రోహిత్ శర్మ జట్టు ఓటమిని చవిచూడాల్సి వచ్చింది. టీ20, వన్డే తర్వాత ఇప్పుడు టెస్టు క్రికెట్‌ వంతు వచ్చింది. బంగ్లాదేశ్‌ జట్టు భారత్‌లో 2 టెస్టు మ్యాచ్‌ల సిరీస్‌ ఆడనుంది.

టీం ఇండియా సన్నాహాలు షురూ..

భారత కొత్త ప్రధాన కోచ్ గౌతం గంభీర్‌కి ఇదే తొలి టెస్టు సిరీస్. దేశవాళీ క్రికెట్‌లో ఆడాలని గంభీర్ జట్టులోని ప్రధాన ఆటగాళ్లను కోరాడు. కెప్టెన్ రోహిత్ శర్మ, విరాట్ కోహ్లి, జస్ప్రీత్ బుమ్రా మినహా ప్రధాన ఆటగాళ్లందరూ దులీప్ ట్రోఫీలో ఆడనున్నారు. గాయం కారణంగా మహ్మద్ షమీ ఈ టోర్నీలో ఆడడం లేదు. భారత్ చివరిసారిగా ఇంగ్లండ్‌తో టెస్టు సిరీస్‌లో తలపడింది. ఆ జట్టులో ఉన్న చాలా మంది ఆటగాళ్లకు బంగ్లాదేశ్‌తో సిరీస్‌కు అవకాశం లభించదు. ఇంగ్లండ్‌తో జరిగిన సిరీస్‌లో టీమిండియా సభ్యులుగా ఉన్న నలుగురు ఆటగాళ్ల గురించి ఇక్కడ తెలుసుకుందాం. వీరికి బంగ్లాదేశ్‌తో సిరీస్‌లో అవకాశం లభించదు.

రజత్ పాటిదార్: ఈ ఏడాది ఇంగ్లండ్‌తో జరిగిన టెస్టు సిరీస్‌లో రజత్ పాటిదార్ అరంగేట్రం చేశాడు. సిరీస్‌లోని 3 మ్యాచ్‌ల్లో అతనికి అవకాశం లభించింది. ఈ అవకాశాన్ని సద్వినియోగం చేసుకోలేకపోయాడు. 3 టెస్టుల 6 ఇన్నింగ్స్‌ల్లో వరుసగా 32, 9, 5, 0, 17, 0 పరుగులు చేశాడు. కేఎల్ రాహుల్ పునరాగమనం తర్వాత మళ్లీ పాటీదార్‌కు అవకాశం దక్కే అవకాశం చాలా తక్కువ.

దేవదత్ పడిక్కల్: ఇంగ్లండ్‌తో జరిగిన టెస్టు సిరీస్‌లో ఎడమచేతి వాటం బ్యాట్స్‌మెన్ దేవదత్ పడిక్కల్ కూడా అరంగేట్రం చేశాడు. ఇప్పటి వరకు ఒకే ఒక్క మ్యాచ్‌లో అవకాశం దక్కించుకున్నాడు. ధర్మశాల టెస్టు తొలి ఇన్నింగ్స్‌లో పడిక్కల్ 65 పరుగులు చేశాడు. రెండో ఇన్నింగ్స్‌లో అతనికి బ్యాటింగ్‌ చేసే అవకాశం రాలేదు. ఈ అద్భుతమైన ఇన్నింగ్స్ ఉన్నప్పటికీ, బంగ్లాదేశ్‌తో జరిగిన టెస్టు సిరీస్‌లో పడిక్కల్ తన స్థానాన్ని సంపాదించుకోలేకపోవచ్చు.

కేఎస్ భరత్: భారత్ తరపున 7 టెస్టు మ్యాచ్‌లు ఆడిన కేఎస్ భరత్ ఎంపిక కావడం కష్టం. ఇంగ్లండ్‌తో జరిగిన తొలి రెండు టెస్టు మ్యాచ్‌లలో అతనికి అవకాశం లభించింది. కానీ, అతను విఫలమయ్యాడు. ఈ కారణంగా ధృవ్ జురెల్‌కు ప్లేయింగ్-11లో చోటు కల్పించారు. కారు ప్రమాదం తర్వాత రిషబ్ పంత్ ఫిట్‌గా తిరిగి వచ్చాడు. టెస్టు జట్టులో అతని ఎంపిక ఖాయమని భావిస్తారు. ఇలాంటి పరిస్థితుల్లో కేఎస్ భరత్ బయటకు వెళ్లాల్సి రావచ్చు.

ఆకాశ్ దీప్: ఇంగ్లండ్ తో రాంచీ టెస్టులో అరంగేట్రం చేసిన ఆకాశ్ దీప్ కు ఎంపిక కావడం కష్టమే. మహ్మద్ షమీకి గాయం కారణంగా ఆకాష్ ఎంపికయ్యాడు. గాయం తర్వాత షమీ నేషనల్ క్రికెట్ అకాడమీ (ఎన్‌సీఏ)లో శిక్షణ తీసుకుంటున్నాడు. షమీ పునరాగమనం చేస్తే ఆకాష్ దీప్ బయటకు వెళ్లాల్సి ఉంటుంది.