Vaibhav Suryavanshi: ఆస్ట్రేలియా టూర్ కు టీమిండియా అండర్ 19 జట్టు ప్రకటన.. 14ఏళ్ల బుడ్డోడికి అవకాశం

Vaibhav Suryavanshi: బీసీసీఐ ఆస్ట్రేలియా పర్యటన కోసం భారత అండర్-19 పురుషుల క్రికెట్ జట్టును ప్రకటించింది. ఈ టూర్ సెప్టెంబర్ 2025లో జరగనుంది. ఇందులో టీమిండియా, ఆస్ట్రేలియా అండర్-19 జట్టుతో మూడు వన్డేలు, రెండు నాలుగు రోజుల మ్యాచ్‌లు ఆడనుంది. ఈ సిరీస్ యువ ఆటగాళ్లకు అంతర్జాతీయ స్థాయిలో తమ సత్తా చాటుకోవడానికి ఒక గొప్ప అవకాశం. ముఖ్యంగా, కేవలం 14 ఏళ్ల యువ సంచలనం వైభవ్ సూర్యవంశికి ఈ జట్టులో చోటు దక్కింది.

జూనియర్ క్రికెట్ కమిటీ ఈ జట్టుకు ఆయుష్ మాత్రేను కెప్టెన్‌గా ఎంపిక చేసింది. విహాన్ మల్హోత్రా వైస్ కెప్టెన్‌గా వ్యవహరించనున్నాడు. వీళ్లతో పాటు, అందరి దృష్టిని ఆకర్షించిన 14 ఏళ్ల యువ సంచలనం వైభవ్ సూర్యవంశికి కూడా ఈ జట్టులో చోటు దక్కింది. వైభవ్ సూర్యవంశి ఇటీవల ఇంగ్లాండ్ పర్యటనలో అద్భుతమైన బ్యాటింగ్ చేసి అందరినీ ఆకట్టుకున్నాడు. ఇప్పుడు ఆస్ట్రేలియా గడ్డపై తన సత్తా చూపించడానికి సిద్ధమవుతున్నాడు. వీరితో పాటు రాహుల్ కుమార్, అభిజ్ఞాన్ కుండూ, ఆర్.ఎస్. అంబరీష్, కనిష్క్ చౌహాన్ వంటి యువ ఆటగాళ్లు కూడా ఈ పర్యటనలో భాగం కానున్నారు.

భారత్, ఆస్ట్రేలియా అండర్-19 జట్ల మధ్య మొదట 3 వన్డే మ్యాచ్‌లు జరగనున్నాయి. సిరీస్‌లో మొదటి వన్డే సెప్టెంబర్ 21న జరుగుతుంది. ఆ తర్వాత రెండో వన్డే సెప్టెంబర్ 24న, మూడో వన్డే సెప్టెంబర్ 26న జరగనున్నాయి. వన్డే సిరీస్ తర్వాత, రెండు యూత్ టెస్ట్ మ్యాచ్‌లు కూడా ఆడతారు. మొదటి యూత్ టెస్ట్ మ్యాచ్ సెప్టెంబర్ 30 నుండి అక్టోబర్ 3 వరకు ఉంటుంది. రెండో యూత్ టెస్ట్ మ్యాచ్ అక్టోబర్ 7 నుండి అక్టోబర్ 10 వరకు జరుగుతుంది. ఈ మ్యాచ్‌ల కోసం మొత్తం 17 మంది ఆటగాళ్లను ఎంపిక చేశారు. అదనంగా, ఐదుగురు ఆటగాళ్లను స్టాండ్‌బై ప్లేయర్లుగా కూడా ఎంచుకున్నారు.

భారత అండర్-19 జట్టు సభ్యులు:

ఆయుష్ మాత్రే (కెప్టెన్), విహాన్ మల్హోత్రా (వైస్ కెప్టెన్), వైభవ్ సూర్యవంశి, వేదాంత్ త్రివేది, రాహుల్ కుమార్, అభిజ్ఞాన్ కుండూ (వికెట్ కీపర్), హర్‌వంశ్‌ సింగ్ (వికెట్ కీపర్), ఆర్.ఎస్. అంబరీష్, కనిష్క్ చౌహాన్, నమన్ పుష్పక్, హెనిల్ పటేల్, డి. దీపేష్, కిషన్ కుమార్, అన్మోల్‌జిత్ సింగ్, ఖిలాన్ పటేల్, ఉధవ్ మోహన్, అమన్ చౌహాన్.