Basant Panchami 2026: పిల్లల చదువుల్లో రాణించాలంటే.. ఈ రోజే 'సరస్వతి వందనం' చేయించండి!

జ్ఞానానికి అధిదేవత, సకల కళల తల్లి అయిన సరస్వతీ దేవి జన్మించిన పవిత్ర దినమే వసంత పంచమి. ప్రతి ఏటా మాఘ మాసం శుక్ల పక్ష పంచమి తిథి నాడు ఈ పండుగను జరుపుకుంటాం. ఈ ఏడాది జనవరి 23, 2026 (శుక్రవారం) నాడు వసంత పంచమి లేదా శ్రీపంచమిని జరుపుకోబోతున్నాం. ఈ రోజు నుంచే ప్రకృతిలో కొత్త కాంతులు నింపుతూ వసంత రుతువు కూడా ప్రారంభమవుతుంది.

సరస్వతీ కటాక్షం ఎందుకు ముఖ్యం?

విద్యార్థులు, కళాకారులు, మేధావులు జ్ఞానాన్ని, వివేకాన్ని, సద్బుద్ధిని ప్రసాదించమని ఈ రోజు అమ్మవారిని ప్రత్యేకంగా పూజిస్తారు. చిన్న పిల్లలకు అక్షరాభ్యాసం చేయడానికి ఈ రోజు అత్యంత ప్రశస్తమైనది. తెల్లని వస్త్రాలు ధరించి, శ్వేత పద్మంపై వీణను ధరించిన వాగ్దేవిని స్తుతిస్తే అజ్ఞానం తొలగి, బుద్ధి వికాసం కలుగుతుందని పురాణాలు చెబుతున్నాయి.

విద్యార్థులు పఠించాల్సిన ముఖ్యమైన 'సరస్వతి వందనం'

ఈ రోజు పిల్లల చేత ఈ క్రింది శక్తివంతమైన శ్లోకాలను పఠింపజేయడం వల్ల ఏకాగ్రత, జ్ఞాపకశక్తి పెరుగుతాయని భక్తుల నమ్మకం:

1. సరస్వతీ ప్రార్థన శ్లోకం:

యా కుందేందు తుషార హార ధవళా యా శుభ్ర వస్త్రావృతా | యా వీణా వరదండ మండితకరా యా శ్వేత పద్మాసనా || యా బ్రహ్మాచ్యుత శంకర ప్రభృతిభిః దేవైః సదా పూజితా | సా మాం పాతు సరస్వతీ భగవతీ నిశ్శేష జాడ్యాపహా ||

తాత్పర్యం: మల్లెపూవు, చంద్రుడు, మంచు హారం వలె తెల్లగా మెరిసేది.. శ్వేత పద్మంపై ఆసీనురాలై, బ్రహ్మ విష్ణు మహేశ్వరులచే నిత్యం పూజించబడే ఓ చదువుల తల్లి! మాలోని అజ్ఞానాన్ని తొలగించి మమ్మల్ని రక్షించు.

2. విద్యారంభ శ్లోకం:

సరస్వతి నమస్తుభ్యం వరదే కామరూపిణి | విద్యారంభం కరిష్యామి సిద్ధిర్భవతు మే సదా ||

అగస్త్య మహర్షి ప్రోక్త 'సరస్వతీ స్తోత్రం' (ముఖ్య భాగాలు):

సరస్వతి దేవిని నిత్యం స్తుతించే ఈ స్తోత్రం అపారమైన జ్ఞానాన్ని ప్రసాదిస్తుంది:

సరస్వతి నమస్తుభ్యం సర్వదేవి నమో నమః | శాంతరూపే శశిధరే సర్వయోగే నమో నమః ||

నిత్యానందే నిరాధారే నిష్కళాయై నమో నమః | విద్యాధరే విశాలాక్షి శుద్ధజ్ఞానే నమో నమః ||

జ్ఞాన విజ్ఞాన రూపాయై జ్ఞానమూర్తే నమో నమః | నానాశాస్త్ర స్వరూపాయై నానారూపే నమో నమః ||

ఫలితం: ప్రతిరోజూ ఉదయం, సాయంత్రం ఈ స్తోత్రాన్ని పఠించే వారికి ఆరు నెలల్లోనే జ్ఞాన సిద్ధి కలుగుతుందని, చోర, వ్యాఘ్ర భయాలు ఉండవని అగస్త్య ముని చెప్పారు.