Indian Railways: ఈ రూల్స్ తెలుసుకోకుండా ట్రైన్ ఎక్కుతున్నారా.. ఇబ్బందుల్లో పడ్డట్లే.. భారీగా జరిమానా కూడా పడే ఛాన్స్?

Indian Railway Rules: ప్రతిరోజూ కోట్లాది మంది ప్రయాణికులు భారతీయ రైల్వే సేవలను సద్వినియోగం చేసుకుంటారు. ప్రతిరోజూ, భారతీయ రైల్వే అనేక మంది వ్యక్తులను వారి గమ్యస్థానానికి చేరవేస్తుంది. ఇటువంటి పరిస్థితిలో మొత్తం ప్రయాణంలో ప్రయాణీకులకు ఎటువంటి ఇబ్బందులు తలెత్తకుండా చూసేందుకు రైల్వే కొన్ని ప్రత్యేక నిబంధనలను రూపొందించింది. మీరు తరచుగా రైలులో ప్రయాణిస్తున్నట్లయితే, వాటి గురించి తెలుసుకోవడం చాలా ముఖ్యం. దీని వల్ల మీకు తర్వాత ఎలాంటి సమస్య ఉండదు. ఈ రైల్వే నిబంధనల గురించి ఇప్పుడు తెలుసుకుందాం..

రైలులో రాత్రి నిద్రించడానికి నియమాలు?

ప్రయాణికులందరి సౌకర్యాన్ని దృష్టిలో ఉంచుకుని, రైల్వే రాత్రిపూట నిద్రించడానికి కొన్ని నియమాలను రూపొందించింది. ఏ ప్రయాణీకుడైనా తన బెర్త్‌లో రాత్రి 10 గంటల నుంచి ఉదయం 6 గంటల వరకు మాత్రమే పడుకోవచ్చు. ఉదయం 6 గంటల తర్వాత, ఇతర సహ-ప్రయాణికులు లోయర్ బెర్త్ ప్యాసింజర్‌ని సీటు నుంచి లేవమని అడగవచ్చు. దీనితో పాటు రాత్రిపూట బిగ్గరగా మాట్లాడటం, పాటలు వినడం కూడా నిషేధించారు. లేదంటే మీకు జరిమానా విధించే అవకాశం కూడా ఉంటుంది.

ఆ సమయంలో టీటీఈ టిక్కెట్లను తనిఖీ చేయలేడు..

రైల్వే నిబంధనల ప్రకారం రాత్రి 10 గంటల నుంచి ఉదయం 6 గంటల వరకు ఏ ప్రయాణీకుల టిక్కెట్టును టీటీఈ తనిఖీ చేయకూడదు. ప్రయాణికుల సుఖవంతమైన ప్రయాణం కోసం.. ప్రజల నిద్రను పాడుచేయకుండా ఉండేందుకు రైల్వేశాఖ ఈ నిబంధనను రూపొందించింది.

ఎన్ని కిలోల లగేజీతో ప్రయాణించవచ్చు..

భారతీయ రైల్వే అధికారిక వెబ్‌సైట్‌లో ఇచ్చిన సమాచారం ప్రకారం AC ఫస్ట్ క్లాస్‌లో 70 కిలోల వరకు లగేజీతో ప్రయాణించవచ్చు. అదే సమయంలో, ప్రయాణికులు ఏసీ 2 టైర్‌లో 50 కేజీలు, ఏసీ-3 టైర్‌లో 40 కేజీలు, స్లీపర్‌లో 40 కేజీలు, సెకండ్ క్లాస్‌లో 35 కేజీల వరకు లగేజీతో ప్రయాణించవచ్చు.

ప్లాట్‌ఫారమ్ టికెట్ ద్వారా కూడా ప్రయాణం..

రైల్వే నిబంధనల ప్రకారం టికెట్ కొనే సమయం లేకుంటే ప్లాట్ ఫాం టికెట్ తీసుకుని మాత్రమే రైలు ఎక్కవచ్చు. ఆ తర్వాత, మీరు వెంటనే TTEని సంప్రదించాలి. గమ్యస్థాన స్టేషన్ వరకు టికెట్ పొందాలి. TTE మీ టిక్కెట్‌ను తక్షణమే ఇస్తాడు. దీంతో మీరు సులభంగా ప్రయాణించగలరు.